Dipesalema 22:1-31
Go mokaedi wa “Kgama e Namagadi ya Masa.”* Pina ya ga Dafide.
22 Modimo wa me, Modimo wa me, o ntatlhetse eng?+
Ke ka ntlha yang fa o sa tle go mpoloka?
Ke ka ntlha yang fa o sa utlwe selelo sa me sa khutsafalo?+
2 Modimo wa me, ke nna ke go bitsa motshegare, mme ga o nkarabe;+Le bosigo ga ke kgone go didimala.
3 Le fa go ntse jalo, o boitshepo,+O dikologilwe ke* dipako tsa Iseraele.
4 Borraarona ba ne ba go ikanya;+Ba ne ba go ikanya, mme o ne wa nna wa ba golola.+
5 Ba ne ba goela kwa go wena, mme o ne wa ba boloka;Ba ne ba go ikanya, mme ga o a ka wa ba swabisa.*+
6 Mme nna ga ke motho, ke seboko fela,Batho ba nja ditshego* e bile ditšhaba di a nnyatsa.+
7 Botlhe ba ba mponang ba ntshega ka tshotlo;+Ba nteba ka lenyatso e bile ba thukutha ditlhogo tsa bone ba re:+
8 “O ne a ikaegile ka Jehofa. A a mo golole!
A a mmoloke, ka gonne o mo rata thata!”+
9 Ke Wena yo o nketshitseng* mo popelong,+Wena yo o dirileng gore ke ikutlwe ke sireletsegile mo mabeleng a ga mmê.
10 Ke ne ka tlisiwa kwa go wena gore o ntlhokomele* go tloga fa ke tsholwa;Fa e sa le ke tswa mo popelong ya ga mmê, o ntse o le Modimo wa me.
11 O se ka wa nna kgakala le nna, ka gonne mathata a gaufi+Mme ga ke na mothusi ope yo mongwe.+
12 Dipowana tse dintsi di ntikologile;+Dipoo tse di maatla tsa kwa Bashana di ntikologile.+
13 Baba ba me ba nkatlhamoloseditse melomo ya bone,+Jaaka tau e e kurutlang e e gagoganyang se e se tsumileng.+
14 Ke tshololwa jaaka metsi;Marapo a me otlhe a dule mo malokololong a one.
Pelo ya me e ntse jaaka mafura;+E gakologa mo teng ga me.+
15 Ga ke sa tlhole ke na le maatla, ke tshwana le kapetla ya sejana sa letsopa;+Loleme lwa me lo ngaparela magalapa;+O ntsentse mo khuting gore ke swe.+
16 Gonne ke dikologilwe ke dintša;+Di ntikologile jaaka setlhopha sa badirabosula,+Di fa diatleng tsa me le fa dinaong tsa me jaaka tau.+
17 Ke kgona go bala marapo a me otlhe.+
Ba a nteba e bile ba ntlhoma matlho.
18 Ba kgaogana diaparo tsa me,E bile diaparo tsa me ba di tshelela bola.+
19 Mme wena Jehofa, o se ka wa nna o le kgakala.+
Ke wena nonofo ya me; itlhaganelele go nthusa.+
20 Nkgolole mo tšhakeng,Golola botshelo jwa me jo bo tlhwatlhwakgolo* mo maroong* a dintša;+
21 Nkgolole mo molomong wa tau+ le mo dinakeng tsa dipoo tsa naga;Nkarabe mme o mpoloke.
22 Ke tla bolelela bomorwarre leina la gago;+Ke tla go baka mo phuthegong.+
23 Lona ba lo boifang Jehofa, mmakeng!
Lona lotlhe ditlogolwana* tsa ga Jakobe, mo galaletseng!+
Lona lotlhe ditlogolwana* tsa ga Iseraele, mo tlotleng.
24 Gonne ga a ka a amogela e bile ga a ka a itlhokomolosa pogisego ya yo o gatelelwang;+Ga a ka a mo fitlhela sefatlhego.+
Fa a ne a goela kwa go ene a kopa thuso, o ne a mo utlwa.+
25 Ke tla baka Modimo mo phuthegong e kgolo;+Ke tla duela maikano a me fa pele ga ba ba mmoifang.
26 Ba ba pelonolo ba tla ja ba bo ba kgotsofala;+Ba ba batlang Jehofa ba tla mmaka.+
E kete lo ka itumelela go tshela* ka bosakhutleng.
27 Batho botlhe ba ba tswang mo lefatsheng lotlhe ba tla gakologelwa Jehofa ba bo ba boela kwa go ene.
Malapa otlhe a ditšhaba a tla ikoba fa pele ga gago.+
28 Gonne bogosi ke jwa ga Jehofa;+O busa ditšhaba.
29 Botlhe ba ba atlegileng* ba lefatshe ba tla ja e bile ba tla ikoba;Botlhe ba ba fologelang kwa loroleng ba tla khubama fa pele ga gagwe;Ga go na ope wa bone yo o ka bolokang botshelo jwa gagwe.
30 Ditlogolwana* tsa bone di tla mo direla;Kokomana e e tlang e tla bolelelwa ka ga Jehofa.
31 Ba tla tla ba bo ba bua ka tshiamo ya gagwe.
Ba tla bolelela batho ba ba sa ntseng ba tla tsholwa se a se dirileng.
Dintlha Tse di Kwa Tlase
^ Gongwe molodi kgotsa mofuta mongwe wa mmino.
^ Kgotsa “O ntse mo gare ga (mo godimo ga).”
^ Kgotsa “ga o a ka wa ba tlhabisa ditlhong.”
^ Kgotsa “ba a nkgoba.”
^ Kgotsa “nkentshitseng.”
^ Seheb., “ka latlhelwa mo go wena.”
^ Seheb., “jo e leng jone fela,” a raya botshelo jwa gagwe.
^ Seheb., “mo seatleng.”
^ Seheb., “losika.”
^ Seheb., “losika.”
^ Seheb., “E kete pelo ya lona e ka tshela.”
^ Seheb., “ba ba nonneng.”
^ Seheb., “Losika.”
