Taga a kɔnɔkow lajɛ

Taga a kɔnɔnakow lajɛ

 SAPITIRI 32NAN

Mun lo daganin lo lafiɲɛlon na?

Mun lo daganin lo lafiɲɛlon na?

MATIYO 12:9-14 MARIKI 3:1-6 LUKA 6:6-11

  • YEZU YE CƐƐ DƆ BOLO KƐNƐYA LAFIƝƐLON NA

Lafiɲɛlon wɛrɛ la, Yezu tagara batoso dɔ kɔnɔ, n’a sɔrɔ Galile mara la. Cɛɛ dɔ tun be yen min kinibolo faganin lo (Luka 6:6). Sariya karamɔgɔw ni Fariziɲɛw be Yezu kɔrɔsira koɲuman. Mun na do? U ka ɲiningali b’a yira u kɔnɔnako tigitigi ye min ye. U ko: “A daganin be mɔgɔ ka banabagatɔw kɛnɛya lafiɲɛlon na wa?”—Matiyo 12:10.

Yahutuw ka diinan kuntigiw b’a fɔ ko mɔgɔ tɛ se ka furakɛ lafiɲɛlon na fɔɔ n’a tigi niin be farati la. Olu fɛ, ni mɔgɔ dɔ kolo bɔra a nɔɔ na wala n’a fari yɔrɔ dɔ mugura, a daganin tɛ u k’a sama. Ka tiɲɛn fɔ, o diinan kuntigiw ma Yezu ɲininga sabu o cɛɛ hinɛ b’u la dɛ. Nka, u be fɛɛrɛ ɲinina ka Yezu jalaki le.

Nka Yezu b’u ka filankafoya kala ma. Ala ka sariya min tun ko mɔgɔ kana baara kɛ lafiɲɛlon na, Yezu b’a lɔn k’o diinan kuntigiw b’o sariya tɔrɔmina le (Ɛkizɔdi 20:8-10). U siɲɛ fɔlɔ tɛ ka Yezu kɔrɔfɔ a ka kɛwale ɲumanw kosɔn. Sisan, Yezu ye koo dɔ kɛ min ye sɔsɔliba dɔ lawuli. A y’a fɔ cɛɛ bolo faganin ye ko: “Wili ka na lɔ yan mɔgɔw bɛɛ ɲafɛ.”—Mariki 3:3.

Yezu y’a ɲɛsin diinan kuntigiw ma k’u ɲininga ko: “Ni saga kelen be aw dɔ fɛ, n’o saga benna kɔlɔn kɔnɔ lafiɲɛlon na, o tigi ten’a bɔ wa?” (Matiyo 12:11). Komi saga ye nafolofɛn ye u fɛ, u kɔni tɛn’a to kɔlɔn kɔnɔ fɔɔ o dugusagwɛ. N’o tɛ o saga be se ka sa ani o bena kɛ bɔnɛ ye u fɛ. Ka fara o kan, Ala ka Kuma b’a fɔ ko: “Mɔgɔtilennin be janto a ka begɛnw yɛrɛ la.”—Talenw 12:10.

Yezu basigira o kan k’a fɔ ko: “Mɔgɔ ka fisa ni saga ye kosɔbɛ. O kama, a bɛnnin lo mɔgɔ ka koɲuman kɛ mɔgɔ ye lafiɲɛlon na.” (Matiyo 12:12). O la, ni Yezu y’o cɛɛ kɛnɛya, a tɛ lafiɲɛlon sariya tiɲɛna. Yezu ka kumaw tilennin lo ani u b’a yira ko Yezu be makari mɔgɔ la. Diinan kuntigiw tɛ se k’o kumaw sɔsɔ cogo si la. U jera dɔrɔn.

Yezu dusu kasira u ka miiriya kolon kosɔn. A yɛlɛmana ka filɛri kɛ ani a y’a fɔ o cɛɛ ye ko: “I bolo jan.” (Matiyo 12:13). A y’a bolo faganin jan, ani a kɛnɛyara. Cɛɛ ninsɔndiyara kosɔbɛ. Nka, o diinan kuntigi minw b’a ɲinina ka Yezu jalaki, olu y’o koo ta cogo di?

Sanni u ka ninsɔndiya cɛɛ kɛnɛyali kosɔn, u bɔra ani u sinna ka taga ɲɔgɔn ye “ni masacɛ Erɔdi kɔmɔgɔw ye ka Yezu fagacogo ɲini.” (Mariki 3:6). Saduseɲɛw ka diinan mɔgɔw fana tun b’o politiki jɛnkulu kɔnɔ k’a sɔrɔ olu ni Fariziɲɛw tun tɛ bɛn. Nka sisan, u be ɲɔgɔn dɛmɛna ka se ka Yezu kɛlɛ.