Taga a kɔnɔkow lajɛ

Taga a kɔnɔnakow lajɛ

 SAPITIRI 19NAN

Yezu be Samarika muso dɔ kalanna

Yezu be Samarika muso dɔ kalanna

ZAN 4:3-43

  • YEZU BE SAMARIKA MUSO DƆ NI MƆGƆ WƐRƐW KALAN

  • ALA BE SƆN BATOLI MIN NA

Yezu n’a ka kalandenw bɔra Zude ani u be tagara Galile mara la. U tɛmɛna saheli fan fɛ ka Samari mara cɛtigɛ. Voyazi y’u sɛgɛn. Midi fan fɛ, u lɔra kɔlɔnda dɔ la Sikari (Sychar) dugu gɛrɛfɛ ka lafiɲɛ. N’a sɔrɔ Yakuba lo tun y’o kɔlɔn sɔgɔ wala a ye mɔgɔw sara u y’a sɔgɔ, a saan kɛmɛkulu caaman ye nin ye. Hali bi, o kɔlɔn ɲɔgɔn be se ka sɔrɔ Naplusi dugu gɛrɛfɛ.

Ka Yezu to lafiɲɛ na o kɔlɔnda gɛrɛfɛ, a ka kalandenw tagara dumuni sanyɔrɔ dugu kɔnɔ. U taganin kɔ, Samarika muso dɔ nana jii bɔyɔrɔ. Yezu y’a fɔ a ye ko: “N sɔn jii la n b’a min.”—Zan 4:7.

Yahutuw ni Samarikaw tɛ bɛn koo si la sabu u be sigasiga ɲɔgɔnw na haali. O kama, muso kabakoyara ani a ye Yezu ɲininga ko: “Uun! E min ye zuwifu ye, i be sɔn ka jii daali ne Samarika fɛ wa?” Yezu y’a jaabi ko: “Ala be min di mɔgɔ ma, n’i tun be o lɔn, ani mɔgɔ min ko i k’ale sɔn jii la, n’i tun b’o fana lɔn, e yɛrɛ le tun bena kɔn k’ale daali. A tun bena jii d’i ma min bena nii banbali d’i ma.” Muso y’a jaabi ko: “Juru t’i bolo, kɔlɔn fana ka dun. I bena o jiɲuman nin bɔ min? O tuma na, an bɛma Yakuba min ye kɔlɔn nin sogi an ye, e ka fisa o ye wa? Ale n’a deenw n’a ka begɛnw bɛɛ y’a jii min.”—Zan 4:9-12.

Yezu ko: “Ni mɔgɔ o mɔgɔ ye kɔlɔn nin jii min, minnɔgɔ bena o tigi minɛ tugu. Nga jii min be ne fɛ, ni ne y’o di mɔgɔ min ma k’a min, minnɔgɔ tena o tigi minɛ tugu fewu. Ne bena jii min d’o tigi ma, o bena kɛ jii woyota ye min bena woyo a kɔnɔ tuma bɛɛ, min be nii banbali di.” (Zan 4:13, 14). Hali k’a sɔrɔ Yezu sɛgɛnna, a b’a fɛ ka tiɲɛn kuma dɔw fɔ Samarika muso ye. O kumaw be se k’a dɛmɛ ka ɲɛnamaya sɔrɔ.

O muso y’a fɔ Yezu ye ko: “Matigi, o jii nin di ne ma waasa minnɔgɔ kana n minɛ tugu ani n kana na yan jita kama tugu.” Sisan, a be komi Yezu ye baro yɛlɛma koo wɛrɛ kan. A y’a fɔ muso ye ko: “Taga i cɛɛ wele ka na.” Samarika muso y’a jaabi ko: “Cɛɛ te n fɛ.” Yezu be min lɔn o muso koo la, n’a sɔrɔ o ye muso kabakoya. Yezu ko: “I ye tiɲɛ fɔ ko cɛɛ t’i fɛ. Bari i furula cɛɛ duuru fɛ ka tɛmɛ. E ni min be ɲɔgɔn fɛ sisan, i cɛɛ tɛ.”—Zan 4:15-18.

Yezu ye min fɔ, muso b’a lɔn k’o ye tiɲɛn ye. A kabakoyara ani a y’a fɔ ko: “Matigi, ne y’a lɔn, i ye kira le ye.” A y’a yira fana ko Alakow ka di a ye. Cogo di do? A ko: “An faaw [Samarikaw] ye Ala bato kulu nin kan [Garizimu kulu min be gɛrɛfɛ], nga aw zuwifuw ko fɔɔ Zeruzalɛmu.”—Zan 4:19, 20.

Nka, Yezu y’a ɲɛfɔ ko batoli be kɛ yɔrɔ min na, o lo kɔrɔtanin tɛ. A ko: “Loon bena se, mɔgɔw tena na Faa Ala bato kulu nin kan ani Zeruzalɛmu tugu.” O kɔ, a y’a fɔ muso ye ko: “Loon bena se, a yɛrɛ sera ka ban. Ala batobagasɔbɛw bena na Faa Ala bato u dusu la ni tilenninya ye. Bari Faa b’o mɔgɔw ɲɔgɔn le fɛ.”—Zan 4:21, 23, 24.

Min kɔrɔtanin lo Faa Ala fɛ, batolikɛyɔrɔ tɛ, nka ale batocogo lo. Muso kabakoyara ko: “Ne y’a lɔn ko Ala ka Mɔgɔ wolomanin [Masiya] ka  kan ka na, min be wele ko Krista. N’ale nana, a bena koo bɛɛ fɔ an ye.”—Zan 4:25.

O kɔ, Yezu ye tiɲɛnko dɔ fɔ muso ye min kɔrɔtanin lo. A ko: “Ale lo be kumana n’i ye ten.” (Zan 4:26). Miiri k’a filɛ: O muso nana jii bɔyɔrɔ tile gwangwan fɛ ani Yezu ye koo dɔ fɔ a ye a ma min fɔ ka gwɛ mɔgɔ si ye fɔlɔ. A ko ale lo ye Masiya ye. Nin ye nɛɛma ye o muso fɛ dɛ!

SAMARIKA CAAMAN LARA A LA

Yezu ka kalandenw bɔra Sikari dugu kɔnɔ ka na ni dumuni ye. U tun y’a to kɔlɔnda min na, u kɔsegira ka na a sɔrɔ yen a be kumana ni Samarika muso dɔ ye. Muso y’a ka jidaga to yen ka taga dugu kɔnɔ.

Muso senin kɔ Sikari, Yezu ye koo minw fɔ a ye, a y’u lakali mɔgɔw ye. A y’a fɔ ka gwɛlɛya ko: “A’ ye na cɛ dɔ filɛ, a ye ne ka ko kɛlenw bɛɛ fɔ ne ye.” O kɔ, a ye ɲiningali dɔ kɛ ko: “Nin tɛ Krisita ye wa?” (Zan 4:29, ABM). N’a sɔrɔ a tun b’a fɛ k’u lasun u ka la a ka kumaw na. Nin tun ye ɲiningaliba ye kabi Musa ka wagati la (Deteronɔmu 18:18). O ye mɔgɔw lasun u bɔra ka taga Yezu filɛ.

O wagati la, Yezu ka kalandenw kɔrɔtɔnin lo ko a ka dumuni kɛ. Nka Yezu y’u jaabi ko: “Dumuni be ne fɛ aw te min lɔn.” Kalandenw kabakoyara ani u ye ɲɔgɔn ɲininga ko: “Mɔgɔ dɔ nana dumuni d’a ma le wa?” Yezu ye min ɲɛfɔ u ye, o kɔrɔ ka bon a ka kalandenw bɛɛ fɛ. A ko: “Ka n cibaga sago kɛ, o le ye n ka dumuni ye. Ne ka kan k’a ka baara kɛ fɔɔ ka se a daan na.”—Zan 4:32-34.

Sumantigɛ baara min tun ka ɲi ka kɛ yanni kalo naani, Yezu tun kaan tɛ o ma. A tun kaan be min ma, o ye sumantigɛ ye Alako ta fan fɛ. A ko: “Aw k’aw kuun kɔrɔta ka filɛli kɛ. Sumanw mɔnin lo kongo kɔnɔ. Mɔgɔ min y’o tigɛbaga ye, o tigi be sumankisɛ lajɛn sini kama. A b’a ka sara sɔrɔla ka ban. Min ye nii banbali ye. O be kɛ, waasa sumantigi ni sumantigɛbaga bɛɛ ka jɛn ka nisɔndiya ɲɔgɔn fɛ.”—Zan 4:35, 36.

 N’a sɔrɔ Yezu y’a ye ka ban ko nafa sɔrɔla ale ni Samarika muso ka baro la. Sikari mɔgɔ caaman lara Yezu la o muso ka seereya kosɔn sabu a tun b’a fɔra u ye ko ‘ale ye koo minw bɛɛ kɛ a sii la, a y’u bɛɛ fɔ a ye.’ (Zan 4:39). O kama, u nana Yezu sɔrɔ Sikari kɔlɔnda la ani u y’a ɲini a fɛ a ka to n’u ye walisa ka dɔ fɔ olu fana ye. Yezu sɔnna ani a tora Samari dugu la ka tile fila kɛ.

Samarikaw kɛtɔ ka Yezu ka kalan lamɛn, caaman lara a la. U y’a fɔ muso nin ye ko: “K’i ka kuma yɛrɛ bɔ a la, anw lara a la bari an y’a yɛrɛ lamɛn. An lanin b’a la ko nin le ye diɲɛ kisibaga yɛrɛ yɛrɛ ye.” (Zan 4:42). Samarika muso ye seereya kɛ Krista koo la cogo min na, o ye ɲɛyirali ɲuman ye an fɛ: a ye Yezu ka kalan nege don a lamɛnbagaw la walisa u k’a ɲini ka dɔ lɔn tugun.

Kana ɲinɛ ko yanni kalo naani, sumantigɛ wagati ka ɲi ka se. A be komi ɔrizi sumantigɛ lo. N’a sɔrɔ o be kɛ novanburu wala desanburu kalow la. O kɔrɔ ko saan 30 ka Tɛmɛnkan seli tɛmɛnin kɔ, Yezu n’a ka kalandenw ye kalo segi ɲɔgɔn kɛ Zude mara la. U tun be mɔgɔw kalan ani k’u batize. Sisan, u ye Galile sira minɛ walisa ka taga soo. Mun lo b’u kɔnɔna o yɔrɔ la?