Taga a kɔnɔkow lajɛ

Taga a kɔnɔnakow lajɛ

 SAPITIRI 68NAN

Ala Dencɛ ye “diɲɛ ka yeelen” ye

Ala Dencɛ ye “diɲɛ ka yeelen” ye

ZAN 8:12-36

  • YEZU B’A YIRA DENCƐ YE MƆGƆ MIN YE

  • KƆRƆ JUMAN NA YAHUTUW YE JƆƆNW YE?

An be Gwatakɔrɔsigi seli laban loon na, o kɔrɔ a loon wolonfilanan na. Yezu be mɔgɔw kalanna Alabatosoba kɔnɔ, o yɔrɔ min be weele ko “Nafolo marayɔrɔ.” (Zan 8:20; Luka 21:1). A be komi o ye Musow ka Lukɛnɛ ye, yɔrɔ min na mɔgɔw b’u ka niliw bila.

Sufɛ, fɛti wagati la, yeelenba b’o yɔrɔ la sabu fitinɛ belebeleba naani mananin lo yen. O fitinɛ kelen kelen bɛɛ be ni tuludaga belebeleba naani ye. O yeelen barika ka bon sabu a be se fɔɔ yɔrɔjan na. Yezu bena min fɔ sisan, n’a sɔrɔ o b’a lamɛnbagaw hakili jigi o yeelen koo la. A y’a fɔ ko: “Ne ye diɲɛ ka yeelen ye. Ni mɔgɔ min sɔnna ne ma, o tigi tena taama dibi la. A bena to yeelen na min be taga don sini hɛrɛ yɔrɔ la [a bena ɲɛnamaya yeelen sɔrɔ].”—Zan 8:12.

Fariziɲɛw y’a sɔsɔ ko: “E b’i yɛrɛ koo fɔra sisan kɛ, tiɲɛ te i ka fɔta nin na.” Yezu y’u jaabi ko: “Ayiwa, ne be n yɛrɛ koo fɔ, ne be tiɲɛ le fɔra, bari ne be n bɔyɔrɔ lɔn ka n taayɔrɔ lɔn. K’a sɔrɔ aw te ne bɔyɔrɔ lɔn, aw te n taayɔrɔ lɔn fana.” A y’a fara a kan ko: “A yɛrɛ fɔra aw ka sariya la ko ni mɔgɔ fila ka seereya bɛnna ɲɔgɔn ma, o ye tiɲɛ tigitigi ye. Ne be n yɛrɛ koo fɔ, ani Faa min ye ne ci, ale ye ne seere ye fana.”—Zan 8:13-18.

Fariziɲɛw banna a ka kuma na, ani u ko: “E Faa nin be min?” Yezu sinna k’u jaabi ko: “Aw te ne lɔn, aw te n Faa fana lɔn. N’aw tun be ne lɔn, aw tun bena n Faa fana lɔn.” (Zan 8:19). Hali ni Fariziɲɛw b’a fɛ ka Yezu minɛ, mɔgɔ si tɛ sɔn ka maga a la.

Yezu y’a fɔ u ye tugun ko: “Ne be taga, aw bena ne yɔrɔ ɲini ka dɛsɛ, aw bena sa aw ka hakɛw la. Ne be tagara yɔrɔ min na, aw te se ka taga yen.” U ma Yezu ka kuma kɔrɔ faamu hali dɔɔni. O kama, u y’a fɔ ɲɔgɔn ye ko: “N’a  sɔrɔ a b’a fɛ k’a yɛrɛ faga le, bari a b’a fɔra ko ale bena taga yɔrɔ min na, ko an te se ka taga yen.” U ma Yezu ka kuma faamu sabu u t’a bɔyɔrɔ lɔn. Yezu y’a ɲɛfɔ u ye ko: “Aw ye dugukolo kan mɔgɔw ye, nga ne bɔra sankolo la. Aw ye diɲɛ nin mɔgɔw ye. Nga, ne te yan mɔgɔ ye.”—Zan 8:21-23.

Yezu kaan be min ma, o ye ko a tun be ɲɛnamaya la sankolo la ka sɔrɔ ka wolo adamaden cogo la. Ani fana, ale lo ye Masiya (wala Krista) ye, layidu tara min koo la, diinan kuntigiw tun ka ɲi ka min makɔnɔ. O bɛɛ n’a ta, u y’a mafiɲɛya k’a ɲininga ko: “E ye jɔn ye?”—Zan 8:25.

Komi u ma sɔn a ta ma, Yezu y’u jaabi ko: “Mun na ne yɛrɛ be kumana aw fɛ?” A ye u hakili sama ka taga Faa kan ani a y’a ɲɛfɔ fɛɛn min kama u ka ɲi k’a Dencɛ lamɛn. A ko: “Ne Cibaga ye tiɲɛntigi ye. Ani ne ye min mɛn ale fɛ, ne b’o lo fɔ duniɲa na.”—Zan 8:25, 26, NW.

O kɔ, Yezu y’a yira ko a jigi lanin b’a Faa kan, Yahutuw banna k’u jigi la min kan. A ko: “N’aw ye Mɔgɔ Dencɛ kɔrɔta sanfɛ ka ban tuma min na, ne ye min ye, aw bena o lɔn, ko ne te foyi kɛ n yɛrɛ ma. N Faa ye min fɔ n ye, ne b’o le fɔ. Ne cibaga be ni ne ye. A ma ne to n kelen, bari min ka d’a ye, ne be o le kɛ tuma bɛɛ.”—Zan 8:28, 29.

Yahutu dɔw kɔni limaniyanin lo Yezu la. A y’a fɔ olu ye ko: “N’aw ye ne ka kuma bato, aw be kɛ n ka kalandenw ye tiɲɛ na. O la, aw bena tiɲɛ lɔn, o tiɲɛ le bena aw kɛ hɔrɔnw ye.”—Zan 8:31, 32.

O kumaw ye dɔw kabakoya. U ye Yezu sɔsɔ ko: “Anw ye Ibrayima deenw ye. An ma deli ka kɛ mɔgɔ si ka jɔɔn ye. I be se k’a fɔ cogo di ko an bena kɛ hɔrɔnw ye?” Yahutuw b’a lɔn ko siya wɛrɛw y’u mara galen, nka u tɛ sɔn a ma k’u kɛra u ka jɔɔnw ye. Nka, Yezu y’a fɔ ka gwɛ k’u ye jɔɔnw ye. A y’a fɔ u ye ko: “Tiɲɛ tiɲɛ na, mɔgɔ o mɔgɔ be hakɛ kɛ, o tigi ye hakɛ ka jɔɔn le ye.”—Zan 8:33, 34.

Yahutuw kɛtɔ ka ban ko u tɛ jurumu ka jɔɔnw ye, u b’u yɛrɛ bila farati la. Yezu y’a ɲɛfɔ u ye ko: “Jɔɔn te jati a kuntigi ka somɔgɔw dɔ ye, nga a kuntigi deen jatinin lo tuma bɛɛ.” (Zan 8:35). Jɔɔn tɛ cɛntala ye ani u be se k’a gwɛn ka bɔ soo tuma bɛɛ. Sotigi ka deen wala a lamɔden dɔrɔn lo be to soo “tuma bɛɛ,” o kɔrɔ, a sii bɛɛ la.

O kama, kalan min ye tiɲɛn ye Dencɛ koo la, o lo be mɔgɔ hɔɔrɔnya ka bɔ jurumu na: jurumu min be na ni saya ye. Yezu y’a ɲɛfɔ u ye ko: “N’o Deen nin y’aw hɔrɔnya, a be kɛ hɔrɔnya dafanin ye.”—Zan 8:36.