Taga a kɔnɔkow lajɛ

Taga a kɔnɔnakow lajɛ

 SAPITIRI 35NAN

Yezu ye kalanba min kɛ kulu kan

Yezu ye kalanba min kɛ kulu kan

MATIYO 5 :1–7:29 LUKA 6:17-49

  • YEZU YE KALAN MIN KƐ KULU KAN

Yezu ye suu kuru bɛɛ kɛ delili la ani o kɔ, a y’a ka ciden 12 sugandi. N’a sɔrɔ a sɛgɛnnin lo. Dugu gwɛra, nka fanga bele b’a la ani a b’a fɛ ka mɔgɔw dɛmɛ. A y’o lo kɛ Galile kulu kan. N’a sɔrɔ o yɔrɔ man jan Kapɛrnaum na, yɔrɔ min na a b’a ka baara fanba kɛ.

Jama bɔra yɔrɔjan ka na a fɛ. Dɔw bɔra worodugu fan fɛ, Zeruzalɛmu ani dugu wɛrɛw la Zude mara la. Dɔ wɛrɛw bɔra Tiri ani Sidɔn dugubaw la minw be kɔgɔjida la, saheli fan fɛ. Mun na u be Yezu ɲinina do? U b’a yɔrɔ ɲinina walisa k’a “ka kuma lamɛn ani a ka u kɛnɛya.” Yezu y’o lo kɛ jaatika. A y’u “bɛɛ kɛnɛya.” Miiri k’a filɛ! Banabagatɔw bɛɛ kɛnɛyara. “Minw tɔɔrɔnin tun be jinaw bolo,” Yezu y’u fana kɛnɛya. O jinaw ye mɛlɛkɛ juguw ye, Sutana kɔmɔgɔw lo.—Luka 6:17-19.

O kɔ, Yezu ye kɛnɛba dɔ yaala kulu kan, ani jama lajɛnna yen k’a lamini. N’a sɔrɔ a ka kalandenw n’a ka cidenw 12 b’a gɛrɛfɛ. Bɛɛ b’a fɛ k’o karamɔgɔ ka kalanw lamɛn, see be min ye ka kabakow kɛ. Yezu ye kalan dɔw kɛ min y’a lamɛnbagaw nafa kosɔbɛ. Kabi o wagati, o kalanw ye mɔgɔ caaman wɛrɛw nafa fana. U be se ka an fana nafa. Mun na do? Sabu hali n’o kalanw ka dun, Yezu y’u ɲɛfɔ ka gwɛ cogo nɔgɔman na. A ye ɲɛyirali minw ta, u ɲɛsinna mɔgɔw ka loon o loon ɲɛnamaya koow ma. O kama, mɔgɔ minw bɛɛ b’a fɛ k’u ka ɲɛnamaya kɛcogo fisaya ani k’u koo diya Ala ye, olu be se k’o kalanw faamu. O kalanw yɔrɔ jɔnjɔn jumanw lo y’a to u nafa ka bon ten?

JƆN LO BE HƐƐRƐ LA TIƝƐN NA?

Bɛɛ b’a fɛ ka kɛ hɛɛrɛ la. Yezu b’o kala ma minkɛ, a y’a daminɛ k’a ɲɛfɔ mɔgɔ minw be hɛɛrɛ la tiɲɛn na. Miiri k’a filɛ, a lamɛnbagaw y’u mako don o kalan na cogo min na. Nka, n’a sɔrɔ o kalan yɔrɔ dɔw y’u kabakoya.

Yezu y’a fɔ ko: “Mɔgɔ minw b’a lɔn k’u mako be Ala la, olu dagamunin lo, bari sankolo masaya ye u ta ye. Mɔgɔ minw be kasira, olu dagamunin lo, bari Ala bena u dusu saalo. . . . Tilenninya nigɛ be minw na, olu dagamunin lo, bari u dusu bena fa. . . . U be minw tɔɔrɔ u ka tilenninya kosɔn, olu dagamunin lo, bari sankolo masaya ye u ta ye. ‘Ni mɔgɔw b’aw nɛni, k’aw tɔɔrɔ, . . . bari aw ye ne ka kalandenw ye, o tuma na, aw dagamunin lo. Aw ka nisɔndiya kosɔbɛ.’”—Matiyo 5:3-12.

Yezu ko “aw dagamunin lo.” O kɔrɔ ko di? Mɔgɔ be ninsɔndiya min sɔrɔ ɲɛnagwɛko dɔ la, Yezu kaan t’o ma. Hɛɛrɛ sɔbɛ tɛmɛna o kan. Mɔgɔ min be hɛɛrɛ la sɔbɛ la, a tigi wasanin lo ani kuun b’a ka ɲɛnamaya la.

Yezu ko mɔgɔ minw b’a lɔn k’u mako be Ala la ani minw dusu kasinin lo sabu u ye jurumutɔw ye ani u b’a ɲini ka Ala lɔn ani k’a sago kɛ, olu lo be hɛɛrɛ la sɔbɛ la. Hali ni mɔgɔw b’u kɔniya wala k’u tɔɔrɔ sabu u be Ala sago kɛ, u be hɛɛrɛ la sabu u b’a lɔn k’u koo ka di Ala ye ani ko a bena ɲɛnamaya banbali di u ma.

Nka, mɔgɔ caaman b’a miiri ko ni nafolo b’i fɛ ani ni ɲɛnagwɛkow ka di i ye, o lo b’a to i be hɛɛrɛ sɔrɔ. Yezu m’o lo fɔ, nka a ye miiriya wɛrɛ  lo fɔ. N’a sɔrɔ o y’a lamɛnbaga caaman lasun ka miiri. A ko: “Nga bɔnɛ ye aw nafolotigiw ta ye, bari aw ye aw ka ɲasuma sɔrɔ ka ban. Aw minw be dumuni kɛ ka fa sisan, bɔnɛ ye aw ta ye, bari kɔngɔ bena aw minɛ. Aw minw be yɛlɛ sisan, bɔnɛ ye aw ta ye, bari aw ɲaa bena sisi, aw bena kasi. Ni mɔgɔ bɛɛ be aw tɔgɔɲuman fɔ, bɔnɛ ye aw ta ye, bari u faaw tun be kira galontigɛlaw boɲa ten.”—Luka 6:24-26.

Ka kɛ nafolotigi ye, ka yɛlɛ ninsɔndiya fɛ, ani ka ɲagali sabu mɔgɔw b’i tando, mun na o be bɔnɛ lase mɔgɔ ma? Sabu n’o fɛɛnw be mɔgɔ fɛ ani a b’u diyabɔ, o be se k’a to a be Ala ka baara mafiɲɛya ani ka bɔnɛ hɛɛrɛ sɔbɛ la. Yezu t’a fɔra le ko ni mɔgɔ ye fantan wala kɔngɔtɔ ye, o dama le b’a to a tigi be hɛɛrɛ sɔrɔ. Nka, dɛsɛbagatɔw lo ka teli ka sɔn Yezu ka kalanw na ani ka hɛɛrɛ sɔbɛ sɔrɔ.

Sisan, Yezu kumana ka ɲɛsin a ka kalandenw ma ko: “Aw ye diɲɛ kɔgɔ ye.” (Matiyo 5:13). O kɔrɔ tɛ k’u ye kɔgɔ yɛrɛ yɛrɛ ye. Kɔgɔ b’a to dumunifɛnw tɛ tiɲɛ joona. Kɔgɔ caaman maranin tun be sarakabɔlan gɛrɛfɛ, Alabatosoba kɔnɔ. U tun b’o dɔ bɔ k’a kɛ sarakaw la. Kɔgɔ ye tagamasiɲɛ ye. A b’a yira fɛɛn min tɛ se ka tiɲɛ wala ka toli (Levitiki 2:13; Ezekiyɛli 43:23, 24). Yezu ka kalandenw ye “diɲɛ kɔgɔ ye.” O kɔrɔ, u be mɔgɔw dɛmɛ u sɔɔn kana tiɲɛ Alako ani tagamacogo ta fan fɛ. Mɔgɔ o mɔgɔ sɔnna u ka kalan na, o be se ka kɛ sababu ye k’a tigi niin mara.

Yezu y’a fɔ a ka kalandenw ye fana ko: “Aw ye yeelen ye diɲɛ kɔnɔ.” U tɛ lanpa mana k’a bila minan dɔ jukɔrɔ, nka u b’a bila fɛɛn dɔ kan walisa a ka yeelen bɔ. O kama, Yezu y’u jija ko: “Aw ka kɛwaliɲumanw kɛ ka yeelen bɔ mɔgɔw ye ten, waasa u ka aw sankolo la Faa boɲa.”—Matiyo 5:14-16.

SARIYAKOLOW, MINW BARIKA KA BON

Yahutuw ka diinan kuntigiw b’a jati ko Yezu be Ala ka sariyaw tiɲɛ. A ma mɛɛn, u y’a ɲini k’a faga o kosɔn. O kama, Yezu y’a fɔ bɛɛ ɲɛɛ na ko: “Aw kan’a miiri ko ne nana Ala ka sariya bɔ yen, walima ka kiraw ka kuma cɛn. Ne ma na o la. Ne nana janko u tun y’a fɔ ko koo minw bena kɛ, olu ka dafa.”—Matiyo 5:17.

 Tiɲɛn na, Yezu be Ala ka sariya labato kosɔbɛ ani a b’a fɛ tɔɔw k’a labato fana o cogo la. A y’a fɔ ko: “O le y’a to, sariya minw sigira, min koo ka nɔgɔ u bɛɛ ye, ni mɔgɔ min t’o bato, n’a b’a fɔ mɔgɔw ye k’u kan’a bato, o tigi tena jati mɔgɔbaba ye sankolo masaya la.” O kɔrɔ ko o tigi tɛna don Ala ka Masaya la. O kɔ, Yezu y’a fara a kan ko: “Nga, ni mɔgɔ min b’o sariyaw bato, n’a b’a fɔ mɔgɔw ye k’u k’o bato, o tigi bena jati mɔgɔbaba ye sankolo masaya la.”—Matiyo 5:19.

Yezu y’a fɔ ko hali miiriya minw b’a to mɔgɔ be Ala ka sariya tiɲɛ, u si daganin tɛ. Yezu ye mɔgɔ hakili jigi ko sariya b’a fɔ ko: “I kana mɔgɔ faga.” O kɔ, a y’a fara a kan ko: “Ni mɔgɔ o mɔgɔ dimina a balima kɔrɔ, o tigi ka kan ni kiti ye.” (Matiyo 5:21, 22). Mɔgɔ min diminin be to a tɔɲɔgɔn kɔrɔ, o ka jugu yɛrɛ le sabu o be se k’a to a b’a tɔɲɔgɔn faga. O kama, Yezu y’a yira an ka ɲi ka jijaliba min kɛ walisa ka hɛɛrɛ sigi ni mɔgɔw ye. A ko: “N’i b’i ka saraka bɔ Ala ye, n’i hakili jigira a la ko i balima dɔ diminin be i kɔrɔ, i k’i ka saraka bila fɔlɔ ka taga yafa daali a fɛ. O kɔ, i ka segi k’i ka saraka bɔ.”—Matiyo 5:23, 24.

Sariya ka cikan wɛrɛ ɲɛsinna ɲamɔgɔya koo ma. Yezu y’a fɔ ko: “Aw y’a mɛn, a fɔra ko: ‘I kana kakalaya kɛ.’ Ayiwa, ne b’a fɔ aw ye ko ni mɔgɔ o mɔgɔ [tora ka] muso filɛ k’a ɲaa bɔ a fɛ, o tigi ye kakalaya kɛ a dusu la n’o muso ye ka ban.” (Matiyo 5:27, 28). Kakalaya miiriya min be se ka na mɔgɔ kɔnɔ tuma kelen kelen, Yezu kaan tɛ o ma. Nka, a ko ni mɔgɔ tora ka muso filɛ, o le ye koo jugu ye sabu o le ka teli ka kakalaya nege don mɔgɔ la. N’a tigi ye sababu sɔrɔ, a be se ka kakalayako kɛ. Mɔgɔ be se k’a yɛrɛ tanga o ma cogo di? Tuma dɔw la, fɔɔ i ka fɛɛrɛ dɔ kɛ hali n’o be se k’i tɔɔrɔ kosɔbɛ. Yezu ko: “N’i kinibolo ɲaa be kɛ sababu ye k’i don kojugu la, a wɔgɔbi k’a fili yɔrɔjan. . . . N’i kinibolo be kɛ sababu ye k’i don kojugu la, a tigɛ k’a fili yɔrɔjan.”—Matiyo 5:29, 30.

Walisa ka se k’u niin kisi, mɔgɔ dɔw sɔnna u k’u bolo wala u seen tigɛ bana jugu dɔ kosɔn. O kama, Yezu y’a fɔ ko fɛɛn o fɛɛn be se k’a to miiriya juguw be na an kɔnɔ ani k’an bila kakalaya la, a ka fisa an k’o “fili yɔrɔjan” hali n’o fɛɛn nafa ka bon kosɔbɛ i n’a fɔ an ɲɛɛw wala an bolo. Yezu y’a ɲɛfɔ ko: “I ka bɔnɔ i farikolo yɔrɔ dɔ la, o ka fisa a bɛɛ dafanin ka fili jahanama na.” Jahanama wala Zeyɛni tun ye ɲamaɲama bɔnyɔrɔ dɔ tɔgɔ ye Zeruzalɛmu dugu kɔfɛ. Zeyɛni ye tagamasiɲɛ ye min b’a yira ko fɛɛn dɔ halakira bugubugu.

Yezu ye ladiliw di fana k’a yira an ka ɲi ka min kɛ ni mɔgɔ dɔ donna an gasi la. A ko: “Ne b’a fɔ aw ye ko aw kana kojugu juru sara ni kojugu ye. Ni mɔgɔ dɔ y’i kinibolo tulo ci, i ka tɔ kelen nin sin a ma fana.” (Matiyo 5:39). O kɔrɔ tɛ ko  mɔgɔ man kan k’a yɛrɛ wala a ka denbaya lafasa n’u be fariyako dɔ kɛra u la. Yezu kumana tuloci min koo la, o tɛ mɔgɔ mandimi kosɔbɛ wala k’a faga. Nka, a kuun ye k’a tigi mafiɲɛya le. Yezu ka kumaw kɔrɔ ko ni mɔgɔ dɔ b’an darabɔra wala n’a be kɛlɛ ɲinina an daa, a tigi y’an tulo ci wo, a y’an nɛni wo, an kana a juru sara.

O ladili bɛnnin be ni Ala ka sariya ye, o min b’a fɔ ko an k’an mɔgɔɲɔgɔn kanu. O kama, Yezu y’a lamɛnbagaw ladi ko: “Aw ka aw juguw kanu ka Ala daali aw tɔɔrɔbagaw ye.” O kɔ, a y’a yira fɛɛn min kama an ka ɲi k’o kɛ. A ko: “Aw k’o kɛ janko aw ka kɛ aw sankolo la Faa deenw ye, bari ale be tile bɔ mɔgɔjuguw ni mɔgɔɲumanw ye.”—Matiyo 5:44, 45.

Yezu y’o kumaw kuncɛ nin cogo la ko: “Aw kɔni ka kɛ mɔgɔ dafalenw ye i ko aw sankolola Fa dafalen bɛ cogo min na.” (Matiyo 5:48, ABM). Yezu t’a fɛ k’a fɔ ko an be se ka kɛ mɔgɔ dafaninw ye yɛrɛ yɛrɛ la. Nka, a b’a fɛ k’a fɔ le ko n’an be Ala ladegi, an ka kanuya bena bonya ani an bena se k’an juguw yɛrɛ kanu. A ka kumaw kɔrɔ ko: “Aw ka makari mɔgɔw la i n’a fɔ aw Faa be makari cogo min na.”—Luka 6:36.

KA ALA DELI ANI K’AN JIGI LA A KAN

Yezu tagara ɲɛ n’a ka kalan ye. A y’a lamɛnbagaw ladi ko: “Aw ka aw yɛrɛw kɔlɔsi. Aw kana aw ka Alasira taama kɛ tɔgɔɲini koo ye.” Minw b’a kɛ i n’a fɔ Ala koo ka di u ye, Yezu y’olu jalaki ko: “N’i be fɛɛn dɔ di dɛsɛbagatɔw ma, i kana buru fiyɛ i ɲafɛ i n’a fɔ tɔgɔɲinilaw b’a kɛ cogo min na.” (Matiyo 6:1, 2). N’an be fɛɛn dɔ di fantanw ma, a ka fisa an k’o kɛ dogo la.

O kɔ, Yezu y’a fɔ ko: “N’aw be Ala daali, aw kan’a kɛ i n’a fɔ filakanfɔlaw b’a kɛ cogo min na. Ka lɔ kalansow kɔnɔ ani sira daaw la ka Ala daali, o le ka di u ye. U b’a kɛ ten janko mɔgɔw k’u ye.” Nka, Yezu ko: “N’i b’a fɛ ka Ala daali tuma min na, don i ka soo kɔnɔ ka daa tugu. I Faa Ala min b’o yɔrɔdogonin na, i k’ale daali yen.” (Matiyo 6:5, 6). Mɔgɔw be delili minw kɛ jamayɔrɔ la, Yezu t’a fɔra le k’u man ɲi. Ale yɛrɛ ye delili kɛ jamayɔrɔw la. Nka, ka delili kɛ walisa ka tɔɔw kabakoya ani ka tandoli sɔrɔ, Yezu ko o lo man ɲi.

A ye jama ladi ko: “N’aw be Ala daali tuma min na, aw kana segi kuma kelen kan siɲɛ caaman i n’a fɔ Alalɔnbaliw.” (Matiyo 6:7). Yezu t’a fɛ k’a fɔ ko an man ɲi ka delili kɛ siɲɛ caaman koo dɔ la. Min man ɲi, o ye ka kuma dɔw degi an kunfɛ ani ka to ka ‘segi o kuma kelen kan siɲɛ caaman’ na. O kɔ, Yezu ye delili modɛli dɔ fɔ, min na a ye fɛɛn wolonfila kofɔ. A kɔnna ka fɛɛn saba nunu kofɔ: Ala tɔgɔ ka saniya, a ka Masaya ka na ani a sago ka kɛ. O fɛɛn saba ɲɛsinna koo nunu ma: Joo min be Ala fɛ ka kuntigiya kɛ ani a sagonata ye min ye. N’an ye delili kɛ ka ban o fɛɛn saba koo la, o kɔ le an be se ka kuma an makoɲɛfɛnw koo la,  i n’a fɔ: an ka loon o loon dumuni ani an ka jurumu yafa. An be se ka Ala deli fana a kana a to kɔrɔbɔli be bonya ka tɛmɛ an fanga kan ani a k’an kisi Sutana ma.

An ka ɲi k’an bololafɛnw jati cogo di? Yezu y’a fɔ jama ye ko: “Aw kana nafolo caaman lajɛn aw yɛrɛw ye diɲɛ nin kɔnɔ, bari bagabaga ni tumuw be cɛnni kɛ, soonw fana be daaw kari ka don ka fɛɛnw cɛ.” O kumaw ye tiɲɛn yɛrɛ lo ye sabu nafolofɛnw ye banta ye ani u tɛ foyi fara an nafa kan Ala ɲɛɛ kɔrɔ. O kama, Yezu y’a fɔ ko: “Aw ye nafolo caaman lajɛn aw yɛrɛw ye sankolo la.” An be se k’o kɛ n’an be Ala ka baara kɛ an ɲɛnako fɔlɔ ye. An ye tɔgɔ ɲuman min sɔrɔ Ala ɲɛɛ kɔrɔ, mɔgɔ si tɛ se k’o tiɲɛ ani k’an bali ka ɲɛnamaya banbali sɔrɔ. O kama, Yezu ka kuma nunu ye tiɲɛn ye: “I ka nafolo be yɔrɔ min na, i ka miiriya be o yɔrɔ la fana.”—Matiyo 6:19-21.

Yezu ye ntalen kuma dɔ fɔ walisa k’u dɛmɛ k’a ka kumaw faamu ka ɲɛ. A ko: “Mɔgɔ ɲɛden lo ye a farikolo lanpan ye. N’i ɲɛɛ lɔnin be fɛɛn kelen kan, i fari yɔrɔ bɛɛ be kɛ yeelen na. Nka n’i ɲɛji ka ca, i farikolo bɛɛ be kɛ dibi la.” (Matiyo 6:22, 23, NW). N’an ɲɛɛw ka ɲi, u be kɛ an fɛ i n’a fɔ lanpan mananin. Walisa an ɲɛɛw ka se k’o kɛ, fɔɔ u lɔnin ka to fɛɛn kelen kan. N’o tɛ, an tɛna se ka ɲɛnamaya jati cogo tilennin na. N’an be bololafɛnw bila Ala ka baara ɲɛ, o b’a to an “farikolo bɛɛ be kɛ dibi la.” O be se k’an lasun ka dibidibi koow kɛ.

O kɔ, Yezu ye ɲɛyirali barikaman dɔ di. A ko: “Mɔgɔ si te se ka baara kɛ kuntigi fila ye, bari a bena kelen kɔniya ka kelen kanu, walima a bena nɔrɔ kelen na k’a mako bɔ kelen na. O cogo la fana, aw te se ka nafolo kanu, ka baara kɛ Ala ye.”—Matiyo 6:24.

Mɔgɔ minw be Yezu ka kumaw lamɛnna, n’a sɔrɔ u dɔw b’u yɛrɛ ɲiningara u ka ɲi k’u  makoɲɛfɛnw jati cogo min na. O kama, Yezu y’u hakili sigi ko n’u be Ala ka baara kɛ u ɲɛnako fɔlɔ ye, kuun t’a la u ka hami. A y’a fɔ u ye ko: “Aw ka kɔnɔw filɛ, u te danni kɛ, u te suman tigɛ. U te suman don bondo kɔnɔ. Nga aw Faa min be sankolo la, ale b’u balo.”—Matiyo 6:26.

Feeren minw be kulu kan do? Yezu y’a fɔ ko: “Masacɛ Solomani n’a ka faamaya bɛɛ, a ma fani sɔrɔ min ka cɛɲa ye feeren nunu ta bɔ.” O be mun lo yira do? “Biin min be kongo kɔnɔ bii, ni tasuma ben’a jɛni sini, ni Ala b’a janto o la ten, a tena janto aw la ka tɛmɛ o kan wa?” (Matiyo 6:29, 30). Yezu ye jama jija ni hakilitigiya ye ko: “Aw kana jɔɔrɔ aw ka dumuni koo ni minnifɛn koo ye, walima fani koo. . . . Aw Faa min be sankolo la, ale b’a lɔn ko aw mako b’o fɛɛnw bɛɛ la. Aw ka [to ka] Ala ka masaya n’a ka tilenninya ɲini fɔlɔ, n’o kɛra, Ala bena fɛɛn tɔw bɛɛ d’aw ma.”—Matiyo 6:31-33.

ƝƐNAMAYA SƆRƆCOGO

Cidenw ani mɔgɔ kɔnɔgwɛ wɛrɛw b’a fɛ u ka ɲɛnamaya kɛcogo ka diya Ala ye. Nka, koow man nɔgɔ u fɛ. Fariziɲɛ caaman be mɔgɔw kɔrɔfɔ ani ka kiti tigɛ u kan. O kama, Yezu y’a lamɛnbagaw lasɔmi ko: “Aw kana tɔw kiti, janko Ala kana aw kiti. Aw be tɔw kiti cogo min na, Ala bena aw kiti ten.”—Matiyo 7:1, 2.

Yezu y’a yira ko farati b’a la tugu Fariziɲɛw kɔ sabu u be mɔgɔw kɔrɔfɔ kojugu. A ko: “Fiɲɛntɔ be se ka fiɲɛntɔ wɛrɛ ka bere minɛ wa? U fila bɛɛ tena ben dingɛ kɔnɔ wa?” Yezu lamɛnbagaw ka ɲi ka tɔɔw jati cogo di? U man ɲi ka tɔɔw filɛ ni ɲɛɛ jugu ye ani k’u jalaki sabu o ye jurumuba lo ye. Yezu y’a fɔ ko: “I do be se k’a fɔ i balima ye cogo di ko: ‘Balima, kala b’i ɲaa na, a to n k’a bɔ.’ K’a sɔrɔ lɔgɔkuru min b’i ta la, i t’o yera. Namaramɔgɔ, lɔgɔkuru min b’i ta la, o bɔ fɔlɔ. O la, i bena yeli kɛ ka ɲa, ka kala bɔ i balima ɲaa na.”—Luka 6:39-42.

O kɔrɔ tɛ ko Yezu ka kalandenw man ɲi ka mɔgɔw kiti hali dɔɔni. Yezu y’a fɔ u ye ko: “Aw kana fɛɛn senuman di wuluw ma. . . . Aw kana aw ka kɔnɔkisɛ sɔngɔgwɛlɛnw bila lɛɛw kɔrɔ.” (Matiyo 7:6). Tiɲɛn kuma minw be Ala ka Kuma kɔnɔ, u nafa ka bon. U be i n’a kɔnɔkisɛ sɔngɔ gwɛlɛw. Ni mɔgɔ dɔw t’u jati, nka u be koow kɛ i n’a fɔ bɛgɛnw, Yezu ka kalandenw ka ɲi k’o mɔgɔw to yen ani ka mɔgɔ wɛrɛw ɲini minw bena u lamɛn.

Yezu segira ka kuma delili koo la. A y’a yira ka gwɛ ko an ka ɲi ka timinandiya delili la. A ko: “A’ ye [to ka] delili kɛ, aw na sɔrɔli kɛ.” Ala labɛnnin lo k’an ka deliliw lamɛn i ko Yezu y’a yira cogo min na ko: “Denfa jumɛn be sɔn ka kabakuru d’a deen ma k’a sɔrɔ a ye buru le daali a fɛ? . . . Aw minw ka jugu, n’aw be sɔn ka fɛnɲumanw di aw deenw ma, aw Faa min be sankolo la, ale tena fɛnɲuman di a daalibagaw ma ka tɛmɛ aw ta kan wa?”—Mat 7:7-11.

O kɔ, Yezu ye kuma dɔ fɔ min nana kɛ sariya ye. O sariya ɲɔgɔn tɛ yen tagamacogo ta fan fɛ. A ko: “Aw b’a fɛ mɔgɔ tɔw ka koo min kɛ aw ye, aw fana k’o ɲɔgɔn kɛ u ye.” An kelen kelen bɛɛ ka ɲi k’an janto o ladili la ani k’a sira tagama n’an be koow kɛra ni tɔɔw ye. N’a sɔrɔ a bena  gwɛlɛya an fɛ k’o kɛ i ko Yezu ka kuma nunu b’a yira cogo min na: “Aw ka sirafitini ta. Siraba kɔni taama ka di, nga a be taga ni mɔgɔ ye halakiyɔrɔ la. Mɔgɔ caaman do b’o le ta. Aw ka sirafitini ta ka taga don ni dafitini ye, a taama kɔni ka gwɛlɛ, a taabagaw man ca, nga a be taga ni mɔgɔ ye hɛrɛ yɔrɔ la.”—Matiyo 7:12-14.

Yezu y’a fɔ a ka kalandenw ye ko u k’u yɛrɛ kɔrɔsi sabu mɔgɔ dɔw bena u nɛgɛ walisa u ka ɲɛnamaya sira bila. A ko: “Mɔgɔ minw be galon tigɛ k’olu ye kiraw ye, aw k’aw yɛrɛ kɔlɔsi olu la. N’u be na aw fɛ, u b’u yɛrɛ kɛ sagaw ye k’a sɔrɔ waraw lo.” (Matiyo 7:15). Yezu y’a fɔ ko yiri ɲumanw ani yiri juguw be lɔn u deenw lo la. O kelen lo ni mɔgɔw ye fana. Kira ngalontigɛlaw be lɔn u ka kalanw n’u ka kɛwalew lo fɛ. Yezu y’a ɲɛfɔ ko mɔgɔ be min , o dɔrɔn lo t’a yira ko a ye ale ka kalanden ye. Nka, a ka kɛwalew fana ka ɲi k’o yira. Mɔgɔ dɔw b’a fɔ u daa la ko Yezu y’u ka Matigi ye. Nka, n’u tɛ Ala sago kɛra do? Yezu y’a fɔ ko: “Ne ben’a fɔ u ye ko: ‘Ne t’aw lɔn, aw kojugukɛlaw ka bɔ n kɔrɔ.’”—Matiyo 7:23.

Yezu ye kalanba min kɛ kulu kan, a y’o kuncɛ ko: “Ne ye kuma minw fɔ sisan, ni mɔgɔ min y’o bato, o tigi be i n’a fɔ hakilitigi min y’a ka boon lɔ fara kan. Sanjiba nana ni fɔɲɔba ye, jii cayara, nga o si ma se ka boon nin ben, bari a juu siginin tun be fara kan.” (Matiyo 7:24, 25). Mun na o boon ma ben do? Sabu a lɔbaga ye “dugukolo sogi k’a duɲa fɔɔ ka se fara ma, k’a ka boon juu sigi o kan.” (Luka 6:48). O cogo kelen na, a daan tɛ ka Yezu ka kumaw lamɛn dɔrɔn. Nka, an ka ɲi k’an jija k’u sira tagama fana.

Nka, mɔgɔ min b’o “kuma mɛn, n’a t’a bato” do? O tigi be “i n’a fɔ naloman min y’a ka soo lɔ cɛncɛn kan.” (Matiyo 7:26). Ni sanji benna, jii woyora ani fɔɲɔ nana, o boon be se ka ben.

Yezu ka kalankɛcogo ye jama kabakoya. A y’o kɛ ni setigiya ye. A m’o kɛ komi diinan kuntigiw. N’a sɔrɔ mɔgɔ minw y’a ka kalanw lamɛn, u caaman kɛra a ka kalandenw ye.