Taga a kɔnɔkow lajɛ

Taga a kɔnɔnakow lajɛ

 SAPITIRI 103NAN

Yezu be Alabatoso saniya kokura

Yezu be Alabatoso saniya kokura

MATIYO 21:12, 13, 18, 19 MARIKI 11:12-18 LUKA 19:45-48 ZAN 12:20-27

  • YEZU BE TOROSUN DƆ DANGA ANI A BE ALABATOSOBA SANIYA

  • FƆƆ YEZU KA SA WALISA KA NIIN DI MƆGƆ CAAMAN MA

Yezu n’a ka kalandenw ye suu saba lo kɛ Betani kabini u bɔra Zeriko. Sisan, ntɛnɛlon sɔgɔmada joona, Nisankalo tile 10nan na, u ye Zeruzalɛmu sira minɛ. Kɔngɔ be Yezu la. A ye torosun dɔ ye, a gwɛrɛla a la. Yala deen b’a la wa?

Marisikalo sara ani toro wagati be daminɛ fɔɔ zuwɛnkalo la. Nka, o torosun fiyelenna joona. O kama Yezu tun b’a miiri ko n’a sɔrɔ a denna. Nka a y’a ye ko deen foyi t’a la. O torosun nɛrɛnin ye mɔgɔw lafili. O kama Yezu ko: “Mɔgɔ si tena i deen dumu tugu abada.” (Mariki 11:14). O yɔrɔnin bɛɛ, yiri y’a daminɛ ka ja. Yezu kɛtɔ k’o yiri danga, a ka kalandenw bena o kɔrɔ faamu o dugusagwɛ sɔgɔma le.

Dɔɔni o kɔ, Yezu n’a ka kalandenw sera Zeruzalɛmu. A tagara Alabatosoba la, a tun y’o min sɛgɛsɛgɛ kunu tilefɛ. Nka bi, a tɛ dan batosoba sɛgɛsɛgɛri dɔrɔn ma. A tun ye koo min kɛ a saan saba ye nin ye, saan 30 ka Tɛmɛnkan seli tuma na, a b’o ɲɔgɔn lo kɛ (Zan 2:14-16). Sisan ta la, Yezu ye ‘jagokɛlaw ni sannikɛlaw gwɛn ka bɔ Alabatosoba kɔnɔ.’ A ye “warifalenbagaw ka tabaliw ni tubani feerebagaw ka sigilanw ɲɔti k’u benben” fana (Mariki 11:15). A yɛrɛ t’a to mɔgɔw ka Alabatosoba lukɛnɛ cɛtigɛ n’u ka minanw ye walisa ka taga dugu faan wɛrɛ la.

Mun na Yezu y’a cɛsiri k’o jagokɛlaw gwɛn ka bɔ Alabatosoba kɔnɔ? A ko: “A fɔra Ala ka kuma na ko: ‘Ne ka soo bena kɛ siyaw bɛɛ ka daalilikɛyɔrɔ ye.’ Nga aw kɔni y’a kɛ soonw ka yɔrɔ ye.” (Mariki 11:17). Yezu y’u suma ni soonw ye sabu minw mako b’a la ka bɛgɛnw san walisa ka saraka bɔ, o jagokɛlaw b’o mɔgɔw waajibiya k’u san sɔngɔ gwɛlɛ na. Yezu y’o koo jati nanbara wala soɲɛni lo ye.

Yezu ye min kɛ, sarakalasebagaw kuntigiw, sariya karamɔgɔw ani kuntigi tɔɔw y’o mɛn. U ye Yezu fagako ɲaɲini kokura. Nka, u m’a lɔn u bena kɛ cogo min na ka Yezu sɔrɔ sabu mɔgɔw be na caaman k’a ka kalan lamɛn.

Minw wolola Yahutu ye ani minw fana tuubira ka don Yahutu diinan na, u nana Tɛmɛkan seli la. Grɛkiw fana tun be yen. U gwɛrɛla Filipu la k’a fɔ a ye k’u b’a fɛ ka Yezu ye. U gwɛrɛla ale lo la sabu n’a sɔrɔ a tɔgɔ tun ye Grɛki tɔgɔ ye. N’a sɔrɔ Filipu y’a ye k’o ɲɔgɔnye tɛna bɛn Yezu ma. O kama, a tagara kuma Andere fɛ. U fila bɛɛ tagara kuma Yezu fɛ. N’a sɔrɔ Yezu bele tun be Alabatosoba kɔnɔ.

Yezu b’a lɔn ko a bena sa yanni tile damanin. O kama, minw be ɲɛnagwɛlɛya kɛ, a t’a fɛ k’a ka wagati tiɲɛ k’olu nege wasa wala ka tɔgɔba ɲini. A ye ntalen dɔ la ka ciden fila nunu jaabi. A ko: “Mɔgɔ Dencɛ ka kan ka boɲa sɔrɔ waati min na, o le sera sisan. Tiɲɛ tiɲɛ na, ne b’a fɔ aw ye ko ni sumankisɛ ma toli dugukolo la, a be to a kelen, nga n’a tolila, o tuma na a be se ka kisɛ caaman kɛ.”—Zan 12:23, 24.

Alikama kisɛ kelen be komi nafa t’a la. Nka n’u y’a dan ani a kisɛlaman “sara,” a be se ka falen ani ka bonya ka kisɛ caaman kɛ. O cogo kelen na, Yezu kelen lo ye cɛɛ dafanin ye. Nka, a kɛtɔ ka kantigiya kɛ Ala ye fɔɔ ka taga se saya ma, a bena kɛ sababu ye mɔgɔ caaman be ɲɛnamaya banbali sɔrɔ n’u y’a yira k’u be ni Yezu ka yɛrɛsaraka miiriya ɲɔgɔn ye. O kama Yezu y’a fɔ ko: “Mɔgɔ min b’a fɛ k’a nii kisi, o tigi bena bɔnɔ, ni mɔgɔ min t’a nii jati diɲɛ kɔnɔ, o tigi bena nii [ɲɛnamaya] banbali sɔrɔ.”—Zan 12:25.

Yezu tɛ miirila ale yɛrɛ dɔrɔn koo la. O kama a y’a fɔ ko: “Ni mɔgɔ min b’a fɛ ka baara kɛ ne ye, o tigi ka tugu ne kɔ, ne be yɔrɔ min na, ne ka  baarakɛlaw fana bena kɛ o yɔrɔ le la. Ni mɔgɔ min be baara kɛ ne ye, n Faa bena boɲa la o tigi kan.” (Zan 12:26). Nin ye sara ɲuman ye dɛ! Faa be bonya la minw kan, olu bena kɛ Krista ka jɛnɲɔgɔnw ye Ala ka Masaya la.

Yezu b’a lɔn tɔɔrɔw ani sayako jugu min b’a kɔnɔna. O kama a y’a fɔ ko: “Sisan ne nii tɔɔrɔnin lo, ne bena mun le fɔ? N Faa, k’a fɔ ko i ka ne kisi nin waati tɔɔrɔ ma wa?” Ala ye Yezu ci kuun min kama, Yezu t’a fɛ k’a kuun bɔ o la. A yɛrɛ y’a fɔ ko: “Nga ne nakun le y’o ye.” (Zan 12:27). Yezu sɔnna Ala ka laɲinitaw bɛɛ ma, hali ale yɛrɛ ka saraka..