Taga a kɔnɔkow lajɛ

Taga a kɔnɔnakow lajɛ

 SAPITIRI 58NAN

A y’a kɛ buruw cayara ani a y’a ka kalandenw lasɔmi burufununan koo la

A y’a kɛ buruw cayara ani a y’a ka kalandenw lasɔmi burufununan koo la

MATIYO 15:32–16:12 MARIKI 8:1-21

  • YEZU BE CƐƐ 4000 BALO

  • A B’A KA KALANDENW LASƆMI FARIZIƝƐW KA BURUFUNAN KOO LA

Jamaba lajɛnna Yezu kɔrɔ Dekapoli (Dugu tan mara la), Galile baji daa la, kɔrɔn fan fɛ. U nana walisa ka Yezu lamɛn ani a k’u kɛnɛya. U nana ni dumunifɛnw ye segibaw kɔnɔ.

Nka, wagati dɔ nana se, Yezu y’a fɔ a ka kalandenw ye ko: “Jama nin hinɛ be ne la, bari, u be ni ne ye, a tile saba ye bii ye, foyi t’u fɛ k’a dumu. Ni ne ye sira d’u kɔngɔtɔlaman ma, u barika bena dɛsɛ sira la, bari u dɔw bɔyɔrɔ ka jan.” Kalandenw y’a ɲininga ko: “Anw bena se ka dumuni sɔrɔ yɔrɔ jumɛn yan kongokolon nin kɔnɔ ka mɔgɔ nunu fa?”—Mariki 8:2-4.

Yezu y’u jaabi ko: “Burukun joli le b’aw fɛ?” Kalandenw y’a jaabi ko: “Burukun wolonwula ni jigɛmisɛn damani.” (Matiyo 15:34). O kɔ, Yezu y’a to jama sigira duguma. A ye burukunw ni jɛgɛ nunu ta ka barika la Ala ye ani a y’u di kalandenw ma, olu y’u tilan jama ye. Mɔgɔ bɛɛ ye dumuni kɛ ka fa. O kɛra kabako ye dɛ! U ye dumuni tɔɔ cɛ ka segi wolonfila fa. Mɔgɔ minw y’o dumuni kɛ, cɛɛw dama tun ye mɔgɔ 4000 ye, musow ni denmisɛnw ma jati.

Yezu ye sira di jama ma. O kɔ, a n’a ka kalandenw donna kurun kɔnɔ ka taga Magadan mara la, Galile baji daa la, tileben fan fɛ. O yɔrɔ la, Fariziɲɛw ni Saduseɲɛw dɔw gwɛrɛla Yezu la walisa k’a kɔrɔbɔ. U y’a ɲini Yezu fɛ ko a ka kabako dɔ kɛ ka bɔ sankolo la.

Yezu y’u kɔnɔnako faamu minkɛ, a y’u jaabi ko: “Wuladafɛ ni tilekun be ɲini ka don tuma min na, aw b’a fɔ ko suu bena diya, bari sankolo wulennin lo. Sɔgɔmadafɛ fana, aw b’a fɔ ko bii tena diya bari yɔrɔ ɲaa ma ɲi. Aw be se ka sankolo filɛ ka waati cogoya faamu, nga koo minw be kɛra waati nin na, aw te sera k’olu faamu.” (Matiyo 16:2, 3). O kɔ, Yezu y’a fɔ Fariziɲɛw ni Saduseɲɛw ye ko kabako si tɛna kɛ k’a yira u la ni kira Zonasi ta ɲɔgɔn tɛ.

Yezu n’a ka kalandenw donna kurun kɔnɔ k’u ɲɛsin Bɛtisayida, o min be baji daa la, tilebɔ ni saheli cɛ. Sira kan, kalandenw y’a ye ko u ɲinɛna ka buru caaman ta. U ye buru kelen dɔrɔn lo ta.Saduseɲɛ dɔw tun ye Erɔdi ka mɔgɔw ye. Olu ni Fariziɲɛw ni Yezu ye sɔsɔli min kɛ, Yezu tun be miirila o la tuma min na a y’a ka kalandenw lasɔmi ko: “Aw k’aw yɛrɛ kɔlɔsi Fariziɲɛw ka burufununan ni Erɔdi ta ma.” Yezu y’a lɔn ko a ka kalandenw ka miiriya tilennin tɛ minkɛ, a y’a fɔ u ye ko: “Mun na aw b’a fɔra ɲɔgɔn ye ko: ‘Buru t’an fɛ minkɛ,’ k’o le y’a to ne be kuma ten?”—Mariki 8:15-17.

A ma mɛɛn, Yezu tun ye buru di mɔgɔ caaman ma. O kama, hali ni buru caaman tun tɛ kalandenw bolo, u tun ka kan k’a lɔn ko Yezu tɛ hamina o koo la. A y’u ɲininga ko: “Ne ye burukun duuru karikari k’a di cɛɛ waa duuru ma tuma min na, aw hakili t’o la wa? Aw ye segi joli fa n’a tɔɔ ye?” U y’a jaabi ko: “Segi tan ni fila.” A y’u ɲininga tugun ko: “Ne ye burukun wolonwula tilantilan k’u di mɔgɔ waa naani ma tuma min  na, aw ye segi joli fa n’a tɔɔ ye?” U y’a jaabi ko: “Segi wolonwula.”—Mariki 8:18-20.

Yezu ko: “Mun na aw m’a faamu ko ne ma kuma buuru ko la?” A y’a fara a kan ko: “A’ ye aw yɛrɛw kɔlɔsi Farisiɛnw ni Saduseɛnw ka buurufunun fɛn na.”—Matiyo 16:11, ABM.

A laban, kalandenw y’a faamu. Burufununan b’a to farinimugu nɔɔninin be funu. Yezu be burufununan min kofɔra, o ye tagamasiɲɛ lo ye. A ɲɛsinna nanbarakow lo ma. Yezu tun b’a ka kalandenw lasɔmina u k’u yɛrɛ kɔrɔsi “Fariziɲɛ ni Saduseɲɛw ka kalan” ma. O kalanw be mɔgɔ lafili.—Matiyo 16:12.