Dumuni kɛnin kɔ, Yezu n’a ka cidenw bele be sangaso kɔnɔ. A y’u jija ko: “Aw hakili kana ɲagami. Aw lara Ala la, aw ye la ne fana na.”—Zan 13:36; 14:1.

Yezu y’a fɔ a ka ciden kantigiw ye fɛɛn min kama u hakili man kan ka ɲagami a ka saya kosɔn. A ko: “Boon caaman be n Faa ka luu kɔnɔ, . . . Ni n tagar’a labɛn ka ban, n bena kɔsegi ka n’aw ta ka taga n’aw ye, janko ne be yɔrɔ min na, aw fana ka kɛ yen.” Nka, Yezu ka cidenw m’a faamu ko Yezu kaan be sankolo lo ma. O kosɔn, Toma y’a ɲininga ko: “Matigi, an t’i taayɔrɔ lɔn, an fana bena kɛ di k’a sira lɔn?”—Zan 14:2-5.

Yezu y’a jaabi ko: “Ne le ye sira, ni tiɲɛ, ani nii dibaga ye.” Minw be sɔn Yezu n’a ka kalanw ma ani u b’a ladegi, olu dɔrɔn lo bena don sankolola Faa ka boon kɔnɔ. Yezu ko: “Mɔgɔ si te se n Faa fɛ ni ne sababu tɛ.”—Zan 14:6.

Filipu ye mɛnni kɛ koɲuman ani ye Yezu ɲininga ko: “I Faa yira an na, o b’an wasa.” Musa, Eli ani Ezayi ye yeli minw sɔrɔ Ala koo la, n’a sɔrɔ Filipu b’a fɛ k’o ɲɔgɔn dɔ sɔrɔ. Nka, Yezu ka cidenw be ni fɛɛn dɔ ye min ka fisa n’o yelifɛnw ye. Yezu y’o lo yira ka gwɛ ko: “Ne be n’aw ye kabini tumajan, o bɛɛ n’a ta, e ma ne lɔn wa Filipu? Ni mɔgɔ min ɲaa lara ne kan, o tigi ye n Faa fana ye.” Yezu ye Faa ka koo kɛcogo yira cogo dafanin na. O la, ka ɲɛnamaya kɛ ni Yezu ye ani k’a ka koo kɛcogo kɔrɔsi, a be i n’a fɔ an ye Faa ye. Nka, Faa ka bon ni Dencɛ ye i ko Yezu y’a yira ka gwɛ cogo min na ko: “Ne be kuma minw fɔ, ne t’o fɔ n yɛrɛ ma.” (Zan 14:8-10). O cogo la, cidenw y’a ye ko Yezu b’a yirala ko a ka kalanw bɛɛ bɔra Ala lo yɔrɔ.

Cidenw ye Yezu ka kabakow ye ani u y’a ye a be Ala ka Masaya kibaro diiman fɔra. Sisan,  Yezu b’a fɔ u ye ko: “Ne b’a fɔ aw ye ko mɔgɔ min lara ne la, o tigi bena se ka ne ka kɛwaliw ɲɔgɔn kɛ. A yɛrɛ bena koo dɔw kɛ minw ka bon ni ne taw ye.” (Zan 14:12). Yezu t’a fɔra le ko a ka cidenw bena kabakobaw kɛ ka tɛmɛ ale kan. Nka, u bena waajuli kɛ wagatijan kɔnɔ, yɔrɔ caaman na ani mɔgɔ caaman ye ka tɛmɛ Yezu kan.

Hali ni Yezu tagara sankolo la, a tɛna ɲinɛ u kɔ. A y’a daa di u ma ko: “N’aw ye fɛɛn min ɲini ne tɔgɔ la, ne bena o kɛ.” A y’a fara a kan fana ko: “Ne bena n Faa Ala daali a be dɛmɛbaga wɛrɛ ci aw ma, janko ale ka to ni aw ye tuma bɛɛ. Ale lo ye Nii [hakili] Senuman ye.” (Zan 14:14, 16, 17). O cogo la, Yezu y’u jigi sigi k’u bena hakili senu sɔrɔ, o min ye dɛmɛbaga ye. O lo kɛra Pentekɔte loon na.

Yezu ko: “Yanni waati dɔɔni diɲɛ mɔgɔw tena ne ye tugu, nga aw bena ne ye. Ne be nii na min kɛ, o la, aw fana bena to nii na.” (Zan 14:19). Yezu suu kununi kɔ, a bena a yɛrɛ yira u la. Nka, o dɔrɔn tɛ. Kɔfɛ, a bena u lakunu ka kɛ danfɛn yebaliw ye walisa u ka ɲɛnamaya kɛ n’ale ye sankolo la.

Sisan, Yezu be tiɲɛn kuma dɔ fɔ ko: “Mɔgɔ min ye ne ka kuma mɛn k’a bato, o tigi le be ne kanu. Mɔgɔ min be ne kanu, n Faa fana bena o tigi kanu, ne fana bena o tigi kanu ka ne yɛrɛ yira a la.” Ciden min tɔgɔ ko Zuda ani a be weele ko Tadi, ale ye ɲiningali kɛ ko: “Matigi, mun na e bena i yɛrɛ yira anw dama na n’i t’i yɛrɛ yira mɔgɔ tɔw la?” Yezu y’a jaabi ko: “Ni mɔgɔ min be ne kanu, o tigi bena ne ka kuma bato, n Faa bena o tigi kanu fana, . . . Mɔgɔ min te ne kanu, o tigi fana te ne ka kuma bato.” (Zan 14:21-24). Duniɲa mɔgɔw lanin t’a la ko Yezu lo ye sira, ni tiɲɛn ani ɲɛnamaya ye i ko Yezu ka kalandenw b’a miiri cogo min na.

Ni Yezu tagara, a ka kalandenw bena u hakili jigi a ka kalanw bɛɛ la cogo di? Yezu y’a ɲɛfɔ u ye ko: “Dɛmɛbaga, min ye Nii Senuman ye, n Faa bena min ci n tɔgɔ la, ale ben’aw kalan koo bɛɛ la, ani ne ye koo minw bɛɛ fɔ aw ye, a ben’aw hakili jigi o bɛɛ la.” O kuma y’u hakili sigi sabu Yezu ye kabako minw kɛ hakili senu barika la, u ɲɛɛ lara o kan. Yezu y’a fara a kan ko: “Ne be hɛrɛ le di aw ma, hɛrɛ min be bɔ ne fɛ, ne be o le di aw ma, . . . Aw hakili kana ɲagami, aw kana siran.” (Zan 14:26, 27). Kuun t’a la kalandenw hakili ka ɲagami sabu Yezu Faa bena u ɲɛminɛ ani k’u latanga.

Yanni dɔɔni u bena a ye ko Ala be se k’u latanga. Yezu y’a fɔ u ye ko: “Diɲɛ nin kuntigi be nana. A te se ne kɔrɔ.” (Zan 14:30). Sutana sera ka don Zuda la ani k’a sago kɛ n’a ye. Nka, fiɲɛ si tɛ Yezu la Sutana be se ka tɛmɛ min fɛ ka Yezu mabɔ Ala la. Sutana tɛ se k’a kɛ Yezu be to saya la fana. Mun na do? Yezu y’a fɔ ko: “[N’ Faa] ye min fɔ ne ye, ne b’o le kɛ.” Yezu tun lanin b’a la ko a Faa bena ale kunu ka bɔ saya la.—Zan 14:31.