Taga a kɔnɔkow lajɛ

Taga a kɔnɔnakow lajɛ

 SAPITIRI 28NAN

Mun na Yezu ka kalandenw tɛ suun don?

Mun na Yezu ka kalandenw tɛ suun don?

MATIYO 9:14-17 MARIKI 2:18-22 LUKA 5:33-39

  • ZAN KA KALANDENW YE YEZU ƝININGA SUNDON KOO LA

Yezu ye saan 30 ka Tɛmɛnkan seli kɛ. Dɔɔni o kɔ, u ye Zan don kaso la. Kalo damanin tɛmɛna ani Zan bele be kaso la. Zan tun b’a fɛ a ka kalandenw ka tugu Yezu kɔ, nka u dɔw bele m’o kɛ fɔlɔ.

Sisan, saan 31 ka Tɛmɛnkan seli be surunyana. Zan ka ciden dɔw nana bɔ Yezu ye k’a ɲininga ko: “Mun na anw ni Fariziɲɛw be to ka suun don k’a sɔrɔ e ka kalandenw te suun don?” (Matiyo 9:14). Fariziɲɛw fɛ sundon ye landako ye. Kɔfɛ, Yezu yɛrɛ ye ɲɛyirali dɔ fɔ Fariziɲɛcɛ dɔ koo la. O cɛɛ tun b’a yɛrɛ jati mɔgɔ tilennin ye ani a ye delili kɛ ko: “Ala, ne be barika la i ye, bari ne te i n’a fɔ mɔgɔ tɔw . . . Ne be suun don siɲɛ fila lɔgɔkun o lɔgɔkun.” (Luka 18:11, 12). N’a sɔrɔ Zan ka kalandenw delinanko lo ka suun don fana. Wala, n’a sɔrɔ u be suun donna walisa k’a yira k’u dusu kasinin lo sabu Zan be kaso la. N’a sɔrɔ o lo kama u y’u yɛrɛ ɲininga ko mun na Yezu ka kalandenw fana tɛ suun don walisa k’a yira k’u dusu kasinin lo Zan koo la.

Yezu tɛmɛna ɲɛyirali dɔ fɛ k’u jaabi. A ko: “Kɔɲɔcɛ teriw ɲa be se ka sisi k’u ni kɔɲɔcɛ to ɲɔgɔn fɛ wa? Nga, loon dɔ bena se, kɔɲɔcɛ bena bɔsi u la. U bena suun don o tuma na.”—Matiyo 9:15.

Zan yɛrɛ y’a fɔ ko Yezu be komi kɔɲɔcɛ (Zan 3:28, 29). O kama, tuma min na Yezu tun be n’a ka kalandenw ye, u tun tɛ suun don. Nka, ni Yezu nana sa, a ka kalandenw dusu bena kasi ani dumuni lɔgɔ tɛna kɛ u la. N’a suu nana kunu, kuun tɛna kɛ a la tugun u ka suun don.

O kɔ, Yezu ye ɲɛyirali fila nunu fɔ: “Mɔgɔ si te fani kunkurunkura bari fani kɔrɔman na, bari, kunkurunkura nin bena fani kɔrɔman sama k’a faran. A faranyɔrɔ bena boɲa ni fɔlɔta nin ye. O cogo kelen na, mɔgɔ si te duvɛnkɛnɛ kɛ foroko kɔrɔman na. N’o kɛra, foroko bena cɛn, duvɛn bena bɔn. Mɔgɔw be duvɛnkɛnɛ kɛ forokokura le kɔnɔ.” (Matiyo 9:16, 17). Yezu tun b’a fɛ ka mun lo fɔ do?

Yezu be Zan Batizelikɛla ka kalandenw lo dɛmɛna u ka koo dɔ faamu. A b’a fɛ u k’a lɔn ko mɔgɔ man kan k’a miiri ko ale ka kalandenw bena tugu Yahutuw ka landakow kɔ, i n’a fɔ ka suun don. Yezu ma na walisa ka batoli kɔrɔ dɔ kɛcogo fisaya ani ka mɔgɔw jija o la k’a sɔrɔ mɔgɔw ka ɲi k’o batoli dabila. Yezu nana mɔgɔw jija batoli min na, o basiginin tɛ Yahutu diinan kan. Yezu ka wagati la, o diinan tun basiginin be adamadenw ka landaw lo kan. Tiɲɛn na, Yezu tun t’a ɲinina ka fanin kunkurunin kura kalan k’a nɔrɔ kɔrɔman na wala ka diwɛn kura don foroko kɔrɔ kɔnɔ.