Taga a kɔnɔkow lajɛ

Taga a kɔnɔnakow lajɛ

 SAPITIRI 37NAN

Yezu ye firiyamuso dɔ dencɛ suu kunu

Yezu ye firiyamuso dɔ dencɛ suu kunu

LUKA 7:11-17

  • SUKUNUNI NAYIN DUGU KƆNƆ

Yezu ye sɔrɔdasiw kuntigi ka baaraden kɛnɛya. Dɔɔni o kɔ, a bɔra Kapɛrnaum ka taga Nayin dugu la. O dugu be sɔrɔ tileben ni worodugu cɛ ani kilomɛtɛrɛ 32 lo be a ni Kapɛrnaum cɛ. Yezu tun t’a kelen. A ka kalandenw ni jamaba dɔ tugura a kɔ ka taga. Tuma min na u surunyana Nayin dugu donda la, a be komi suu tun be ɲini ka ko. O yɔrɔ la, u ye Yahutu caaman kunbɛn u be tagara kanbelenin dɔ suu donyɔrɔ.

O kanbele bamuso dusu kasinin lo ka tɛmɛ bɛɛ kan. O muso ye firiyamuso ye ani sisan, dencɛ kelenpe min tun b’a fɛ, o fana sara. A cɛɛ sanin kɔ, a tora n’a dencɛ kanulen ye. Miiri k’a filɛ o deen koo tun ka gwɛlɛ a ma cogo min na. A jigi tun lanin b’ale lo kan walisa k’a makoɲɛfɛnw sɔrɔ. Nka sisan, ale fana sara. Jɔn lo bena to n’a ye ani k’a ladon?

O muso dusu kasinin lo kosɔbɛ sabu gwɛrɛgwɛrɛko y’a sɔrɔ. Yezu y’o muso ye tuma min na, a hinɛ y’a minɛ. Yezu kumana a fɛ ni ɲumanya ni dususuman ye walisa k’a hakili sigi. A y’a fɔ a ye ko: “Kana kasi tugu.” Nka, a ma dan o dɔrɔn ma. Suu tun lanin be fɛɛn min kan, Yezu gwɛrɛla ka maga o la (Luka 7:13, 14). Yezu ka kokɛcogo y’a to sutabagaw lɔra. N’a sɔrɔ mɔgɔ caaman y’u yɛrɛ ɲininga ko: “Mun na a y’o fɔ ani a b’a fɛ ka mun lo kɛ?”

Yezu tagamaɲɔgɔnw fana ye mun lo miiri? Yezu tun ye kabako dɔw kɛ ka banabagatɔ caaman kɛnɛya u ɲɛɛ na. Nka, a be komi Yezu ma deli ka suu kunu u ɲɛɛ na fɔlɔ. Tiɲɛn lo ko wagatijan tɛmɛninw na, mɔgɔ dɔw ye suuw kunu. Nka, yala Yezu be se k’o ɲɔgɔn kɛ wa? (1 Masacɛw 17:17-23; 2 Masacɛw 4:32-37). Yezu ko: “Kamalen, ne b’a fɔ i ye, wuli!” (Luka 7:14, ABM). A ye min fɔ, o lo kɛra. Kanbele wulila ka sigi ani a y’a daminɛ ka kuma. Yezu y’a di a bamuso ma. A bamuso kabakoyara ani a ninsɔndiyara kosɔbɛ! A tɛna to a kelen tugun.

Jama y’a ye ko kanbele kununa ka bɔ saya la minkɛ, u y’a daminɛ ka niin Dibaga Jehova tando ko: “Kiraba wilila an cɛma.” Yezu ye  kabako min kɛ, dɔw y’o faamu ani u y’a fɔ ko: “Ala sɔnna k’a ka jama ɲafilɛ.” (Luka 7:16). O koo kibaro jɛnsɛnna joona joona Nayin gɛrɛfɛ duguw la ani a be komi a sera Yezu wolodugu la, Nazarɛti. Kilomɛtɛrɛ 10 lo be Nayin ni Nazarɛti cɛ. O kabako kibaro jɛnsɛnna ka se fɔɔ worodugu fan fɛ, Zuda mara la.

Zan Batizelikɛla bele tun be kaso la. Yezu tun be koo minw kɛra, a tun ka di Zan ye kosɔbɛ k’o kibaro mɛn. Zan ka kalandenw ye Yezu ka kabakow lakali a ye. A ye mun lo kɛ do?