Taga a kɔnɔkow lajɛ

Taga a kɔnɔnakow lajɛ

 SAPITIRI 126NAN

Piyɛri ko ale tɛ Yezu lɔn

Piyɛri ko ale tɛ Yezu lɔn

MATIYO 26:69-75 MARIKI 14:66-72 LUKA 22:54-62 ZAN 18:15-18, 25-27

  • PIYƐRI KO ALE TƐ YEZU LƆN

Tuma min na Yezu y’a to u y’a minɛ Zɛtisemane nankɔ kɔnɔ, a ka cidenw bɛɛ siranna ani u bolila k’a to yen. Nka, u la fila nunu labanna ka kɔsegi: Piyɛri ni “kalanden wɛrɛ.” I be taga a sɔrɔ o kalanden wɛrɛ tun ye ciden Zan lo ye (Zan 18:15; 19:35; 21:24). A be komi u ye Yezu sɔrɔ, tuma min na a minɛbagaw be tagara n’a ye Anɛ ka soo. Anɛ ye Yezu bila ka taga sarakalasebagaw kuntigiba Kayifu ka soo. Piyɛri ni Zan tora ka tugu Yezu kɔ yɔrɔjan. N’a sɔrɔ u be jɔrɔla u yɛrɛ ani u Matigi niin koo la.

Sarakalasebagaw kuntigiba Kayifu tun be Zan lɔn. O kama, Zan sera ka don Kayifu ka luu kɔnɔ. Nka, Piyɛri tora luda la. Muso min tun be luda kɔrɔsira, Zan kɔsegira ka bɔ ka kuma o muso fɛ. O kɔ, Piyɛri fana donna luu kɔnɔ.

O suu nin na, nɛnɛ tun be yen. O kama, minw tun be luu kɔnɔ, olu ye tasuma mɛnɛ. Piyɛri fana sigira n’u ye n’a b’a yɛrɛ jara ani k’a filɛ Yezu ka “koo nin bena laban cogo min na.” (Matiyo 26:58). Muso min tun be luda kɔrɔsira, ale ye Piyɛri filɛ ka ɲɛ sisan tasuma yeelen na. A y’a ɲininga ko: “E fana te cɛɛ nin ka kalanden dɔ ye fewu?” (Zan 18:17). Mɔgɔ wɛrɛw fana ye Piyɛri lɔn ani u tora k’a jalaki ko ale fana tun be ni Yezu ye.—Matiyo 26:69, 71-73; Mariki 14:70.

Piyɛri hakili ɲagamina. O kama, a ko: “N t’a lɔn. Ne m’i ka kuma faamu.” (Mariki 14:67, 68). A yɛrɛ kalila ko ale tɛ Yezu lɔn. A ko: “Ni ne be galon tigɛra, Ala kana n to.”—Matiyo 26:74.

O wagati la, u be kiti tigɛra Yezu kan. A be komi u be Kayifu ka boon dɔ kɔnɔ sangaso sanfɛ. Piyɛri ni mɔgɔ minw be kɔnɔni kɛra jukɔrɔ, olu ɲɛɛ be mɔgɔ sifaw bɛɛ la u be donna ka bɔ. O mɔgɔw weelela ka na seereya kɛ Yezu kama.

Piyɛri be kuma Galilekaw kumacogo la, o b’a yira ka gwɛ ko a be min fɔra o tɛ tiɲɛn ye. Ka fara o kan, Piyɛri ni mɔgɔ minw be tasuma jara, u dɔ ye Malikusi balimacɛ ye. Piyɛri tun ye o Malikusi lo tulo kelen caron ni murujan ye Yezu minɛtuma na. O la, Malikusi balimacɛ ye Piyɛri jalaki fana ko: “Ne m’i ye nankɔ kɔnɔ ni Yezu ye wa?” Piyɛri y’a fɔ a siɲɛ sabanan na ko ale tɛ Yezu lɔn. O yɔrɔnin bɛɛ, dondo kasira i ko Yezu tun kɔnna k’a fɔ cogo min na.—Zan 13:38; 18:26, 27.

O wagati la, a be komi Yezu tun be sanfɛ, terasi kan. K’a to o yɔrɔ la, a be se ka filɛli kɛ lukɛnɛ kɔnɔ. Matigi yɛlɛmana ani ale ni Piyɛri ɲɛɛ bɛnna. O filɛri nin sera fɔɔ Piyɛri dusukun na. Tɛmɛnkan dumuni bannin kɔ, Yezu tun ye kuma min fɔ Piyɛri ye a lɛri damanin ye nin ye, Piyɛri hakili jigira o la. Tuma min na Piyɛri y’a faamu a ye min kɛ, miiri k’a filɛ o ye min kɛ a la! A bɔra kɛnɛma ka kasi kosɔbɛ.—Luka 22:61, 62.

Mun lo ye Piyɛri bila nin koo la? Ale min tun lanin b’a la ko see b’a ye ka kantigiya kɛ, a be se k’a fɔ cogo di ko ale t’a Matigi lɔn? Siga t’a la, koow barila Piyɛri la le. U tun b’a la ka Yezu ka kumaw yɛlɛma ani k’a jalaki ko a ye kojugukɛla lo ye. Komi Yezu tun ye jalakibali ye, Piyɛri tun ka ɲi ka to n’a ye ani k’a lafasa. Nka sanni a k’o kɛ, a banna Ala Dencɛ la, “ɲɛnamaya banbali kumaw” be sɔrɔ min fɛ.—Zan 6:68, ABM.

Dusukasiko min ye Piyɛri sɔrɔ, o b’a yira ka gwɛ ko ni mɔgɔ labɛnnin tɛ ka ɲɛ ani kɔrɔbɔli wala gwɛlɛya dɔ barila a la, o tigi be se ka koo bɛnbali kɛ. O koo be se ka Jehova sagokɛla kantigimanw yɛrɛ sɔrɔ. Koo min ye Piyɛri sɔrɔ, o ka kɛ lasɔmini ye Ala sagokɛlaw kelen kelen bɛɛ fɛ!