Dipesalema 55:1-23
Go mokaedi; e opelwe le diletswa tsa megala. Masekile.* Pesalema ya ga Dafide.
55 Ao tlhe Modimo, reetsa thapelo ya me,+Mme o se ka wa itlhokomolosa kopo ya me ya gore o nkutlwele botlhoko.*+
2 Ntheetse ka kelotlhoko mme o nkarabe.+
Go tshwenyega ga me go dira gore ke tlhobaele,+E bile ke tlhakatlhakane maikutlo
3 Ka ntlha ya se mmaba a se buangLe ka ntlha ya kgatelelo e e tswang mo mothong yo o bosula.
Gonne ba mpakela mathata a mantsi,E bile ba setlhogo mo go nna.+
4 Pelo ya me e utlwile botlhoko thata,+Go boifa loso go a mphekeetsa.+
5 Ke welwa ke poifo le go roroma,Mme ke ngangatlelwa ke go tetesela.
6 Ke nna ke re: “E kete nkabo ke na le diphuka jaaka lephoi.
Ke ne ke tla fofa mme ke nne ka pabalesego.
7 Ruri ke ne ke tla fofela kgakala!+
Ke ne ke tla nna kwa nageng.+ (Selah)
8 Ke ne ke tla potlakela kwa lefelong le le sireletsegilengKe tswa mo phefong e e tsubutlang, ke tswa mo setsuatsueng.”
9 Ba tlhakatlhakanye tlhe Jehofa, mme o kgoreletse dithulaganyo tsa bone,*+Gonne ke bone gore go na le thubakanyo le kgogakgogano mo motseng.
10 Ba o dikologa bosigo le motshegare ba le mo godimo ga dipota tsa one;Mo go one go tletse bosula le matshwenyego.+
11 Mo go one go tletse tshenyo;Kgatelelo le tsietso di nna di le mo patlelong ya one.+
12 Gonne ga ke kgobiwe ke mmaba wa me;+Fa e ne e le mmaba, ke ne nka itshokela seo.
Ga ke a tlhaselwa ke sera sa me;Go seng jalo nkabo ke mo iphitlhetse.
13 Mme ke wena, motho yo o tshwanang le nna,*+Tsala ya me e ke e itseng sentle.+
14 Re ne re le ditsala tse di utlwanang thata;Re ne re tle re tsamaye le batho ba bantsintsi re ya kwa ntlong ya Modimo.
15 E kete ba ka senngwa!+
A ba fologele mo Lebitleng* ba ntse ba tshela;Gonne bosula bo agile le bone e bile bo mo go bone.
16 Mme nna, ke tla biletsa kwa Modimong,Mme Jehofa o tla mpoloka.+
17 Maitseboa le mo mosong le motshegare, ke a tshwenyega e bile ke lela selelo sa kutlobotlhoko,*+Mme o utlwa lentswe la me.+
18 Modimo o tla nkgolola* mo go ba ba tlhabanang le nna a bo a nnaya kagiso,Gonne batho ba bantsintsi ba ntlhasetse.+
19 Modimo o tla ba utlwa a bo a ba araba,+Ene yo o ntseng mo setulong sa bogosi go tswa bogologolong.+ (Selah)
Ba ba sa boifang Modimo,+Ba tla gana go fetoga.
20 O* tlhasetse ba ba nnang le ene ka kagiso;+O tlodile kgolagano ya gagwe.+
21 Mafoko a gagwe a borethe go gaisa botoro,+Le fa go ntse jalo, o eletsa ntwa.
Mafoko a gagwe a boleta go gaisa leokwane,Le fa go ntse jalo, ke ditšhaka tse di somotsweng.+
22 Latlhela mokgweleo wa gago mo go Jehofa,+Mme o tla go tshegetsa.+
Le ka motlha ga a kitla a letlelela mosiami go wa.*+
23 Mme wena Modimo, o tla ba folosetsa mo khuting e e kwa tengteng.+
Batho bao ba ba nang le molato wa madi le ba ba tsietsang ba tla swa ba sa ntse ba le basha.+
Mme fa e le nna, ke tla go ikanya.
Dintlha Tse di Kwa Tlase
^ Bona Ditlhaloso Tsa Mafoko.
^ Kgotsa “Mme o se ka wa iphitlha fa ke rapelela gore o nthuse.”
^ Seheb., “o kgaoganye loleme lwa bone.”
^ Kgotsa “monna yo o lekanang le nna.”
^ Kgotsa “Sheole.” Bona Ditlhaloso Tsa Mafoko.
^ Kgotsa “ke a tlalelwa.”
^ Seheb., “nthekolola.”
^ Go tewa motho yo e kileng ya bo e le tsala le Mopesalema yo o umakiwang mo temana 13 le 14.
^ Kgotsa “thetheekela; reketla.”
