Bahebera 6:1-20

  • Tswelelang lo gola (1-3)

  • Ba ba tlogelang dithuto tsa boammaaruri ba kokotela Morwa gape mo koteng (4-8)

  • Tlhomamisang tsholofelo ya lona (9-12)

  • Ditsholofetso tsa Modimo di boammaaruri (13-20)

    • Tsholofetso ya Modimo le maikano a gagwe ga di fetoge (17, 18)

6  Ka jalo, e re ka jaanong re setse re ithutile dithuto tsa ntlha+ ka ga Keresete, a re tsweleleng re gola.+ A re se ka ra thaya motheo gape, re boa re ithuta sesha ka ga go ikwatlhaela ditiro tse di se nang mosola, go dumela mo Modimong,  dikolobetso tse di farologaneng le go bewa diatla,+ tsogo ya baswi+ le katlholo ya bosakhutleng.  Mme re tla tswelela re gola, fa Modimo a letla.  Fa e le ba ba neng ba neilwe lesedi+ le mpho e e tswang kwa legodimong e bile ba ne ba neilwe moya o o boitshepo  le ba ba neng ba neilwe lefoko le le molemo la Modimo le masego* a lefatshe le lesha le le tlang,*  mme gone jaanong ba tlogetse dithuto tsa boammaaruri,+ ga re ka ke ra kgona go ba thusa ka gonne ba kokotela Morwa Modimo gape mo koteng e bile ba dira gore batho ba mo sotle.+  Gonne dipula tse di nang kgapetsakgapetsa di tlisetsa mmu masego a a tswang kwa Modimong, ka gonne di nosetsa mmu gore o ntshetse ba ba o lemang dimela.  Le fa go ntse jalo, fa mmu oo o ntsha mmitlwa le mefero ga o na mosola e bile molemi o a o hutsa, mme kwa bofelong o jewa ka molelo.  Le fa gone re bua ka tsela eno baratwa, re tlhatswegile pelo gore lona lo botoka go na le ba ba sa tlholeng ba dumela, le gore lo dira dilo tse di tla dirang gore Modimo a lo boloke. 10  Gonne Modimo ga a tshiamololo mo a ka lebalang tiro ya lona le tsela e lo ratang leina la gagwe ka yone;+ lo bontsha seo ka go direla badumedimmogo le lona* go tla go fitlha jaanong. 11  Le fa go ntse jalo, re eletsa gore mongwe le mongwe wa lona a dire ka natla fela jaaka a ne a dira go tswa kwa tshimologong gore lo letele se lo se solofetseng lo sa belaele sepe+ go fitlha fela kwa bokhutlong.+ 12  Ga re batle gore lo nne ditshwakga,+ mme dirang se se neng sa dirwa ke ba ba neng ba amogela se se solofeditsweng ka gonne ba na le tumelo e bile ba le pelotelele. 13  Gonne fa Modimo a ne a solofetsa Aborahame gore o tla mo segofatsa, o ne a ikana ka ene,* ka gonne go se na ope yo mogolo go mo feta yo a neng a ka ikana ka ene,+ 14  a re: “Ruri ke tla go segofatsa e bile ke tla dira gore losika lwa gago lo nne lontsi.”+ 15  Ka jalo, fa Aborahame a sena go nna pelotelele, o ne a amogela tsholofetso eno. 16  Gonne batho ba ikana ka motho yo mogolo go ba feta, mme maikano a bone a fedisa dikganetsano ka gonne a tlhomamisa se ba se buileng.+ 17  Ka tsela e e tshwanang, fa Modimo a ne a naya baruaboswa ba tsholofetso+ bosupi jo bo tlhatswang pelo jwa gore boikaelelo jwa gagwe ga bo fetoge, o ne a tlhomamisa gore bo tla direga* ka go dira maikano, 18  e le gore ka dilo di le pedi tse di sa fetogeng tse Modimo a ka se kang a aka mo go tsone,+ rona ba re tshabetseng kwa Modimong re tle re kgothadiwe ke go ikanya tsholofelo e e tlhomilweng fa pele ga rona. 19  Tsholofelo+ eno ke tshetledi ya matshelo a rona e e re thusang go nna re nonofile re sa belaele sepe, e bile e re tsenya mo teng ga sesiro,+ 20  kwa Jesu a neng a tsena gone pele ga rona a re bulela tsela e bile a re e baakanyetsa,+ yo gone jaanong e leng moperesiti yo mogolo yo o tshwanang le Melekisedeke ka bosakhutleng.+

Dintlha Tse di Kwa Tlase

Seger., “maatla.”
Seger., “a tsamaiso ya dilo e e tlang.” Bona Ditlhaloso Tsa Mafoko.
Seger., “ka go direla ba ba boitshepo.”
“Go tewa Modimo.”
Seger., “o ne a tsereganya.”