Bahebera 1:1-14

  • Modimo o bua a dirisa Morwawe (1-4)

  • Morwa o kwa godimo ga baengele (5-14)

1  Mo metlheng ya bogologolo, Modimo o ne a bua le borraaronamogolo a dirisa baporofeti ka makgetlo a le mantsi le ka ditsela tse di farologaneng.+  Jaanong mo nakong eno,* o bua le rona a dirisa Morwa,+ yo a mo tlhomileng gore a nne moruaboswa wa dilo tsotlhe,+ le yo a neng a mo dirisa go dira dilo tse di mo lefatsheng le tse di kwa legodimong.*+  O bonatsa kgalalelo ya Modimo+ e bile o tshwana le ene tota,+ mme o dira gore dilo tsotlhe di tswelele di le teng a dirisa lefoko la gagwe le le maatla. Mme fa a sena go itshekisa maleo a rona,+ o ne a nna ka fa seatleng sa moja sa Modimo yo Mogolo yo o kwa godimo.+  Jaanong o mogolo go feta baengele,+ ka gonne o ne a newa leina le le fetang maina a bone.+  Ka sekai, Modimo o kile a raya moengele ofe a re: “O morwaake; jaanong gompieno ke rrago”?+ A bo a re: “Ke tla nna rraagwe, mme ene o tla nna morwaake”?+  Mme fa Modimo a romela Leitibolo+ la gagwe gape mo lefatsheng, a re: “A baengele botlhe ba Modimo ba obame fa pele ga gagwe.”  Gape, fa a bua ka baengele a re: “O dira gore baengele ba gagwe ba nne maatla thata, le batlhanka ba gagwe+ ba nne jaaka kgabo ya molelo.”+  Mme fa a bua ka Morwa a re: “Modimo ke ene a go nayang taolo ya go busa*+ ka bosakhutleng le go ya go ile, mme lore lwa segosi lwa Bogosi jwa gago ke lore lwa tshiamiso.*  O ne wa rata tshiamo, mme o ne wa tlhoa bosula. Ke gone ka moo Modimo wa gago a go tloditseng+ ka leokwane a bo a dira gore o itumele go gaisa balekane ba gago.”+ 10  Gape mo dikwalong tsa Modimo go kwadilwe go twe: “Wena Morena, kwa tshimologong o ne wa thaya metheo ya lefatshe, mme magodimo ke tiro ya diatla tsa gago. 11  Di tla nyelela, mme wena o tla tswelela o le gone; mme di tla onala tsotlhe fela jaaka seaparo, 12  mme o tla di phutha fela jaaka kobo, e bile o tla di fetola fela jaaka fa motho a apola seaparo mme a apara se sengwe. Le fa go ntse jalo, wena ga o fetoge, le dingwaga tsa gago ga di kitla di khutla.”+ 13  Mme o kile a raya moengele ofe a re: “Nna ka fa seatleng sa me sa moja go fitlha ke dira gore baba ba gago ba nne ka fa tlase ga dinao tsa gago”?+ 14  A baengele botlhe ga se meya e e direlang Modimo?*+ A Modimo ga a ba laela gore ba thuse ba ba tlileng go bolokwa?

Dintlha Tse di Kwa Tlase

Seger., “mo bokhutlong jwa metlha eno.”
Kgotsa “go dira dipaka tsa nako e dilo di neng di direga ka yone.”
Seger., “Modimo ke setulo sa gago sa bogosi.”
Seheb., “thokgamo.”
Kgotsa “e e direlang batho botlhe?”