Bahebera 8:1-13

  • Motlaagana o bontsha dilo tse di botlhokwa tsa kwa legodimong (1-6)

  • Kgolagano ya bogologolo le e ntšha di a bapisiwa (7-13)

8  Jaanong ntlha ya botlhokwa e re e buang ke eno: Re na le moperesiti yo mogolo yo o ntseng jalo,+ mme o ntse ka fa seatleng sa moja sa setulo sa bogosi sa Modimo yo mogolo yo o kwa magodimong,+  motlhanka yo o direlang mo lefelong le le boitshepo+ le mo motlaaganeng wa boammaaruri, o Jehofa* a o tlhomileng, mme e seng motho.  Gonne moperesiti mongwe le mongwe yo mogolo o tlhomiwa gore a ise dimpho le ditlhabelo; ka jalo go ne go tlhokega gore yono le ene a nne le sengwe se a ka se ntshang.+  Fa a ka bo a le mo lefatsheng, e ka bo e se moperesiti,+ gonne go ne go setse go na le baperesiti bangwe ba ba neng ba isa dimpho go ya ka Molao wa ga Moshe.  Banna bano ba dira tirelo e e boitshepo e e tshwantshetsang le e e bontshang dilo tsa kwa legodimong;+ ke gone ka moo, fa Moshe a ne a tloga a aga motlaagana, Modimo a neng a mo naya taelo eno: “O tlhomamise gore o dira dilo tsotlhe go ya ka polane e o e bontshitsweng mo thabeng.”+  Mme gone jaanong Jesu o neilwe kabelo e e gaisang e e neng e neilwe baperesiti ka gonne gape ke motsereganyi+ wa kgolagano e e botoka go gaisa ya pele,+ e go ya ka molao e theilweng mo ditsholofetsong tse di botoka go gaisa tsa pele.+  Fa e le gore kgolagano eo ya ntlha e ne e se na phoso, ya bobedi e ne e ka se tlhokege.+  Gonne o bona batho molato fa a re: “‘Metlha e etla,’ go bua Jehofa,* ‘e mo go yone ke tla dirang kgolagano e ntšha le batho ba Iseraele le batho ba Juda.  Ga e kitla e tshwana le kgolagano e ke neng ka e dira le borraabonemogolo mo letsatsing la fa ke ne ke ba ntsha kwa lefatsheng la Egepeto,+ ka gonne ga ba a ka ba tswelela ba le mo kgolaganong ya me, mo ke neng ka tlogela go ba tlhokomela,’ go bua Jehofa.* 10  “‘Gonne eno ke kgolagano e ke tla e dirang le batho ba Iseraele morago ga metlha eo,’ go bua Jehofa.* ‘Ke tla tsenya melao ya me mo megopolong ya bone, e bile ke tla e kwala mo dipelong tsa bone.+ Ke tla nna Modimo wa bone, mme bone ba tla nna batho ba me.+ 11  “‘Mme mongwe le mongwe ga a kitla a tlhola a ruta motho yo a agileng le ene e bile mongwe le mongwe ga a kitla a tlhola a ruta morwarraagwe, a re: “Itse Jehofa!”* Gonne botlhe ba tla nkitse, go simolola ka yo monnye go fitlha ka yo mogolo. 12  Gonne ke tla ba itshwarela ditiro tsa bone tse di sa siamang, mme ga nkitla ke tlhola ke gakologelwa maleo a bone.’”+ 13  Fa a re “kgolagano e ntšha,” o ne a dira gore ya pele e se ka ya tlhola e dira.+ Jaanong se se dirilweng gore se se ka sa tlhola se dira e bile se le segologolo se tloga se nyelela.+

Dintlha Tse di Kwa Tlase