Taga a kɔnɔkow lajɛ

Taga a kɔnɔnakow lajɛ

 SAPITIRI 77NAN

Yezu be mɔgɔw ladi nafolo koo la

Yezu be mɔgɔw ladi nafolo koo la

LUKA 12:1-34

  • YEZU KA NTALEN KUMA NAFOLOTIGI DƆ KOO LA

  • YEZU BE KUMA KƆNƆW NI BINFEERENW KOO LA

  • “SAGAKULUFITINI” DƆ BENA KƐ MASAYA LA

Ka Yezu to dumuni na Fariziɲɛcɛ ka soo, mɔgɔ waa caaman b’a kɔnɔna kɛnɛma. O koo ɲɔgɔn delila k’a sɔrɔ Galile mara la (Mariki 1:33; 2:2; 3:9). Yan, Zude mara la, mɔgɔ caaman b’a fɛ k’a ye ani k’a lamɛn. O b’a yira k’u be dan na pewu ni Fariziɲɛw ye, u minw ni Yezu be dumuni na.

Yezu be kɔn ka kuma dɔ fɔ a ka kalandenw ye, o min kɔrɔ ka bon. A ko: “Aw k’aw yɛrɛ kɔlɔsi Fariziɲɛw ka burufununan ma, min ye filankafɔya ye.” Yezu tun kɔnna k’o lasɔmini kumaw fɔ. Nka, koo min kɛra dumuni tuma na Fariziɲɛcɛ ka soo, o y’a to Yezu segira o kumaw kan (Luka 12:1; Mariki 8:15). N’a sɔrɔ Fariziɲɛw b’u yɛrɛ kɛ Ala ɲɛsiranbagaw ye walisa mɔgɔw kana bɔ u ka juguya kala ma. Nka a ka ɲi mɔgɔw ka bɔ u kala ma. Yezu y’a fɔ ko: “Fɛndogonin si te yen min tena ye. Gundo si te yen min tena bɔ kɛnɛ kan.”—Luka 12:2.

Mɔgɔ minw lajɛnnin lo Yezu kɔrɔ, n’a sɔrɔ u caaman ye Zudekaw ye minw ma sababu sɔrɔ k’a lamɛn Galile. O kama, a tun ye kuma minw fɔ ka tɛmɛ, a segira o miiriya jɔnjɔnw kan. A ye bɛɛ jija ko: “Minw be mɔgɔ faga n’u te se ka dɔ wɛrɛ kɛ a la o kɔ, aw kana siran olu ɲa.” (Luka 12:4). I ko a tun delila k’a fɔ, a b’a fɔ k’a gwɛlɛya a ka kalandenw ye k’u ka la a la ko Ala bena u mako wasa. Ka fara o kan, u ka ɲi k’a yira mɔgɔw ɲɛ na k’u ye Mɔgɔ Dencɛ ka kalandenw ye ani k’a lɔn ko Ala be se k’u dɛmɛ.—Matiyo 10:19, 20, 26-33; 12:31, 32.

O tuma na, cɛɛ dɔ y’a kaan to Yezu ma jama cɛma ko: “Karamɔgɔ, a fɔ n kɔrɔcɛ ye ko a k’a to an b’an faa cɛɛn tilan.” (Luka 12:13). Ka kɛɲɛ ni Ala ka sariya ye, dencɛkɔrɔba lo ka ɲi ka cɛɛn ninyɔrɔ fila sɔrɔ. O la do, sɔsɔli tun man kan ka sɔrɔ o la (Deteronɔmu 21:17). A be komi o cɛɛ ka ninyɔrɔ m’a ɲɛɛ fa. Yezu ma sɔn k’a daa don o koo la. A ye cɛɛ ɲininga ko: “Cɛɛ, jɔn ye ne sigi ka kɛ aw ka koow kititigɛla ye? Walima ka kɛ aw ka cɛɛn tilanbaga ye?”—Luka 12:14.

O kɔ, Yezu ye jama bɛɛ lasɔmi ko: “Aw k’aw yɛrɛ kɔlɔsi nafoloko hamikojugu ma, bari hali ni nafolo ka ca mɔgɔ fɛ cogo o cogo, o te se ka kɛ a tigi nii suturanin ye.” (Luka 12:15). Mɔgɔ mana kɛ nafolotigi ye cogo o cogo, a be laban ka sa k’a ka nafolo to yen. Yezu y’a ka kumaw walawala ntalen barikaman dɔ fɛ min b’a yira fana ko a kɔrɔtanin lo an ka kɛ ni tɔgɔ ɲuman ye Ala ɲɛɛ kɔrɔ. A ko:

“Cɛ nafolotigi dɔ ka sɛnɛ diyara kosɛbɛ. A y’i miiri ko: ‘Ne na mun kɛ sa, katuguni ne ka suman bɛɛ lasagon yɔrɔ tɛ yen?’ A ko: ‘A filɛ, ne na nin de kɛ. Ne na ne ka jiginɛw ci ka dɔ wɛrɛw jɔ ka u boɲa fɔlɔ taw ye. Ne na ne ka suman ni ne bolo fɛnw bɛɛ lajɛ u kɔnɔ. O kɔ, ne n’a fɔ ne yɛrɛ ye ko fɛn caman maralen bɛ ne ye san caman ɲɛ. Ne na ne lafiya, ka dumuni kɛ ka minni kɛ ka n’ ɲɛnajɛ.’ Nka Ala y’a fɔ a ye ko: ‘Nalonma! Bi su fɛ i ni na minɛ i la. O tuma la, i ye nin fɛn minw lajɛ, olu dun na kɛ jɔn ta ye?’ Ayiwa mɔgɔ o mɔgɔ bɛ nafoloba lajɛ a yɛrɛ diyanyekow kama, k’a sɔrɔ a tɛ nafolotigi ye Ala ta fan fɛ, o bɛ ten.”—Luka 12:16-21, ABM.

Nafolo nege tun be se ka kɛ jaan ye Yezu ka kalandenw ni a lamɛnbaga tɔɔw fɛ. Wala duniɲa nin ka haminankow be se k’u fari faga Jehova ka baara la. O kama, Yezu tun ye ladili ɲuman min di mɔgɔw ma kulu kan a saan kelen ni tilan ye nin ye, a segira o kan.

A ko: “Aw kana hami aw ka baloko la ko aw bena mun dumu? Aw kana hami aw ka fɛɛrɛbɔko la, ko aw bena mun don? . . . Aw ye kaankaanw ka koo jati k’a filɛ. U te danni kɛ, u  te suman tigɛ. Bondo t’u fɛ. Nga Ala b’u balo. Aw man fisa ni kɔnɔw ye pewu wa? . . . Aw ka binfeerenw ka cɛɲa filɛ. U te baara kɛ, u te kɔɔri fana parata. Ne b’a fɔ aw ye ko masacɛ Solomani n’a ka faamaya bɛɛ, a ma fani sɔrɔ min ka cɛɲa ye feeren nunu ta bɔ. . . . Aw bena fɛɛn min dumu, walima aw bena fɛɛn min min, aw kana aw hakili ɲagami o sɔrɔko la. . . . Aw Faa b’aw makoyafɛnw lɔn. . . . Aw ka Ala ka masaya ɲini fɔlɔ, n’o kɛra, Ala bena fɛɛn tɔw d’aw ma.”—Luka 12:22-31; Matiyo 6:25-33.

Minw bena Ala ka Masaya ɲini fɔlɔ, olu ye jɔn lo ye? Yezu y’a yira ko mɔgɔ damanin lo bena o kɛ. O mɔgɔ limaniyaninw lo ye “sagakulufitini” ye. Kɔfɛ, Ala nana a yira k’o mɔgɔw hakɛ ye 144000 ye. Olu bena mun lo sɔrɔ ka bɔ Ala fɛ? Yezu y’u jigi sigi ko: “A diyara aw Faa ye k’a ka masaya d’aw ma.” O mɔgɔw tɛna duniɲa nin nafoloko kɛ u ɲɛnako fɔlɔ ye. Soonw be se k’o sonya. Nka “nafolo min be Ala fɛ sankolo la,” u ka miiriya bɛɛ bena kɛ o le kan, o min ye ka Masaya kɛ ni Krista ye.—Luka 12:32-34.