Zistwar 46

Bann Miray Jéricho

KI PE fer sa bann miray Jéricho la tonbe? Koumadir enn gro bom inn tom lor zot. Me dan sa lepok-la pa ti ena bom; zot mem pa ti ena fizi. Sa se enn lot mirak ki Jéhovah inn fer! Anou aprann kouma sa inn arive.

Ekout seki Jéhovah dir Josué: ‘Twa ek to bann solda bizin fer letour lavil. Fer so letour enn fwa par zour pandan sis zour. Sarye lars lalians ar zot. Set pret bizin mars devan li ek sonn zot tronpet.

‘Setiem zour zot bizin fer letour lavil set fwa. Lerla, fer zot sonn zot tronpet pli lontan, ek pous enn gran kri lager. Ek bann miray pou tonbe anplas!’

Josué ek lepep fer seki Jéhovah dir. Pandan ki zot marse, zot tou res trankil. Personn pa dir enn mo. Tann zis bann dimounn pe marse ek son bann tronpet. Sirman ki pep Jéricho, bann lennmi Bondie, ti pe gagn per. Eski to kapav trouv sa lakord rouz ki pe apandan ar lafnet la? Kisannla so lafnet sa? Rahab inn fer seki sa de espion-la inn dir li fer. Ansam avek li, tou so fami pe gete ki pe pase.

Alafin, kan inn ariv setiem zour, apre ki zot fer letour lavil set fwa, tann bann tronpet, bann zom lager solda ek miray tonbe. Lerla Josué dir: ‘Touy tou dimounn dan lavil ek bril li. Bril tou kitsoz. Gard zis larzan, lor, kwiv, ek feray ek met zot dan trezor latant Jéhovah.’

Josué dir sa de espion-la: ‘Al dan lakaz Rahab ek fer li ek so fami sorti.’ Rahab ek so fami gagn lavi sov parey kouma bann espion ti promet li.

Josué 6:1-25.