Taga a kɔnɔkow lajɛ

Taga a kɔnɔnakow lajɛ

 SAPITIRI 110NAN

Yezu ka loon laban Alabatosoba kɔnɔ

Yezu ka loon laban Alabatosoba kɔnɔ

MATIYO 23:25–24:2 MARIKI 12:41–13:2 LUKA 21:1-6

  • YEZU BE DIINAN KUNTIGIW KƆRƆFƆ TUGUN

  • ALABATOSOBA BENA HALAKI

  • FIRIYAMUSO DƐSƐBAGATƆ DƆ BE WARIMISƐN DEEN FILA DON KƐSU KƆNƆ

Yezu siɲɛ laban lo ka na Alabatoso kɔnɔ. A bele be sariya karamɔgɔw ni Fariziɲɛw ka filankafoya bɔ kɛnɛ kan. Bɛɛ ɲɛɛ na, a y’a fɔ k’u ye filankafow ye. A ye ntalen kuma dɔ fɔ u koo la ko: “Aw be jifilen ni tasa kɔfɛlaw ko k’o gwɛ, k’a sɔrɔ benkanni ni miirijuguw le fanin be aw kɔnɔ. Fariziɲɛ fiɲɛntɔ, i ka filen kɔnɔ ko fɔlɔ, ka sɔrɔ k’a kɔfɛla ko.” (Matiyo 23:25, 26). Fariziɲɛw b’u janto kosɔbɛ u sawura koo la ani u b’u yɛrɛ saniya koɲuman ka kɛɲɛ n’u ka landakow ye. Nka, u ye mɔgɔ sifa min ye tigitigi, u t’u janto o la hali dɔɔni ani u t’u dusukun saniya.

U ka filankafoya be ye nin fɛ fana: u be kiraw ka kaburuw dilan ani k’u masiri. Nka i ko Yezu y’a fɔ cogo min na, olu lo ye “kira nunu fagabagaw deenw ye.” (Matiyo 23:31). U ka koow b’o lo yira sabu u be koo bɛɛ lajɛnnin kɛra walisa ka Yezu faga.—Zan 5:18; 7:1, 25.

Yezu y’a yira fɛɛn min bena o diinan kuntigiw sɔrɔ n’u ma nimisa. A ko: “Aw be i n’a fɔ saaw, fɔnfɔnniden nunu, aw ben’a kɛ cogo jumɛn na ka tila jahanama [zeyɛni, NW ]” . . . ma?” (Matiyo 23:33). Zeyɛni kɔrɔ ko Hinom kɛnɛba. U tun be ɲamaɲama jɛni yen. O ye tagamasiɲɛ ye min b’a yira ko sariya karamɔgɔw ni Fariziɲɛ minw ka jugu, olu bena halaki bugubugu.

Yezu ka kalandenw bena kɛ “hakilitigiw ani mɔgɔkalanninw” ye. Mɔgɔw bena u minɛ cogo di? Yezu y’o fɔ diinan kuntigiw ye ko: “Aw bena [ne ka kalanden dɔw] faga ka dɔw gwengwen lɔgɔ kan, ka dɔw bugɔ ni golokami ye kalansow kɔnɔ, ani aw bena tugu dɔw kɔ ka taga u tɔɔrɔ dugu wɛrɛw la. Mɔgɔtilennin minw fagara, olu fagako jalaki bena ben aw kan, k’a ta Abɛli ma, ale min tun ye mɔgɔtilennin ye, fɔɔ ka na se Barasi dencɛ Zakari ma, aw . . . ye min faga.” Yezu y’u lasɔmi ko: “Ne b’a fɔ aw ye tiɲɛ na k’olu fagako kunkow bena la bii mɔgɔw kan.” (Matiyo 23:34-36). O lo kɛra saan 70 la, tuma ma min na Ɔrɔmu sɔrɔdasiw ye Zeruzalɛmu halaki ani Yahutu waa caaman sara o sen fɛ.

Kojuguba min bena u sɔrɔ, Yezu kɛtɔ ka miiri o la, o y’a dusu kasi. A ko: “Zeruzalɛmukaw, Zeruzalɛmukaw, aw minw be kiraw faga, ka Ala ka cidenw bon ni kabakuru ye k’u faga, siɲɛ joli ne tun b’a fɛ k’aw lajɛn n kɔrɔ, i n’a fɔ sisɛ b’a deenw lajɛn a gaman kɔrɔ cogo min na, aw ma sɔn. Ayiwa, aw ka boon lakolon bena to aw fɛ.” (Matiyo 23:37, 38). Minw y’o kumaw mɛn, n’a sɔrɔ u b’u yɛrɛ ɲininga ko Yezu kaan be “boon” juman lo ma? Alabatosoba min be Zeruzalɛmu, yala a kaan b’o lo ma wa? A be mɔgɔw ɲɛɛ na ko Ala b’o Alabatoso tangara.

O kɔ, Yezu y’a fɔ ko: “Ne b’a fɔ aw ye ko aw tena ne ye tugu, fɔɔ loon min na aw ben’a fɔ ko: ‘Mɔgɔ min be nana [Jehova] tɔgɔ la, Ala ka barika don o la.’” (Matiyo 23:39). Kiraya kuma minw be sɔrɔ Zaburuw 118:26 kɔnɔ, a y’o kumaw lo fɔ ko: “Mɔgɔ min be nana Masaba tɔgɔ la, Ala ka barika don o la. An bena duba kɛ i ye k’an to Masaba ka soo kɔnɔ.” O kumaw bena fɔ, nka a gwɛnin lo k’o tɛna kɛ Zeruzalɛmu batosoba kɔnɔ sabu a bena halaki.

Wari kɛsu bilanin be yɔrɔ min na Alabatosoba kɔnɔ, Yezu tagara yen sisan. Woo dɔ b’o kɛsu sanfɛ ani mɔgɔw be se k’u ka niliw don yen. Yezu ɲɛɛ be Yahutu caaman na u be nili kɛra. Nafolotigiw be “wari caaman don o kɛsu kɔnɔ.” O kɔ, Yezu ye firiyamuso dɛsɛbagatɔ dɔ ye a ye “warimisɛn deen fila don yen.” (Mariki 12:41, 42). Siga t’a la, Yezu b’a lɔn k’o muso ye min don, o diyara Ala ye.

Yezu y’a ka kalandenw weele k’a fɔ u ye ko: “Tiɲɛ na, ne b’a fɔ aw ye ko firiyamuso dɛsɛbagatɔ nin ye wari min don kɛsu kɔnɔ, o ka ca ni mɔgɔ tɔw bɛɛ ta ye.” Cogo di do? A y’a ɲɛfɔ  ko: “Mɔgɔ tɔw ye dɔɔni dɔrɔn bɔ u ka nafolo la k’a di, nga ale kɔni n’a ka fantanya bɛɛ, a y’a cɛɛn bɛɛ di. A ma foyi to a kun ka kɛ dumuni sɔngɔ ye k’a sɔrɔ dumunifɛn si t’a fɛ.” (Mariki 12:43, 44). O firiyamuso ni diinan kuntigiw ka miiriyaw n’u ka kɛwalew tɛ kelen ye hali dɔɔni!

Nisan tile 11nan loon be ɲini ka ban. Yezu bɔra Alabatosoba kɔnɔ ani a tɛna segi ka na yen tugun. A ka kalanden dɔ y’a fɔ a ye ko: “Karamɔgɔ, soba nin lɔcogo filɛ ni kabakurubabaw ye dɛ!” (Mariki 13:1). Tiɲɛn na, Alabatoso lɔra ni kabakuru minw ye, u dɔw ka bon kosɔbɛ. O b’a to mɔgɔw b’a miiri ko barika b’a la ani ko a bena to yen kudayi. Yezu y’o kalanden jaabi ko: “I ɲaa be sobaba nunu na kɛ? Kabakuru si tena to a tɔɲɔgɔn kan, u bɛɛ bena walaka.” O kumaw ye Yezu ka kalandenw kabakoya kosɔbɛ.—Mariki 13:2.

O kɔ, Yezu n’a ka cidenw ye Sedirɔn kɔɔ tigɛ walisa ka taga Oliviyeyirikulu kan. Wagati dɔ la, ale ni Piyɛri, Andere, Zaki ani Zan kɛra ɲɔgɔn fɛ u dan na. K’u to o kulu kan, u be se ka Alabatosoba cɛɲumanba ye.