Bahebera 7:1-28

  • Melekisedeke, ke kgosi gape ke moperesiti (1-10)

  • Boperesiti jwa ga Keresete ke jwa maemo a a kwa godimo (11-28)

    • Keresete o kgona go boloka ka botlalo (25)

7  Gonne Melekisedeke yono, e bong kgosi ya Salema, moperesiti wa Modimo Mogodimodimo, o ne a ya go kgatlhantsha Aborahame fa a tswa go bolaya dikgosi a bo a mo segofatsa+  e bile Aborahame o ne a mo naya* karolo* ya sengwe le sengwe se a neng a na le sone. La ntlha leina la gagwe le ranotswe e le “Kgosi ya Tshiamo,” mme go tswa foo la ranolwa e le kgosi ya Salema, mo go rayang, “Kgosi ya Kagiso.”  E re ka a ne a se na rre, a se na mmê, a sa balelwe mo losikeng lope, go sa itsiwe gore o tshotswe leng kgotsa gore o sule leng, mme a dirilwe gore a tshwane le Morwa Modimo, o tswelela e le moperesiti ka bosakhutleng.*+  Ruri monna yono o ne a na le maemo a a kwa godimo! Ke gone ka moo Aborahame, tlhogo ya lotso, a neng a mo naya karolo* ya dilo tsa botlhokwa tse a neng a di gapile.+  Ke boammaaruri gore Molao wa ga Moshe o ne o laela bomorwa Lefi+ ba ba tlhomilweng go nna baperesiti gore ba phuthe ditsabosome* mo bathong,+ ke gore, mo go bomorwarraabone, le fa gone bano e le ditlogolwana tsa* ga Aborahame.  Mme monna yono, yo o neng a sa tswe mo losikeng lwa ga Lefi, o ne a tsaya ditsabosome mo go Aborahame yo Modimo a neng a mo solofeditse dilo dingwe, go tswa foo, a bo a mo segofatsa.+  Jaanong ga re ka ke ra ganetsa gore yo o nang le maemo a a kwa godimo o segofatsa yo o nang le maemo a a kwa tlase.  Kgang e nngwe ke gore Balefi ba ba neng ba amogela ditsabosome ke batho ba ba kgonang go swa, mme Dikwalo di supela gore monna yo mongwe yo o neng a amogela ditsabosome, o tswelela a tshela.+  Mme go ka twe tota le Lefi yo o amogelang ditsabosome, o ne a ntsha ditsabosome ka Aborahame, 10  ka gonne o ne a sa ntse a tla nna setlogolwana sa* ga Aborahame rraagwemogolo fa Melekisedeke a ne a mo kgatlhantsha.+ 11  Jaanong, fa e le gore boperesiti jwa Balefi bo ne bo dira gore batho ba se ka ba nna le boleo+ (gonne e ne e le karolo ya Molao wa ga Moshe o o neng o neilwe batho), a go ne go tla bo go tlhokega gore go nne le moperesiti yo mongwe yo o tshwanang le Melekisedeke+ mme a sa tshwane le Arone? 12  Gonne e re ka boperesiti bo fetolwa, Molao wa ga Moshe le one o tshwanetse go fetolwa.+ 13  Gonne monna yo dilo tseno di buiwang ka ene o tswa mo lotsong lo longwe, lo go se nang ope mo go lone yo o diretseng kwa sebesong.+ 14  Gonne go a itsege gore Morena wa rona o dule mo go Juda,+ le fa go ntse jalo, Moshe ga a ka a bua sepe ka kgang ya go re baperesiti ba tswa mo lotsong lwa Juda. 15  Mme kgang eno e utlwala le go feta fa go tla moperesiti yo mongwe+ yo o tshwanang le Melekisedeke,+ 16  yo jaanong e leng moperesiti, mme e se ka ntlha ya lotso lo a tswang mo go lone jaaka Molao wa ga Moshe o batla, mme e le ka gonne a na le maatla a a mo nayang botshelo jo bo ka se kang jwa senngwa.+ 17  Gonne fa go ntshiwa bosupi ka ene ga twe: “O moperesiti ka bosakhutleng yo o tshwanang le Melekisedeke.”+ 18  Jaanong Modimo o fedisitse taelo ya pele ka gonne e bokoa e bile ga e na mosola.+ 19  Gonne Molao wa ga Moshe o ne o sa direlwa gore o fedise boleo gotlhelele,+ mme gone Modimo o re neile tsholofelo e e botoka+ e e kgonang go dira jalo. Tsholofelo eno e dira gore re atamalane le Modimo.+ 20  Gape, e re ka moperesiti yono a ne a tlhomiwa ka gonne go dirilwe maikano, 21  (gonne eleruri go na le banna ba ba nnileng baperesiti go sa dirwa maikano, mme yono ene o nnile moperesiti ka gonne yo o dirileng maikano ka ga gagwe o ne a re: “Jehofa* o ikanne mme ga a kitla a fetola mogopolo wa gagwe,* ‘O moperesiti ka bosakhutleng’”),+ 22  Jesu e ne e le bosupi* jo bo tlhomamisang gore kgolagano e e botoka e tla diragadiwa.+ 23  Mo godimo ga moo, ba le bantsi ba ne ba nna baperesiti ka go latelana+ ka gonne loso lo ne lo ba thibela go tswelela e le baperesiti, 24  mme ene ka gonne a tswelela a tshela ka bosakhutleng,+ ga go na ope yo o mo tlhatlhamang go nna moperesiti. 25  Ka jalo, o kgona go boloka ka botlalo ba ba atamelang Modimo ka ene, ka gonne o tswelela a tshela gore a ba rapelele.+ 26  Gonne go a tshwanela gore re nne le moperesiti yo mogolo yo o ntseng jalo, yo o ikanyegang, a se na molato, a sa leswafala,+ a farologane le baleofi, a tlotlomaditswe kwa godimo ga magodimo.+ 27  Ga a tlhoke go ntsha ditlhabelo letsatsi le letsatsi,+ jaaka baperesiti bao ba bagolo ba dira, a ntshetsa maleo a gagwe pele mme go tswa foo a bo a ntshetsa batho,+ ka gonne o ne a dira seno gangwe fela fa a ne a ntsha botshelo jwa gagwe setlhabelo.+ 28  Gonne Molao wa ga Moshe o tlhoma banna ba ba nang le makoa gore e nne baperesiti ba bagolo,+ mme maikano+ a a neng a dirwa morago ga Molao oo, a tlhoma Morwa, yo o neng a nna a se na boleo+ ka bosakhutleng.

Dintlha Tse di Kwa Tlase

Seger., “abela.”
Seger., “nngwesomeng (1/10).”
Kgotsa “yo o nnelang ruri.”
Kgotsa “nngwesomeng (1/10).” Bona Ditlhaloso Tsa Mafoko.
Kgotsa “dikarolo tsa bolesome.”
Seger., “ba ba tswang mo dinôkeng tsa.”
Seger., “a sa ntse a le mo dinôkeng tsa.”
Kgotsa “ga a kitla a ikwatlhaya.”
Kgotsa “yo o ntshitsweng e le peeletso.”