Taga a kɔnɔkow lajɛ

Taga a kɔnɔnakow lajɛ

 SAPITIRI 131NAN

U ye Yezu gwengwe lɔgɔ kan

U ye Yezu gwengwe lɔgɔ kan

MATIYO 27:33-44 MARIKI 15:22-32 LUKA 23:32-43 ZAN 19:17-24

  • YEZU GWENGWENA LƆGƆ KAN

  • U YE FƐƐN MIN SƐBƐ K’A GWENGWE YEZU KUUN SANFƐ, MƆGƆW B’A LƆGƆBƆRA O KOSƆN

  • ƝƐNAMAYA MIN BENA KƐ ALIJƐNƐ KƆNƆ DUGUKOLO KAN, YEZU BE KUMA O KOO LA

U tagara ni Yezu ye yɔrɔ dɔ la, Zeruzalɛmu gɛrɛfɛ. U bena ale ni kojugukɛla fila faga o yɔrɔ la. U b’o yɔrɔ weele ko Gɔligota, wala Kungolo Yɔrɔ. Mɔgɔ be se ka to “yɔrɔjan” k’o yɔrɔ filɛ.—Mariki 15:40.

U bena o mɔgɔ saba minw faga, u y’u ka faniw bɔ u la. O kɔ, u ye diwɛn ɲagami ni kunakuna ye, k’o di u ma. A be komi Zeruzalɛmu musow lo y’o minnifɛn dilan. Mɔgɔ minw bena faga, Ɔrɔmukaw tɛ ban o minnifɛn ka di olu ma walisa k’u ka tɔɔrɔ dimiya nɔgɔya. Yezu y’o nɛnɛ tuma min na, a ma sɔn k’a min. Mun na do? A t’a fɛ foyi k’a bali ka kɛ a yɛrɛ kala ma o kɔrɔbɔliba wagati la. A b’a fɛ ka to ɲɛɛ na ani ka kantigiya kɛ fɔɔ ka taga se saya ma.

U ye Yezu la lɔgɔ kan (Mariki 15:25). O kɔ, sɔrɔdasiw ye puwɛntiw gwengwe a bolo n’a seenw na. Puwɛntiw y’a farisogo n’a fasaw sɔgɔ ka don, o dimi tɛ se ka lakali. Tuma min na u ye lɔgɔ nin wuli k’a lɔ, dɔ farala dimi kan sabu Yezu fari gwiliya b’a jolinɔw samana. O bɛɛ n’a ta, Yezu ma sɔngɔ sɔrɔdasiw kan. A yɛrɛ ye Ala deli u ye ko: “N Faa, yafa u ma bari u be min kɛra, u m’o lɔn.”—Luka 23:34.

Ɔrɔmukaw tun ka teli ka mɔgɔ fagakun sɛbɛ k’o gwengwe a kuun sanfɛ. Nka, Pilati ye min sɛbɛ k’o gwengwe Yezu kuun sanfɛ, o ye ko: “Nazarɛtika Yezu, zuwifuw ka masacɛ.” O kuma tun sɛbɛra Heburukan, Latɛnkan, ani Gɛrɛkikan na walisa mɔgɔ caaman ka se k’a kalan. Pilati y’a yira o sen fɛ ko a be Yahutuw mafiɲɛyara, olu minw ko fɔɔ Yezu ka faga. Sarakalasebagaw kuntigiw dusu tiɲɛna, u y’a fɔ Pilati ye ko: “Kan’a sɛbɛn ‘Zuwifuw ka masacɛ.” U ko a k’a sɛbɛ ko: “Cɛɛ nin ko ale ye zuwifuw ka masacɛ ye.” Nka, Pilati t’a fɛ u k’ale lafili tugun. O kama a y’u jaabi ko “ale ye min sɛbɛn ka ban, ko ale y’o sɛbɛn.”—Zan 19:19-22.

Sarakalasebagaw dimina. U tun ye Yezu jalaki koo min na u ka kititigɛlaw ɲɛfɛ, u segira o kan tugun. A tɛ bari an na k’a ye ko tɛmɛbagaw y’u kuun kɔmikɔmi ka Yezu lɔgɔbɔ ani k’a nɛni ko: “Anhaan! E min be se ka Alabatosoba ci k’a lɔ kura ye tile saba kɔnɔ, jigi ka bɔ gwengwenlɔgɔ kan k’i yɛrɛ kisi.” O cogo kelen na, sarakalasebagaw kuntigiw ani sariya karamɔgɔw y’a fɔ ɲɔgɔn ye ko: “N’a ye Ala ka Mɔgɔ wolomanin nin [o kɔrɔ, Krista] ye, Isirayɛli ka masacɛ, a ka jigi ka bɔ gwengwenlɔgɔ kan sisan. N’an ye o ye, an bena la a la.” (Mariki 15:29-32). U ye mɔgɔ minw gwengwe lɔgɔ kan Yezu kinibolo n’a numanbolo fɛ, olu fana tun b’a nɛnina hali k’a sɔrɔ Yezu kelenpe lo tun ye jalakibali ye u cɛma.

Ɔrɔmukaw ka sɔrɔdasi naani fana ye Yezu lɔgɔbɔ. N’a sɔrɔ u tun ye diwɛn kumunin dɔ min. K’u to lɔgɔbɔri la, u gwɛrɛla Yezu la ko u b’o diwɛn dɔ di a ma k’a sɔrɔ a tɛ se ka foyi minɛ. Min sɛbɛnin be Yezu kuun sanfɛ, o y’a to Ɔrɔmukaw be yɛlɛla Yezu la k’a fɔ ko: “N’i ye  zuwifuw ka masa ye, i yɛrɛ kisi.” (Luka 23:36, 37). Miiri k’a filɛ, mɔgɔ min ye sira, tiɲɛn ani ɲɛnamaya ye, u b’ale lo lɔgɔbɔra ani k’a tɔɔrɔ ten! Nka, a cɛsirinin lo k’o tɔɔrɔw bɛɛ muɲu. Yahutu minw b’a filɛra, Ɔrɔmukaw ka sɔrɔdasi minw b’a lɔgɔbɔra, ani mɔgɔjugu fila minw gwengwenin b’a gɛrɛfɛ, a ma olu si jalaki.

Sɔrɔdasi naani ye Yezu ka faniw tilan yɔrɔ naani. U ye kala fili walisa k’a lɔn min ka ɲi ka min ta. Yezu ka forokiya ye fani cɛɲumanba ye, “kalannɔ tun te min na.” Sɔrɔdasiw y’a fɔ ɲɔgɔn ye ko: “An kan’a faran, an ka kala la n’a bena kɛ mɔgɔ min ta ye, o ka lɔn.” O kɛra janko min fɔra Ala ka kuma na, o ka dafa. A tun fɔra ko: “U ye ne ka faniw tilan ɲɔgɔn cɛ, u ye kala la janko ka ne ka foroca sɔrɔbaga lɔn.”—Zan 19:23, 24; Zaburuw 22:19.

Wagati dɔ nana se, kojugukɛla minw tun gwengwenin be Yezu gɛrɛfɛ, olu dɔ y’a faamu ko Yezu ye masacɛ ye tiɲɛn na. A y’a tɔɲɔgɔn sɔngɔ ko: “E min b’o tɔɔrɔ ɲɔgɔn na, i te siran Ala ɲa! An kɔni ka kan ni tɔɔrɔ nin ye bari an ye kojugu kɛ, nga ale ma kojugu si kɛ.” O kɔ, a ye Yezu deli ko: “Matigi, n’i nana sigi i ka masaya la tuma min na, i k’i hakili to ne la.”—Luka 23:40-42.

Yezu y’a jaabi ko: “Tiɲɛn na, ne b’a fɔ i ye bi, i bena kɛ ni ne ye alijɛnɛ kɔnɔ.” A m’a fɔ ko a bena kɛ n’ale ye masaya la, nka a ko “alijɛnɛ kɔnɔ.” (Luka 23:43, NW). O layidu be dan na ni Yezu ye min ta n’a ka cidenw ye. A y’a fɔ olu ye k’u bena sigi masasigilanw kan n’ale ye (Matiyo 19:28; Luka 22:29, 30). N’a sɔrɔ o Yahutucɛ delila k’a mɛn ko Jehova tun ye alijɛnɛ kɛ dugukolo kan walisa Adama ni Awa ani u bɔnsɔn ka sigi o yɔrɔ la. O cɛɛ be se ka sa sisan sabu jigiya ɲuman b’a kɔnɔna.