Taga a kɔnɔkow lajɛ

Taga a kɔnɔnakow lajɛ

 SAPITIRI 120NAN

Yezu ka kalandenw ka kan ka den i ko yiribolow

Yezu ka kalandenw ka kan ka den i ko yiribolow

ZAN 15:1-27

  • ƐRƐZƐNSUN SƆBƐ NI ƐRƐZƐNSUN BOLOW

  • AN BE SE KA TO YEZU KA KANUYA LA COGO DI?

A ma mɛɛn Yezu y’a kɔnɔ gwɛ k’a ka cidenw jija. Suu kora ani n’a sɔrɔ dugutila tɛmɛna ka ban. Yezu be ntalen kabakoman dɔ la u ye ko:

“Ne le ye ɛrɛzɛnsunsɔbɛ ye, n Faa le y’a tigi ye.” (Zan 15:1). Saan kɛmɛkulu caaman ka kɔn o ɲɛ, Israɛldenw tun weelela ko Jehova ka ɛrɛzɛnsun (Zeremi 2:21; Oze 10:1, 2). Yezu ka ɲɛyirali bɔnin b’o ma. Nka sisan, Jehova b’a fɛ ka ban o jamana na (Matiyo 23:37, 38). Yezu be miiriya kura lo fɔra: ale Yezu ye ɛrɛzɛnsun ye ani a Faa b’o ɛrɛzɛnsun sɛnɛ kabi ale Yezu mɔnna hakili senu na saan 29 Krista Tile la. Nka, Yezu y’a yira k’o ɛrɛzɛnsun ka koo ma ɲɛsin ale dɔrɔn ma. A ko:

“[Ɛrɛzɛnsun] bolo minw bɛɛ te deen kɛ, [n’ Faa] bena olu tigɛ k’o bɔ yen. Ni bolo min be deen kɛ, a bena olu gɛrɛfɛ bolo misɛmanw bɔ, janko a ka se ka deen caaman kɛ ka tɛmɛ fɔlɔ kan. . . . Yiribolo te se ka tigɛ ka to a kelen na ka se ka deen kɛ cogo min na a yɛrɛ ma, o cogo kelen na fana, n’aw ma to ne fɛ, aw te se ka foyi kɛ.”—Zan 15:2-5.

Yezu tun y’a fɔ a ka kalanden kantigimanw ye ko n’ale tagara sankolo la, a bena dɛmɛbaga, wala hakili senu ci u ma. Tile 51 o kɔ, tuma min na cidenw ni Yezu ka kalanden wɛrɛw ye hakili senu sɔrɔ, u kɛra i n’a fɔ ɛrɛzɛnsun bolow. O yiri ‘bolow’ bɛɛ nɔrɔnin ka ɲi ka to Yezu la. Mun na do?

Yezu y’a ɲɛfɔ ko: “Ni mɔgɔ min tora ne fɛ, ni ne fana be a tigi fɛ, o tigi bena se ka baara caaman kɛ . . . bari ni ne sababu tɛ, aw te se ka foyi kɛ aw yɛrɛ ma.” O la, ɛrɛzɛnsun “bolow” ye Yezu ka kalanden kantigimanw lo ye. U bena den caaman, o kɔrɔ, u bena Yezu ka jogow ladegi, ka Ala ka Masaya kofɔ mɔgɔw ye ni kisɛya ye ani ka mɔgɔ caaman kɛ Yezu ka kalandenw ye. Nka, mɔgɔ min ma to ni Yezu ye ani a ma den, mun lo bena o tigi sɔrɔ do? Yezu y’a ɲɛfɔ ko: “Ni mɔgɔ min ma sɔn ka to ne fɛ, . . . u b’a fili kɛnɛma.” Nka, a y’a fara a kan ko: “N’aw tora ne fɛ, ani ne ka kuma tora aw kɔnɔ, aw be fɛɛn min fɛ, aw k’o daali aw bena o sɔrɔ.”—Zan 15:5-7.

Sisan Yezu segira koo dɔ kan a tun kɔnna ka kuma min koo la: k’ale ka cikanw sira tagama (Zan 14:15, 21). A ka kalandenw ka ɲi ka mun lo kɛ walisa k’a yira k’u b’o cikanw labato? U ka ɲi ka Jehova Ala n’a Dencɛ kanu. Yezu ko: “N’aw be ne ka ciiw bato, aw fana be to ne ka kanuya la, i n’a fɔ ne be n Faa ka ciiw bato cogo min na ka to a ka kanuya la.” Nka, ka Jehova n’a Dencɛ kanu, o dama tɛ bɔri kɛ. Yezu y’a fɔ ko: “Ne ka cii ye nin ye, aw ka ɲɔgɔn kanu i n’a fɔ ne y’aw kanu cogo min na. K’i yɛrɛ nii di i teriw kosɔn, kanuya wɛrɛ te yen min ka fisa n’o ye. Aw ye ne teriw ye ni aw be sɔn ka ne ka cii bato.”—Zan 15:10-14.

Yanni lɛri damanin, minw bɛɛ limaniyanin lo Yezu la, a bena a niin saraka olu kosɔn. A ka ɲɛyirali ka ɲi k’a ka kalandenw lasun ka ɲɔgɔn kanu o cogo la: ka kɛ ni yɛrɛsaraka miiriya ye. I ko Yezu tun kɔnna k’a fɔ cogo min na, mɔgɔw tun bena u lɔn o kanuya sababu lo fɛ. A tun ko: “Mɔgɔ bɛɛ ben’a lɔn o seen fɛ ko aw kɛra ne ka kalandenw ye, ni aw be ɲɔgɔn kanu.”—Zan 13:35.

Siga t’a la, cidenw y’a ye ko Yezu y’u weele ko a “teriw.” Yezu y’a fɔ fɛɛn min kama a b’u weele o cogo la. A ko: “Ne b’aw wele n teriw, bari ne ye fɛɛn min bɛɛ mɛn n Faa fɛ, ne y’o bɛɛ yira aw la.” Ka kɛ Yezu teri ye ani k’a lɔn a Faa y’a kalan min na, o ye nɛɛmaba yɛrɛ lo ye! Nka, walisa ka se k’o jɛnɲɔgɔnya diyabɔ, fɔɔ u ka to ka den  caaman. Yezu ko n’u y’o kɛ, u ‘mana fɛɛn o fɛɛn deli a Faa fɛ ale tɔgɔ la, a bena o di u ma.’—Zan 15:15, 16.

Kanuya min be o ɛrɛzɛnsun “bolow,” o kɔrɔ Yezu ka kalandenw cɛ, o bena u dɛmɛ ka gwɛlɛya sifaw bɛɛ muɲu. Yezu y’u lasɔmi ko duniɲa mɔgɔw bena u kɔniya. Nka, a y’u hakili sigi ko: “N’aw y’a ye ko diɲɛ mɔgɔw b’aw kɔniya, aw ka l’a la ko u kɔnna ka ne le kɔniya. N’aw tun ye diɲɛ ta ye, diɲɛ mɔgɔw tun bena aw kanu, nga aw te diɲɛ ta ye. . . . o le kama, diɲɛ mɔgɔw b’aw kɔniya.”—Zan 15:18, 19.

Yezu y’a ɲɛfɔ tugun fɛɛn min kama duniɲa mɔgɔw bena u kɔniya. A ko: “U bena o bɛɛ kɛ aw la ne kosɔn bari u ma ne cibaga lɔn.” Yezu y’a fara a kan ko mɔgɔ minw b’ale kɔniya, a ka kabakow b’olu jalaki. A ko: “Mɔgɔ wɛrɛ ma se ka koo minw kɛ, ni ne tun ma na k’o ɲɔgɔn kɛ u cɛma, u ka hakɛ tun tena kɛ u kunna, nga u y’o bɛɛ ye, o bɛɛ n’a ta, u be ne ni n Faa kɔniya tugu.” Tiɲɛn na, u ka kɔniya be kiraya kuma dɔ lo dafara.—Zan 15:21, 24, 25; Zaburuw 35:19; 69:5.

Yezu y’u hakili jigi tugun dɛmɛbaga koo la, o min ye hakili senu ye. Yezu ka kalandenw bɛɛ be se k’o sebagaya kabakoman sɔrɔ ani a be se k’u dɛmɛ ka den, o kɔrɔ, ka seereya kɛ.—Zan 15:27.