Taga a kɔnɔkow lajɛ

Taga a kɔnɔnakow lajɛ

 SAPITIRI 92NAN

Kunatɔcɛ tan kɛnɛyara, nka kelen dɔrɔn y’a ka waleɲumanlɔn yira

Kunatɔcɛ tan kɛnɛyara, nka kelen dɔrɔn y’a ka waleɲumanlɔn yira

LUKA 17:11-19

  • YEZU YE KUNATƆCƐ TAN KƐNƐYA

Kititigɛlaw be labɛn kɛra walisa ka Yezu faga. O kosɔn, Yezu tagara Efarayimu dugu la walisa k’a niin kisi. O dugu be sɔrɔ Zeruzalɛmu saheli ni tilebɔ cɛ. A tora yen n’a ka kalandenw ye walisa k’a yɛrɛ dogo a juguw la (Zan 11:54). Nka, saan 33 ka Tɛmɛnkan seli be surunyana ani Yezu ka ɲi ka kɔsegi tugun o yɔrɔ la. A tɛmɛna saheli fan fɛ, Samari mara la ka taga Galile. O kɛra a siɲɛ laban ye ka taga o mara la sanni a ka sa.

A ka voyazi daminɛ na, Yezu be bɔ dugu dennin dɔ la ka taga dugu dennin wɛrɛ la. A tagatɔ, a ye kunatɔcɛ tan kunbɛn. Tuma caaman na, o bana dɔw ka teli ka mɔgɔ fari yɔrɔ dɔw ɲimi dɔɔni dɔɔni. A be se ka kɛ senkunnandenw, bolokunnandenw wala tulow ye (Nɔnburuw 12:10-12). Ala ka sariya b’a ɲini kunatɔw fɛ u k’u mabɔ tɔɔw la ani u ka kule ko: “Nɔgɔnin, nɔgɔnin!”—Levitiki 13:45, 46.

O kama, kunatɔcɛw y’u yɔrɔ janya Yezu la ani u y’a fɔ ni kaanba ye ko: “Karamɔgɔ Yezu, makari an na.” Yezu y’u ye minkɛ, a y’a fɔ u ye ko: ‘Aw ka taga aw yɛrɛ yira sarakalasebagaw la.’ (Luka 17:13, 14). O cogo la, Yezu b’a yira ko a be Ala ka sariya labato. O sariya kɔnɔ, sira tun dira sarakalasebagaw lo ma k’a fɔ ni mɔgɔ dɔ ka kunatɔbana banna. O la, a tun be se ka jɛn ni mɔgɔ tɔɔw ye.—Levitiki 13:9-17.

O kunatɔcɛ tan nunu bɛɛ lanin b’a la ko see be Yezu ye k’u kɛnɛya. U be tagara sarakalasebagaw fɛ hali k’a sɔrɔ u yɛrɛ ma kɛnɛya fɔlɔ. K’u to sira kan, u y’a ye k’u kɛnɛyara! U kɛnɛyara sabu u lara Yezu la.

Kunatɔcɛ minw kɛnɛyara, u la mɔgɔ kɔnɔntɔn tagara n’u ka sira ye. Nka, kelen m’o kɛ. Ale tun ye Samarika lo ye ani a kɔsegira ka taga Yezu yɔrɔ ɲini. Mun na do? Sabu Yezu ye min kɛ a ye, a b’a waleɲuman lɔn kosɔbɛ o kosɔn. O kunatɔcɛ kɔrɔ ye “Ala tanu kosɔbɛ” sabu a tun b’a lɔn ko Ala lo y’ale kɛnɛya (Luka 17:15). A ye Yezu ye tuma min na, a y’a kunbiri gwan a kɔrɔ ka barika la a ye.

Minw tun be Yezu gɛrɛfɛ, a y’a fɔ u ye ko: “Mɔgɔ tan bɛɛ ma kɛnɛya wa? U tɔɔ kɔnɔntɔn nunu be min? U si ma kɔsegi ka na Ala tanu ni lonancɛ nin kelen tɛ!” O kɔ, Yezu y’a fɔ Samarikacɛ ye ko: “I kisira i ka lanaya barika la. Wili ka taga.”—Luka 17:17-19.

Yezu ye kunatɔcɛ tan nunu kɛnɛya minkɛ, a y’a yira ko Jehova Ala be n’ale ye. U la kelen min ye Ala tando ten, ale ma kɛnɛya dɔrɔn dɛ! N’a sɔrɔ o bena kɛ sababu ye a be ɲɛnamaya banbali sɔrɔ fana. Fɔlɔfɔlɔ la, Ala tun be tɛmɛ Yezu fɛ ka mɔgɔw kɛnɛya o cogo la. Nka, o kelen tɛ bi. O n’a ta bɛɛ, n’an lara Yezu la, an be se ka ɲɛnamaya banbali sɔrɔ. I ko o Samarikacɛ, yala an be Ala waleɲuman lɔn wa?