Taga a kɔnɔkow lajɛ

Taga a kɔnɔnakow lajɛ

 SAPITIRI 33NAN

A ye Ezayi ka kiraya kuma dafa

A ye Ezayi ka kiraya kuma dafa

MATIYO 12:15-21 MARIKI 3:7-12

  • JAMABA BE YEZU GƐRƐFƐ

  • A YE EZAYI KA KIRAYA KUMA DAFA

Yezu y’a mɛn ko Fariziɲɛw ni Erɔdi kɔmɔgɔw be labɛn kɛra walisa k’ale faga. O kama, ale n’a ka kalandenw tagara Galile baji daa la. Jamaba bɔra yɔrɔ bɛɛ ka ɲɔgɔn lajɛn a gɛrɛfɛ. U bɔra Galile, Tiri ni Sidɔn gɛrɛfɛ duguw la, Zurudɛn baji kɔfɛ, Zeruzalɛmu, ani Idume mara la o min be yɔrɔjan, worodugu fan fɛ. Yezu ye u caaman kɛnɛya. O kama minw bananin lo kosɔbɛ, olu be girinna a nɔfɛ. Sanni u ka kɔnɔni kɛ Yezu ka maga u la, olu yɛrɛ kɔrɔtɔnin lo ka maga a la.—Mariki 3:9, 10.

Jama tun ka ca ani Yezu y’a fɔ a kalandenw ye k’u ka kurun dennin dɔ labɛn ale ye. O la, a be se ka don o kɔnɔ ka to baji daa la walisa jama kana a ɲɔndi ɲɔndi. Ka fara o kan, a bena se ka to o kurun dennin kɔnɔ ka mɔgɔw kalan wala ka taga yɔrɔ wɛrɛ la baji daa la walisa ka mɔgɔ wɛrɛw dɛmɛ.

Kalanden Matiyo y’a kɔrɔsi ko “Ala tun ye min fɔ kira Ezayi ye” Yezu ka baara y’o dafa (Matiyo 12:17). Yezu ye kiraya kuma juman lo dafa?

“Ne ye baarakɛla min woloma, o filɛ nin ye. Ne b’a kanu, a diyara ne ye k’a woloma. Ne bena n ka Nii don a la, a bena tilenninyako fɔ siyaw ye. A tena kɛlɛ kɛ, a tena pɛrɛn. Mɔgɔ si ten’a kaan mɛn siraw kan. A tena buruku fɔnsɔnnin [wala kala ɲɔɲɔnin] tigɛ, fitinɛ min be sisi bɔra, a tena o tɔɔ faga. A bena to o la fɔɔ k’a kɛ tilenninya be see sɔrɔ. Siyaw bɛɛ bena u jigi la a kan.”—Matiyo 12:18-21; Ezayi 42:1-4.

Siga t’a la, Ala ye baarakɛla min woloma ani a be min kanu o ye Yezu lo ye. Diinanw ka landakow tun y’a to mɔgɔw tun t’a lɔn tilenninya sɔbɛ ye min ye. Nka, Yezu y’a yira ka gwɛ tilenninya sɔbɛ ye min ye. Fariziɲɛw b’u yɛrɛ sago lo kɛ, u tɛ Ala ka sariyaw sira tagama cogo bɛnnin na. U yɛrɛ tɛ sɔn ka banabagatɔ dɛmɛ lafiɲɛlon na! Ala ka tilenninya ye min ye, Yezu y’o yira ka gwɛ. A y’a yira fana ko Ala ka hakili senu b’ale kan. A ye mɔgɔw hɔɔrɔnya ka bɔ landako kunntanw na. O lo kama, diinan kuntigiw b’a fɛ k’a faga. O ye hakilintanya yɛrɛ lo ye!

A fɔra ko Yezu “tena kɛlɛ kɛ, a tena pɛrɛn. Mɔgɔ si ten’a kaan mɛn siraw kan.” O kuma kɔrɔ ko di do? Tuma min na Yezu ye mɔgɔw kɛnɛya, a m’a to o mɔgɔw wala jinaw k’o koo “fɔ mɔgɔ si ye.” (Mariki 3:12). Mɔgɔw ka teli k’o koo ɲɔgɔnw wangola wala ka koow yɛlɛma k’u lakali mɔgɔ  wɛrɛw ye. Yezu t’a fɛ mɔgɔw k’ale lɔn o ɲɔgɔnna kumaw sen fɛ.

Mɔgɔ minw be komi kala kuruninw ani mɔgɔw y’u dɔn dɔn k’u ɲɔɲɔ, Yezu ye dususalo kuma fɔ olu ye. U fana be komi fitinɛ min be sisi bɔra ani a be ɲini ka faga. Yezu ma kala ɲɔɲɔnin tigɛ ani fitinɛ min be sisi bɔra, a m’o tɔɔ faga. Nka, a makarila mɔgɔ barikantanw na ani k’u dɛmɛ ni kanuya ye. Tiɲɛn na, siyaw ka ɲi k’u jigi la mɔgɔ min kan, o ye Yezu lo ye!