Taga a kɔnɔkow lajɛ

Taga a kɔnɔnakow lajɛ

 SAPITIRI 116NAN

Yezu b’a ka cidenw seenw ko

Yezu b’a ka cidenw seenw ko

MATIYO 26:20 MARIKI 14:17 LUKA 22:14-18 ZAN 13:1-17

  • YEZU B’A KA TƐMƐNKAN SELI LABAN KƐ N’A KA CIDENW YE

  • A B’A KA CIDENW SEENW KO WALISA K’U KALAN KOO DƆ LA

Ka kɛɲɛ ni Yezu ka cifɔlenw ye, Piyɛri ni Zan be Zeruzalɛmu ka ban walisa ka Tɛmɛnkan seli labɛn. Yezu ni ciden tan tɔɔw tagara u sɔrɔ yen. Tileben tuma lo ani u be jigira ka bɔ Oliviyeyirikulu kan. Sanni Yezu ka sa, a siɲɛ laban lo ka to o kulu kan ka Zeruzalɛmu dugu filɛ.

Dɔɔni o kɔ, Yezu n’a ka cidenw sera Zeruzalɛmu. U ka ɲi ka Tɛmɛnkan seli dumuni kɛ boonba min kɔnɔ, u tagara yen. U yɛlɛla boon sanfɛla la. O yɔrɔ tun labɛnna walisa Yezu ka Tɛmɛnkan seli kɛ n’a ka cidenw dama ye. Yezu tun kɔrɔtɔnin lo o loon ka se. A ko: “Ne tun b’a fɛ kosɔbɛ ka [Tɛmɛnkan seli] nin dumuni kɛ n’aw ye sanni ne be tɔɔrɔ.”—Luka 22:15.

Kabi saan caaman, mɔgɔw delinanko tun ye ka diwɛn jifilen dɔw di di mɔgɔw ma Tɛmɛnkan seli dumuni wagati la. Sisan, Yezu ye diwɛn ta ka barika la Ala ye ani k’a fɔ ko: “Aw k’a minɛ k’a min, bari ne b’a fɔ aw ye ko ne tena duvɛn min tugu ni Ala ka masaya ma se.” (Luka 22:17, 18). A gwɛnin lo ko Yezu satuma sera.

K’u to dumuni na, Yezu ye koo dɔ kɛ a ma deli ka min kɛ. A wulila k’a ka forokiya bɔ, ka fani wɛrɛ ta k’a cɛɛ siri n’o ye. O kɔ, a ye jii don minan dɔ kɔnɔ. Tuma caaman na, sotigi lo be labɛn kɛ walisa lonanw seenw ka ko. N’a sɔrɔ a ka baaraden dɔ lo b’o kɛ (Luka 7:44). Nka, komi sotigi tɛ yen u cɛ, Yezu yɛrɛ lo wulila k’o baara kɛ. A ka ciden dɔ tun be se k’a bɔ a yɛrɛ la k’o baara kɛ, nka u si m’o kɛ. Yala u bele be sanga ɲɔgɔn na wa? A ka kɛ min o min ye, u maloyara k’a ye ko Yezu lo b’u seen kora.

Yezu nana Piyɛri seen ko yɔrɔ tuma min na, Piyɛri y’a fɔ a ye ko: “E tena ne seen ko abada!” Yezu y’a fɔ a ye ko: “Ni ne m’i seen ko, i tena niyɔrɔ sɔrɔ ne fɛ.” A y’a fɔ Yezu ye ko: “A kana dan n seen dama ma, nga n bolo ni n kuun fana ko.” Yezu ka jaabili ye Piyɛri kabakoya. A ko: “Ni mɔgɔ min kora ka ban, o tigi mako t’a la ka ko tugu fɔɔ k’a seen dama le ko, bari a fari saniyanin lo ka ban. Aw gwɛnin lo, nga aw bɛɛ tɛ.”—Zan 13:8-10.

Yezu y’a ka ciden 12 nunu seenw ko, hali Zuda Isikariyɔti taw. O kɔ, Yezu y’a ka forokiya don ani ka sigi dumuni kun na tugun. A y’u ɲininga ko: “Ne ye koo min kɛ aw ye, aw y’o faamu wa? Aw be ne wele ko karamɔgɔ  ani Matigi, o bɛnnin lo, bari ne y’o le ye. Ni ne y’aw seen ko, ne min ye aw ka Matigi ni karamɔgɔ ye, aw fana ka kan ka ɲɔgɔn seen ko ten. Ne y’o kɛ janko k’o ɲaa yira aw la. Ne ye fɛɛn min kɛ aw ye, aw k’o ɲɔgɔn kɛ aw mɔgɔɲɔgɔnw ye. Tiɲɛ tiɲɛ na, ne b’a fɔ aw ye ko baaraden man fisa n’a kuntigi ye, walima ciden man fisa n’a cibaga ye. Sisan aw y’o koo lɔn, n’aw y’o koo nin kɛ, aw dagamuna.”—Zan 13:12-17.

O ye ɲɛyirali ɲuman yɛrɛ lo ye yɛrɛmajigilenya koo la! Yezu ka kalandenw man kan ka lɔyɔrɔba ɲini. U man kan k’a miiri k’u ka fisa ni tɔɔw ye ani ko tɔɔw lo ka kan ka baara kɛ olu ye. Nka, u ka ɲi ka Yezu ladegi. O kɔrɔ tɛ ka tɔɔw seen ko yɛrɛ yɛrɛ la, nka k’u yɛrɛ labila ka baara kɛ tɔɔw ye majigilenya la ani u tɛ mɔgɔ woloma.