Taga a kɔnɔkow lajɛ

Taga a kɔnɔnakow lajɛ

 SAPITIRI 112NAN

Ntalen npogotigi tan koo la: a kɔrɔtanin lo an ka to ɲɛɛ na

Ntalen npogotigi tan koo la: a kɔrɔtanin lo an ka to ɲɛɛ na

MATIYO 25:1-13

  • YEZU BE NTALEN LA NPOGOTIGI TAN KOO LA

Yezu ka cidenw tun y’a ɲininga ko tagamasiɲɛ juman lo bena a yira ko a be Masaya la ani ko duniɲa laban surunyana. Yezu bele b’o ɲiningali jaabira. Sisan a be ntalen wɛrɛ la walisa ka ladili ɲumanw di u ma. O ntalen kumaw tun bena dafa tuma min na Yezu be Masaya la, ani mɔgɔw tun bena o koow kɛtɔ ye.

Yezu y’o ntalen daminɛ ten ko: “Sankolo masaya donko bena kɛ i n’a fɔ sunguru [npogotigi] tan dɔw ka koo. U tun y’u ka fitinɛw ta k’u be taga kɔɲɔcɛ kunbɛn. Mɔgɔ duuru tun ye hakilitanw ye, duuru tun ye hakilitigiw ye.”—Matiyo 25:1, 2.

Yezu t’a fɔra ko a ka kalanden minw bena Masaya kɛ sankolo la, u la tilancɛ ye hakilintanw ye ani tilancɛ tɔɔ kelen ye hakilitigiw ye. A b’a fɔra le ko kalanden kelen kelen bɛɛ be se k’a latigɛ n’a bena to ɲɛɛ na wala n’a tɛna to ɲɛɛ na. Nka, Yezu lanin b’a la k’u kelen kelen bɛɛ be se ka to kantigiya la ani ka dugaw sɔrɔ a Faa fɛ.

O ntalen na, npogotigi tan nunu bɛɛ bɔra ka taga kɔɲɔcɛ kunbɛn ani ka fara mɔgɔ tɔɔw kan ka furuɲɔgɔnw bila sira. U bena yeelen bɔ furucɛ ɲɛfɛ n’u ka fitinɛw ye walisa a ka se ka sira ye ani ka taga n’a muso ye kɔɲɔbon na. O cogo la, u bena bonya la kɔɲɔcɛ kan. Nka, koow bena kɛ cogo di?

Yezu y’a ɲɛfɔ ko: “Minw tun ye hakilitanw ye, olu y’u ka fitinɛw ta, u ma tulu dɔ ta minan wɛrɛw kɔnɔ. Nga hakilitigiw y’u ka fitinɛw ta,  ka tila ka tulu dɔ ta minan wɛrɛw kɔnɔ. Kɔɲɔcɛ mɛnna a tun te nana minkɛ, sinɔgɔ ye sunguru tan nunu minɛ, u bɛɛ sinɔgɔra.” (Matiyo 25:3-5). Npogotigiw tun b’a miiri ko kɔɲɔcɛ bena na joona, nka a ma kɛ o ye. N’a sɔrɔ a mɛnna kosɔbɛ fɔɔ o y’a to npogotigiw sinɔgɔra. N’a sɔrɔ o kuma ye kalandenw hakili jigi Yezu ka ntalen dɔ la. O ntalen na, Yezu ko faamanden dɔ tagara jamanajan dɔ la walisa ka masaya sɔrɔ. Masaya sɔrɔnin kɔ, a labanna ka kɔsegi.—Luka 19:11-15.

Yezu ye ntalen min la npogotigi tan koo la, a y’a fɔ fɛɛn min kɛra tuma min na kɔɲɔcɛ sera. A ko: “Dugutilama, pɛrɛnkan dɔ bɔra ko: ‘Kɔɲɔcɛ filɛ, a be nana, aw ye bɔ ka taga kunbɛn.’” (Matiyo 25:6). Yala npogotigiw labɛnnin lo ani u tora ɲɛɛ na wa?

Yezu ko: “O tuma na, sunguru [npogotigi] tan nunu wilila k’u ka fitinɛw labɛn. Hakilitan nunu y’a fɔ hakilitigiw ye ko: ‘Aw y’an sɔn ni tulu dɔɔni dɔɔni ye, bari an ka fitinɛw b’a fɛ ka faga.’ Hakilitigi nunu y’a fɔ u ye ko: ‘Ayi, bari an ka tulu tena se k’an bɛɛ labɔ. Min ka fisa, aw ye taga tulufeerebagaw fɛ, ka dɔ san aw yɛrɛ ye.’”—Matiyo 25:7-9.

Npogotigi duuru hakilintan nunu labɛnnin tɛ kɔɲɔcɛ nali kama, u ma to ɲɛɛ na. Komi u ka fitinɛ tulu man ca, waajibi lo u ka taga dɔ ɲini. Yezu y’a lakali ko: “Hakilitan nunu tagara tulu sanyɔrɔ la tuma min na, kɔɲɔcɛ sera. Hakilitigiw donna ni kɔɲɔcɛ ye kɔɲɔbon na. U ye daa tugu. O kɔ, hakilitan nunu kɔsegira ka na tuma min na, u ye daa kɔkɔ k’a fɔ ko: ‘Matigi, Matigi, daa yɛlɛ an ye.’ Nga kɔɲɔcɛ y’u jaabi ko: ‘Tiɲɛ na, ne b’a fɔ aw ye, ne te aw lɔn.’” (Matiyo 25:10-12). Komi u m’u yɛrɛ labɛn ani u ma to ɲɛɛ na, o kɛra bɔnɛba ye u fɛ!

N’a sɔrɔ cidenw y’a faamu ko Yezu be kɔɲɔcɛ min kofɔra, o ye ale yɛrɛ lo ye sabu a ma mɛɛn, Yezu tun y’a yɛrɛ suman ni kɔɲɔcɛ ye (Luka 5:34, 35). Npogotigi hakilitigiw ye jɔn lo ye? “Sagakulufitinin” mɔgɔw, olu minw bena Masaya sɔrɔ, Yezu tun y’a fɔ u ye ko: “Aw k’aw cɛɛ siri, k’aw ka fitinɛ mananin minɛ aw bolo.” (Luka 12:32, 35). N’a sɔrɔ cidenw y’a faamu ko Yezu be min fɔra npogotigiw koo la, o ɲɛsinna kalanden kantigiw ma, i n’a fɔ olu. O ntalen fɛ, Yezu b’a fɛ k’u kalan mun lo la?

Yezu y’o yira ka gwɛ ntalen kuma labanw na. A ko: “O la, aw labɛnnin ka to, bari aw t’o loon n’a waati lɔn.”—Matiyo 25:13.

Siga t’a la, Yezu b’a yirala a ka kalanden kantigimanw na ko u ka kan ka to ɲɛɛ na k’a filɛ ale bena kɛ Masaya la tuma min na. U labɛnnin ka ɲi ka to i n’a fɔ npogotigi hakilitigi duuru nunu walisa u kana na ɲinɛ u ka jigiya kɔ ani ka bɔnɛ u ka sara la.