Bahebera 3:1-19

  • Jesu o mogolo go feta Moshe (1-6)

    • Dilo tsotlhe di dirilwe ke Modimo (4)

  • Tlhagiso ka go tlhoka tumelo (7-19)

    • “Fa lo reetsa lentswe la me gompieno” (7, 15)

3  Ka jalo, lona bakaulengwe ba ba boitshepo, ba ba bileditsweng* go ya go tshela kwa legodimong,+ akanyang ka moaposetoloi le moperesiti yo mogolo yo re bolelang gore re dumela mo go ene, e bong Jesu.+  O ne a ikanyega mo Modimong yo a mo tlhomileng,+ fela jaaka Moshe le ene a ne a ikanyega fa a ne a direla mo ntlong ya Modimo.+  O* tsewa a tshwanelwa ke kgalalelo+ e e fetang ya ga Moshe, ka gonne yo o agang ntlo o na le tlotlo e e fetang ya ntlo ka boyone.  Ke boammaaruri gore ntlo nngwe le nngwe e agiwa ke mongwe, mme dilo tsotlhe di dirilwe ke Modimo.  Jaanong, Moshe e ne le motlhokomedi yo o ikanyegang mo ntlong ya Modimo mme seno e ne e le sesupo* sa dilo tse di neng di tla buiwa moragonyana,  mme Keresete ene o ne a ikanyega e le morwa+ mo ntlong ya Modimo. Eleruri, re ba ntlo ya gagwe+ fa fela re ngangatlela kgololesego ya rona ya go bua le tsholofelo e re ikgantshang ka yone go fitlha kwa bokhutlong.  Ka jalo, fela jaaka go kwadilwe ka kaelo ya moya o o boitshepo go twe:+ “Fa lo reetsa lentswe la me gompieno,  lo se ka lwa thatafatsa dipelo tsa lona jaaka ka nako ya fa borraalonamogolo ba ne ba nkgalefisa thata, mo letsatsing la fa ba ne ba nteka kwa nageng.+  Borraalonamogolo ba ne ba nteka le fa gone ba bone ditiro tsa me dingwaga di le 40.+ 10  Ke gone ka moo kokomana eo e neng ya mpherosa sebete mme ke ne ka re: ‘Dipelo tsa bone di nna di fapoga ka metlha, mme ga ba ise ba itse ditsela tsa me.’ 11  Ka jalo, ke ne ka ikana jaana ke galefile: ‘Ga ba kitla ba ikhutsa mo letsatsing la me la boikhutso.’”+ 12  Bakaulengwe, nnang kelotlhoko gore ope wa lona a se ka a nna le pelo e e bosula e e se nang tumelo ka gonne a katogetse kgakala le Modimo yo o tshelang;+ 13  mme nnang lo kgothatsana letsatsi le letsatsi, fa fela go sa ntse go ka twe “Gompieno,”+ gore go se nne le ope wa lona yo o thatafadiwang ke maatla a a tsietsang a boleo. 14  Gonne re tla newa se Keresete a se neilweng fa fela re ngangatlela go ya kwa bokhutlong tshepo e re neng re na le yone kwa tshimologong.+ 15  Fela jaaka go ne ga buiwa ga twe, “Fa lo reetsa lentswe la me gompieno, lo se ka lwa thatafatsa dipelo tsa lona jaaka ka nako ya fa lo ne lo nkgalefisa thata.”+ 16  Gonne ke bomang ba ba neng ba utlwa lentswe la Modimo mme ba mo galefisa? A ga se botlhe ba ba neng ba tswa kwa Egepeto ba eteletswe pele ke Moshe?+ 17  Gape ke bomang ba ba neng ba ferosa Modimo sebete dingwaga di le 40?+ A e ne e se ba ba neng ba leofa, ba ba neng ba swela kwa nageng?+ 18  Mme ke bomang ba Modimo a neng a re ga ba kitla ba ikhutsa mo letsatsing la gagwe la boikhutso? A e ne e se ba ba neng ba gana go mo ikobela? 19  Ka jalo, re a bona gore ga ba a ka ba ikhutsa mo letsatsing la gagwe la boikhutso ka gonne ba ne ba se na tumelo.+

Dintlha Tse di Kwa Tlase

Kgotsa “laleditsweng.”
Go tewa Jesu.
Kgotsa “bosupi.”