Zistwar 97

Jésus Vini Antan Ki Lerwa

ENN tigit letan apre ki Jésus inn geri sa de mandian aveg la, li vinn dan enn ti vilaz pre ar Jérusalem. Li dir de parmi so bann disip: ‘Al dan vilaz ek zot pou trouv enn zenn bourik. Larg li ek amenn li pou mwa.’

Kan zot amenn sa bourik-la, Jésus asiz lor la ek li al Jérusalem, ki pa ti tro lwin. Kan li ariv pre ar lavil, enn gran lafoul sorti pou zwenn li. Laplipar parmi zot tir zot manto ek tal sa lor semin. Lezot koup bann brans palmie. Zot met sa osi lor semin, lerla zot kriye: ‘Bondie beni sa lerwa ki’nn vinn o-nom Jéhovah la!’

Bien lontan dan Israël bann nouvo lerwa ti rant dan Jérusalem lor enn zenn bourik pou prezant zotmem devan lepep. Se seki Jésus fer. Ek lepep pe montre ki zot anvi ki Jésus vinn zot lerwa. Me pa tou dimounn ki anvi sa. Nou kapav trouv sa par seki arive kan Jésus al dan tanp.

Dan tanp, Jésus geri bann dimounn ki aveg ek ki andikape. Kan bann ti zanfan trouv sa, zot kriye for-for pou donn Jésus loner. Me sa fer bann pret bien ankoler, ek zot dir Jésus: ‘Eski to tande ki bann zanfan pe dir?’

Jésus reponn: ‘Wi. Eski zame zot inn lir sa dan Labib: “Dan labous bann ti zanfan, Bondie pou fer bann louanz sorti?”’ Alor, bann zanfan kontign loue lerwa ki Bondie inn swazir.

Nou anvi resanble sa bann zanfan-la, pa vre? Sertin dimounn kitfwa pou esey anpes nou koz lor rwayom Bondie. Me nou pou kontign dir lezot bann kitsoz extraordiner ki Jésus pou fer pou bann dimounn.

Kan Jésus ti lor later pa ti ankor ariv ler pou li koumans dirize kouma lerwa. Kan sa pou arive? Bann disip Jésus anvi kone. Nou pou lir lor la dan prosin zistwar.

Matthieu 21:1-17; Jean 12:12-16.