Bahebera 12:1-29

  • Jesu ke Moitekanedisi wa tumelo ya rona (1-3)

    • Basupi ba bantsintsi (1)

  • O se ka wa gana kotlhao ya ga Jehofa (4-11)

  • Tsamayang mo tseleng e e tlhamaletseng (12-17)

  • Go atamela Jerusalema yo o kwa legodimong (18-29)

12  Ka jalo, e re ka re na le basupi ba bantsintsi ba ba re dikologileng, a le rona re apoleng bokete bongwe le bongwe le boleo jo bo re raelang motlhofo,+ mme a re tabogeng lobelo lo re leng mo go lone re itshokile,+  re ntse re lebile ka kelotlhoko kwa Moemeding yo Mogolo le Moitekanedisi wa tumelo ya rona, e bong Jesu.+ E re ka a ne a tlhomile mogopolo mo boitumelong* jo bo neng bo beilwe kwa pele ga gagwe, o ne a itshokela go swela mo koteng ya tlhokofatso* e bile ga a ka a tlhabiwa ke ditlhong, mme gone jaanong o ntse ka fa seatleng sa moja sa setulo sa bogosi sa Modimo.+  Ka jalo, akanyang ka kelotlhoko ka ene yo o itshoketseng mafoko a a tlhabang a baleofi,+ a tota a neng a utlwisa bone botlhoko, gore lo se ka lwa lapa lo bo lo kgobega marapo.*+  Fa lo ne lo lwantshana le boleo, ga lo ise lo ko lo lwe mo lo neng lo tloga lo swa.  Mme lo lebetse gotlhelele kgakololo eno e lo neng lwa e newa jaaka bana: “Morwaaka, o se ka wa nyenyefatsa kotlhao ya ga Jehofa,* kgotsa wa kgobega marapo fa a go kgalemela;  gonne Jehofa* o kgalemela ba a ba ratang, tota e bile, o otlhaya* mongwe le mongwe yo a mo amogelang gore e nne morwawe.”+  Fa lo otlhaiwa* lo tlhoka go itshoka. Eno ke tsela e Modimo a tshwarang bana ba gagwe ka yone.+ Gonne ke morwa ofe yo rraagwe a sa mo otlhayeng?+  Mme fa e le gore lona lotlhe ga lo a otlhaiwa ka kotlhao eno, ga lo bana ba gagwe tota mme lo bana ba mongwe o sele.  Mo godimo ga moo, borraarona* ba ne ba tlhola ba re otlhaya, mme re ne re ba tlotla. A ga re a tshwanela go ikobela Rara le go feta, ene yo o kaelang botshelo jwa rona ka moya o o boitshepo?+ 10  Gonne ba ne ba re otlhaya ka nakwana go ya ka se ba neng ba bona se siame, mme Modimo ene o dira jalo gore re solegelwe molemo gore re tle re nne boitshepo jaaka ene a le boitshepo.+ 11  Ke boammaaruri gore ga go na ope yo o itumelang fa a otlhaiwa ka gonne kotlhao e botlhoko.* Le fa go ntse jalo, fa motho a ithuta go tswa mo go yone e mo tswela mosola mme morago ga moo, o tla kgona go dira dilo sentle e bile o tla tshela ka kagiso. 12  Ka jalo, nonotshang diatla tse di bokoa le mangole a a kgwetlhang,+ 13  mme nnang lo tsamaya mo tseleng e e tlhamaletseng,+ gore se se tlhotsang se se ka sa lwala le go feta, go na le moo se fole. 14  Lwelang go nna le kagiso le batho botlhe+ le go tshela botshelo jo bo boitshepo,*+ ka gonne kwantle ga jone ga go motho ope yo o tla bonang Morena. 15  Nnang lo disitse ka kelotlhoko gore go se ka ga nna le motho ope yo o latlhegelwang ke bopelonomi jo bogolo* jwa Modimo, gore go se ka ga mela modi ope o o botlhole mme wa baka mathata o bo o leswafatsa batho ba le bantsi;+ 16  e bile nnang lo disitse gore go se ka ga nna le ope mo go lona yo o dirang boitsholo jo bo sa siamang jwa tlhakanelodikobo* kgotsa ope fela yo o nyatsang dilo tse di boitshepo, jaaka Esau, yo o neng a aba ditshwanelo tsa gagwe tsa go nna leitibolo gore a bone sejo se le sengwe fela.+ 17  Gonne lo a itse gore moragonyana fa a ne a batla go newa tshegofatso eo ga a ka a e newa; gonne le fa a ne a leka ka natla go fetola mogopolo wa ga rraagwe ka go lela,+ o ne a se ka a kgona.* 18  Gonne ga lo a ka lwa atamela sengwe* se se ka amiwang+ le se se tlhoseditsweng ka molelo,+ le leru le lentsho le lefifi le lentshontsho le setsuatsue,+ 19  le modumo wa terompeta+ le lentswe le le tswang kwa legodimong.+ E rile batho ba utlwa lentswe leo, ba ne ba kopa gore go se ka ga tlhola go nna le sepe se sengwe se se buiwang le bone.+ 20  Gonne ba ne ba tshosiwa thata ke taelo eno e e reng: “Tota le fa phologolo e ama thaba, e tshwanetse go kgobotlediwa ka maje.”+ 21  Gape, se ba neng ba se bona se ne se boifisa thata mo e leng gore Moshe o ne a re: “Ke tshogile e bile ke a roroma.”+ 22  Le fa go ntse jalo, lo atametse Thaba ya Siona+ le motse wa Modimo yo o tshelang, e leng Jerusalema yo o kwa legodimong,+ le baengele ba le bantsintsi* 23  ba ba phuthegileng,+ le phuthego ya maitibolo a a kwadisitsweng kwa magodimong, le Modimo Moatlhodi wa botlhe,+ le basiami ba ba tshelang go dumalana le moya o o boitshepo+ e bile ba dirilwe gore ba itekanele,+ 24  le Jesu motsereganyi+ wa kgolagano e ntšha+ le madi a a kgatšhitsweng mo go rona, a a botoka go na le a ga Abele.+ 25  Elang tlhoko gore lo se ka lwa gana go reetsa lentswe la yo o buang go tswa kwa magodimong. Mo nakong e e fetileng, batho ga ba a ka ba reetsa se Modimo a neng a se ba laetse, mme ba ne ba otlhaiwa. Ruri le rona re tla otlhaiwa fa re sa reetse lentswe la yo o buang go tswa kwa magodimong!+ 26  Ka nako eo lentswe la gagwe le ne la reketlisa lefatshe,+ mme jaanong o solofeditse jaana: “Ke sa ntse ke tla reketlisa lefatshe, mme gape ke tla reketlisa le legodimo.”+ 27  Jaanong mafoko a a reng “ke sa ntse ke tla,” a bontsha gore dilo tse di reketlisiwang tse di dirilweng di tla senngwa, gore dilo tse di sa reketlisiwang di sale. 28  Ka jalo, e re ka re tla amogela Bogosi jo bo ka se kang jwa reketlisiwa, a re tsweleleng re amogela bopelonomi jo bogolo, jo bo tla re thusang go direla Modimo tirelo e e boitshepo ka tsela e a e amogelang re mmoifa e bile re mo tlotla. 29  Gonne Modimo wa rona o tshwana le molelo o o lailang.+

Dintlha Tse di Kwa Tlase

Kgotsa “boipelong.”
Kgotsa “lo bo lo felelwa ke thata.”
Seger., “kgwathisa.”
Kgotsa “katisiwa.”
Seger., “borraarona ba senama.”
Kgotsa “e a hutsafatsa.”
Kgotsa “le go itshepisiwa.”
Seger., “o ne a se ka a go bonela sebaka.”
Kgotsa “thaba.”
Kgotsa “dikete di le masomesome.”