Bahebera 4:1-16

  • Kotsi ya go sa ikhutse mo letsatsing la Modimo la boikhutso (1-10)

  • Ba rotloediwa go ikhutsa mo letsatsing la Modimo la boikhutso (11-13)

    • Lefoko la Modimo le a tshela (12)

  • Jesu ke moperesiti yo mogolo (14-16)

4  Ka jalo, e re ka go sa ntse go na le tsholofelo ya go ikhutsa mo letsatsing la gagwe la boikhutso, a re nneng re disitse* gore ope mo go lona a se ka a palelwa ke go ikhutsa mo letsatsing leo.+  Gonne le rona re boleletswe dikgang tse di molemo+ fela jaaka borraaronamogolo. Mme ga ba a ka ba di ikobela, ka jalo ga di a ka tsa ba tswela mosola, ka gonne ba ne ba se na tumelo e e tshwanang le ya ba ba neng ba di ikobela.  Gonne rona ba re nang le tumelo re a ikhutsa mo letsatsing leno, fela jaaka a ne a re: “Ka jalo, ke ne ka ikana ke galefile ka re, ‘Ga ba kitla ba ikhutsa mo letsatsing la me la boikhutso,’”+ le fa gone a ne a wetsa ditiro tsa gagwe go tloga fa e sa le batho ba bopiwa.*+  Gonne golo gongwe o buile jaana ka letsatsi la bosupa: “Mme Modimo o ne a ikhutsa ka letsatsi la bosupa mo ditirong tsotlhe tsa gagwe,”+  mme le fano gape a re: “Ga ba kitla ba ikhutsa mo letsatsing la me la boikhutso.”+  Ka jalo, e re ka bangwe ba sa ntse ba ka kgona go ikhutsa mo letsatsing la gagwe la boikhutso, mme ba ba neng ba bolelelwa dikgang tse di molemo pele ba ne ba se ka ba kgona ka ntlha ya botlhokakutlo.+  Ke gone ka moo morago ga lobaka lo loleele, Modimo a ileng a bua mo pesalemeng ya ga Dafide a re, “Gompieno fa lo reetsa lentswe la me, lo se ka lwa thatafatsa dipelo tsa lona.”+ Gape o tshwaya letsatsi le le rileng, le a le bitsang “Gompieno.”  Gonne fa Joshua+ a ka bo a ba isitse kwa lefelong la boikhutso, Modimo a ka bo a sa bua ka letsatsi le lengwe morago ga moo.  Ka jalo, batho ba Modimo ba tswelela ba na le letsatsi la go ikhutsa le le tshwanang le letsatsi la Sabata.+ 10  Gonne motho yo o ikhuditseng mo letsatsing la Modimo la boikhutso, o ikhuditse mo ditirong tsa gagwe, fela jaaka Modimo a ne a ikhutsa mo ditirong tsa gagwe.+ 11  Ka jalo, a re direng bojotlhe gore re kgone go ikhutsa mo letsatsing leo, gore go se ka ga nna le ope yo o welang mo mokgweng oo wa botlhokakutlo.+ 12  Gonne lefoko la Modimo le a tshela e bile le naya maatla+ e bile le bogale thata go gaisa tšhaka epe e e magalemabedi,+ gape le tlhaba gore le bo le kgaoganye maikutlo le moya,* malokololo le moko, e bile le kgona go senola dilo tse re di akanyang le tse re di eletsang mo pelong. 13  Mme ga go na ope kgotsa sepe se se fitlhegileng mo go ene,+ mme dilo tsotlhe di senogile e bile di a bonala mo matlhong a ene yo o tla re atlholang go ya ka ditiro tsa rona.+ 14  Ka jalo, e re ka re na le moperesiti yo mogolo yo o neng a ya kwa legodimong, e bong Jesu Morwa Modimo,+ a re tsweleleng re bua phatlalatsa gore re dumela mo go ene.+ 15  Gonne moperesiti yo mogolo yo re nang le ene, ga se yo o ka se kang a re utlwela botlhoko ka ntlha ya makoa a rona,+ mme ke yo o lekilweng ka ditsela tsotlhe tse le rona re lekilweng ka tsone, mme gone o ne a tswelela a sa leofe.+ 16  Ka jalo, a re atameleng kwa setulong sa bogosi sa bopelonomi jo bogolo* e bile a re rapeleng re sa tshabe sepe,+ gore re tle re utlwelwe botlhoko re bo re newe bopelonomi jo bogolo gore bo re thuse ka nako e e tshwanetseng.

Dintlha Tse di Kwa Tlase

Seger., “a re boifeng.”
Bona ntlh. mo go Mat 25:34.