Taga a kɔnɔkow lajɛ

Taga a kɔnɔnakow lajɛ

 SAPITIRI 113NAN

Ntalen wari talanw koo la: an ka ɲi ka kisɛya

Ntalen wari talanw koo la: an ka ɲi ka kisɛya

MATIYO 25:14-30

  • YEZU BE NTALEN LA WARI TALANW KOO LA

Yezu bele be n’a ka ciden naani nunu ye oliviyeyirikulu kan. A ma mɛɛn, a tun ye ntalen dɔ la sanukuru koo la Zeriko walisa k’a yira ko wagatijan tun bena tɛmɛ Masaya be sɔrɔ ka sigi sen kan. Sisan, a ye ntalen wɛrɛ la u ye. Yezu y’o ntalen la walisa k’a ka cidenw jaabi. U tun y’a ɲininga ko mun lo bena a yira ko a be Masaya la ani ko duniɲa laban surunyana. O ntalen b’a yira ko cii min kalifara kalandenw ma, u ka ɲi k’o dafa ni kisɛya ye.

Yezu y’a daminɛ k’a fɔ ko: “A bena kɛ i n’a fɔ cɛɛ dɔ, min tun be tagara taama na. A y’a ka baaradenw wele k’a ka nafolo kalifa u ma.” (Matiyo 25:14). Kalandenw be se k’a faamu ko Yezu be “cɛɛ” min kofɔra, ale yɛrɛ lo sabu a tun y’a yɛrɛ suman ni cɛɛ dɔ ye min tagara jamanajan dɔ la walisa ka masaya sɔrɔ.—Luka 19:12.

Sanni o cɛɛ ka taga a ka tagama na, a y’a ka nafolo kalifa a ka baaradenw ma. Yezu ye saan saba ni tilan kɛ Ala ka Masaya kibaro diiman waajuli la ani a ye fɔrɔmasɔn di a ka kalandenw ma walisa u k’o baara kɛ. Sisan, a taga tuma surunyana. A lanin b’a la k’u bena o baara kɛ k’a dafa.—Matiyo 10:7; Luka 10:1, 8, 9; Vɛrise nunu lajɛ fana: Zan 4:38; 14:12.

Cɛɛ min kofɔra ntalen na, a y’a ka nafolo tilan cogo di? Yezu ko: “A ye wari talan duuru di dɔ ma, ka talan fila di dɔ ma, ka talan kelen di a sabanan ma. U bɛɛ ta dira ka kɛɲɛ ni u se ko ye. O kɔ, a taara.” (Matiyo 25:15, ABM). Baaradenw bena mun lo kɛ n’o nafolofɛnw ye? Yala u bena kisɛya ka baara kɛ n’u ye walisa ka kuntigi mako ɲɛ wa?

Yezu y’a fɔ ko: “O yɔrɔ nin bɛɛ talan duuru tigi taara jago kɛ ni a ka wari ye ka talan duuru wɛrɛ sɔrɔ a la. O cogo la talan fila tigi fana ye jago kɛ ka talan fila wɛrɛ sɔrɔ. Talan kelen tigi taara dingɛ [sɔgɔ] duguma ka a makɛ ka wari dogo yen.” (Matiyo 25:16-18, ABM). Ni kuntigi kɔsegira, a bena mun lo kɛ do?

Yezu tagara ɲɛ ni kuma ye ko: “Kuntigi mɛnna kosɔbɛ, o kɔ, a nana k’u wele waasa u ka na n’a ka nafolo ye a k’a jati.” (Matiyo 25:19). Baaraden fɔlɔ ni filanan y’u seko kɛ. Min kalifara u ma, u kelen kelen bɛɛ y’a jija ka baara kɛ n’o ye ani k’o buguya. Wari talan duuru tigi ye duuru wɛrɛ sɔrɔ, ani wari talan fila tigi ye fila wɛrɛ sɔrɔ ka fara a kan. (O wagati la, wari talan kelen tun ye saan 19 baara sara lo ye.) Kuntigi y’u fila bɛɛ tando cogo kelen na ko: “O ɲana, i ye baaardenɲuman ani mɔgɔsɔbɛ ye. I kɛra mɔgɔsɔbɛ ye kofitini nin na, o la, ne bena koo caaman kalifa i ma. Na, an ka nisɔndiya ɲɔgɔn fɛ.”—Matiyo 25:21.

 Nka wari talan kelen kalifara min ma, ale ka koo be dan na. Ale y’a fɔ kuntigi ye ko: “Matigi, ne tun y’a lɔn ko e ka koo ka gwɛlɛ, e ma danni kɛ foro min na, e b’o yɔrɔ suman tigɛ, e ma serili kɛ yɔrɔ min na, e b’o yɔrɔ suman ladon. Ne siranna, n tagara i ka wari dogo dingɛ kɔnɔ, i ka wari filɛ, a minɛ.” (Matiyo 25:24, 25). A yɛrɛ ma se ka kuntigi ka wari bila banki la walisa tɔnɔ dɔɔni ka sɔrɔ a la. O cogo la, a m’a kuntigi nafa ɲini.

Kuntigi y’a fɔ o baaraden koo la ko a ye “baaradenjugu, salabagatɔ” ye ani o bɛnnin lo. Wari talan min tun kalifara a ma, u y’o bɔsi ka di baaraden tɔɔ kelen ma, min kisɛyara a ka baara la ka wari talan duuru wɛrɛ sɔrɔ. Kuntigi ye miiriya jɔnjɔn nin fɔ ko: “Fɛɛn be mɔgɔ min fɛ, dɔ bena d’o tigi ma ka fara a ta kan k’a caya, nga fɛɛn te min fɛ, hali dɔɔni min b’a fɛ, o bena bɔsi a la.”—Matiyo 25:26, 29.

Ntalen nin dɔrɔn be se ka kalandenw bila miiriya caaman na. N’a sɔrɔ u y’a faamu ko Yezu ye cii min kalifa u ma, o nafa ka bon haali. O cii ye nɛɛma ye, min dira u ma ka mɔgɔw kɛ Krista ka kalandenw ye. Yezu b’a fɛ u k’o cii dafa ni kisɛya ye. A t’a ɲini u fɛ u bɛɛ ka kisɛya o baara la cogo kelen na. I ko a fɔra o ntalen na cogo min na, bɛɛ ka ɲi k’o baara kɛ ‘ka kɛɲɛ n’a seko ye.’ O kɔrɔ tɛ ko ni dɔ y’a yɛrɛ kɛ “salabagatɔ” ye ani a m’a seko kɛ Kuntigi ka baara la, o bena diya Yezu ye.

Yezu ka ntalen na, a ko: “Fɛɛn be mɔgɔ min fɛ, dɔ bena d’o tigi ma ka fara a ta kan.” N’a sɔrɔ o kuma ye kalandenw jigi sigi ani k’u dusu diya!