Modimo o bua le rona a dirisa Baebele e e Boitshepo. Re tshwanetse go e ithuta gore re itse Mokwadi wa yone. (Johane 17:3; 2 Timotheo 3:16) Mo Baebeleng, Jehofa Modimo o re bolelela se a se ikaeletseng ka batho le ka lefatshe.—Genesise 3:15; Tshenolo 21:3, 4.

Ga go ise go ke go nne le buka e e kileng ya fetola matshelo a batho jaaka yone. Baebele e re thusa go nna le dinonofo tse di tshwanang le tsa ga Jehofa tse di jaaka lorato, kutlwelobotlhoko le bopelotlhomogi. E thusa batho go nna le tsholofelo le go itshokela maemo a a thata. Le gompieno e sa ntse e senola dilo tsa lefatshe leno tse di sa dumalaneng le thato ya Modimo.—Pesalema 119:105; Bahebera 4:12; 1 Johane 2:15-17.

Kwa tshimologong Baebele e ne e kwadilwe ka Sehebera, Searamaika le Segerika, mme jaanong e ranoletswe mo dipuong di feta 3 000, e feletse kgotsa e le dikarolo dingwe tsa yone. Ga go na buka epe e e ranoletsweng mo dipuong tse dingwe le e e anamisitsweng mo lefatsheng jaaka yone. Seno ga se gakgamatse ka gonne boporofeti jwa Baebele jwa re: “Dikgang tseno tse di molemo tsa Bogosi [molaetsa wa Baebele wa konokono] di tla rerelwa batho ba ba mo lefatsheng lotlhe gore e nne bosupi mo ditšhabeng tsotlhe, mme go tswa foo bokhutlo bo tla tla.”—Mathaio 24:14.

E re ka re lemoga gore molaetsa wa Baebele o botlhokwa, boikaelelo jwa rona ke gore re nne le Baebele e e dumalanang le se se mo mekwalong ya ntlhantlha, e e utlwalang sentle e bile e balega motlhofo. Ditlhogo tse di kwa morago mo Baebeleng eno tse di reng “Dikaelo Tsa go Ranola Baebele,” “Dilo Tse di Fetotsweng mo Baebeleng Eno” le “Matsapa a a Tserweng Gore re Nne le Baebele” di tlhalosa dilo tse di tokafaditsweng mo Baebeleng eno tse di amanang le puo.

Batho ba ba ratang Jehofa Modimo e bile ba mo obamela ba batla thanolo ya Lefoko la Modimo e e nepileng le e e tlhaloganyesegang motlhofo. (1 Timotheo 2:4) Ka ntlha ya seo, re tlhabolotse Baebele eno ka Setswana, go dumalana le maikaelelo a rona a gore Thanolo ya Lefatshe le Lesha e ranolelwe mo dipuong tse dintsi kafa go ka kgonegang ka teng. Mmadi yo o rategang, re rapelela gore Baebele eno e go thuse fa o ntse o leka ‘go itse Modimo.’—Ditiro 17:27.