Taga a kɔnɔkow lajɛ

Taga a kɔnɔnakow lajɛ

 SAPITIRI 97NAN

Ntalen, ɛrɛzɛnforo baarakɛlaw koo la

Ntalen, ɛrɛzɛnforo baarakɛlaw koo la

MATIYO 20:1-16

  • SƐNƐKƐLA MINW YE “KƆMƆGƆW” YE OLU KƐRA “ƝAMƆGƆW” YE

A ma mɛɛn, Yezu tun y’a fɔ a lamɛnbagaw ye Pere mara la ko: “Ɲamɔgɔ caaman bena kɛ kɔmɔgɔw ye, kɔmɔgɔ caaman bena kɛ ɲamɔgɔw ye.” (Matiyo 19:30). Sisan walisa k’a ka kumaw ɲɛfɔ, a ye ntalen dɔ la sɛnɛkɛlaw koo la minw be ɛrɛzɛnforo kɔnɔ. A ko:

“Sankolo masaya bɔnin be forotigi dɔ fɛ. A bɔra sɔgɔma joona ko a be sɛnɛkɛlaw ta k’u ci a ka foro kɔnɔ. A kɔnna ka minw sɔrɔ, a bɛnna n’olu ye ko a bena warigwɛ deen kelen d’u ma tile kɔnɔ, min ye tile kelen baara sara ye, ka sɔrɔ k’u ci a ka foro la. Tile gwanna dɔɔni, forotigi bɔra tugu ka dɔ wɛrɛw siginin ye yiriba kɔrɔ, u tun te baara la. A y’a fɔ olu fana ye ko: ‘Aw ye taga ne ka foro la ka baara kɛ, ni tile banna, ne bena aw sara.’ Olu tagar’a ka foro la. Tilefɛ, forotigi nin bɔra tugu ka mɔgɔ dɔw sɔrɔ, [minw] te baara la, tile sumana dɔɔni, a ye dɔ wɛrɛw sɔrɔ fana, k’u bɛɛ ci a ka foro la. Tile banna tuma min na, a ye mɔgɔ dɔ wɛrɛw ye tugu minw tun te baara la. A y’a fɔ olu ye ko: ‘Mun n’aw ye tile bɛɛ ban yan n’aw ma taga baara la?’ U y’a jaabi k’u ma baara sɔrɔ mɔgɔ si fɛ. A y’a fɔ olu ye k’u ka taga baara kɛ ale ka foro la.”—Matiyo 20:1-7.

N’a sɔrɔ Yezu lamɛnbagaw be miiri Jehova Ala koo lo la tuma min na Yezu kumana “Sankolo masaya” ni “forotigi” koo la. Bibulu b’a fɔ ko Jehova be i n’a fɔ forotigi, ɛrɛzɛnforo be min fɛ. O ɛrɛzɛnforo ye Israɛldenw tagamasiɲɛ lo ye (Zaburuw 80:9, 10; Ezayi 5:3, 4). Mɔgɔ minw be Musa ka sariya kɔrɔ, olu be i n’a fɔ ɛrɛzɛnforo baarakɛlaw. Nka, Yezu tɛ kumana koo tɛmɛninw na, a be kumana a ka wagati koo lo la.

Diinan kuntigiw, i n’a fɔ Fariziɲɛw, ka ɲi ka baara kɛ Ala ye tuma bɛɛ. U be i n’a fɔ mɔgɔ minw ye baara kɛ tile kuru bɛɛ kɔnɔ. U jigi b’a la ka sara dafanin sɔrɔ, o min ye warigwɛ kelen ye, o kɔrɔ tile kelen sara.

Olu fɛ, Yahutu tɔɔw tɛ baara kɛ Ala ye bɛrɛbɛrɛ. U b’u jati i n’a fɔ sɛnɛkɛla minw be baara kɛ Ala ka ɛrɛzɛnforo kɔnɔ tuma kelen kelen. Yezu ka ntalen na, o Yahutuw lo ye sɛnɛkɛla wɛrɛw ye, forotigi ye minw weele tuma min na “tile gwanna dɔɔni” (9h tuma). A ye dɔ wɛrɛw weele midi tuma, 3h tuma, ani wulafɛ 5h tuma.

Cɛɛw ni muso minw be tugu Yezu kɔ, diinan kuntigiw fɛ, olu ‘danganin’ lo (Zan 7:49). Mun na do? Sabu u y’u ka ɲɛnamaya fanba kɛ jɛgɛminɛ ani sɛnɛkɛ la. O n’a t’a bɛɛ, saan 29, ɔkutɔburu fan fɛ, “forotigi” ye Yezu ci k’o mɔgɔ majigininw weele u ka kɛ Krista ka kalandenw ye walisa ka baara kɛ Ala ye. Yezu ka ntalen na, olu lo ye mɔgɔ ‘labanw’ ye minw weelela baara la tile bannin kɔ, 5h tuma.

Yezu y’a ka ntalen kuncɛ ko: “Baara jigira tuma min na, forotigi y’a fɔ a ka baarakuntigi ye ko a ka baarakɛla nunu wele k’u ka sara d’u ma, k’a daminɛ minw tagara laban na fɔɔ ka taga bila fɔlɔ taw ma. Mɔgɔ minw tagara o y’a sɔrɔ tile banna, olu gwɛrɛla, a ye warigwɛ deen kelen kelen di olu bɛɛ ma. Mɔgɔ minw tagara sɔgɔmadafɛ, olu nana gwɛrɛ. U tun b’a miiri k’u bena sɔrɔli kɛ ka tɛmɛ dɔ nunu kan. Nga u kelen kelen bɛɛ ye warigwɛ deen kelen kelen le sɔrɔ. Olu y’u ka sara minɛ tuma min na, u tun be ŋunuŋunu forotigi kama. U tun b’a fɔra ko: ‘Nunu nana kɔfɛ, u yɛrɛ ma tile kelen baara kɛ ani u ma sigɛn i n’a fɔ anw. U ye baara kɛ waati dɔɔni dɔrɔn. Ele y’u ka sara kɛ kelen ye n’an ta ye.’ Forotigi y’a fɔ u kelen ye ko: ‘N teri, ne ma i tɔɲɔ. An tun ma bɛn a la ko ne bena i sara ni warigwɛ deen kelen ye wa? E k’i ka sara minɛ ka tɛmɛ ka bɔ yan. Mɔgɔ minw tagara baara la kɔfɛ, ne bena e ka sara ɲɔgɔn di olu bɛɛ ma. O tuma na, ne man kan ka n sago kɛ ni n ka wari ye wa, walima ne ye koɲuman min kɛ, o ɲagoya le b’i la?’ Yezu  tilara k’a fɔ ko: ‘O cogo kelen la, kɔmɔgɔw bena kɛ ɲamɔgɔw ye, ani ɲamɔgɔw bena kɛ kɔmɔgɔw ye.’”—Matiyo 20:8-16.

N’a sɔrɔ Yezu ka kumaw y’a ka kalandenw kabakoya. Yahutuw ka diinan kuntigi minw b’a miiri k’olu ye “ɲamɔgɔw” ye, kɔrɔ juman na olu bena kɛ “kɔmɔgɔw” ye? Kɔrɔ juman na Yezu ka kalandenw bena kɛ “ɲamɔgɔw” ye?

Fariziɲɛw ni tɔɔw b’a miiri ko Yezu ka kalandenw ye “kɔmɔgɔw” ye. Nka, Yezu ka kalandenw lo bena kɛ “ɲamɔgɔw” ye ani ka sara dafanin sɔrɔ. Yezu sanin kɔ, Ala bena ban Israɛl siya la ani ka jama kura sugandi, o min be weele ko “Ala ka Israɛl.” (Galatikaw 6:16, ABM; Matiyo 23:38). Zan Batizelikɛla kumana o jama koo la tuma min na a y’a fɔ ko mɔgɔw bena batize ni hakili senu ye. Mɔgɔ minw tun ye “kɔmɔgɔw” ye, olu lo tun bena kɔn ka batize o cogo la. Ani, u tun bena nɛɛma sɔrɔ ka kɛ Yezu ka seerew ye “fɔɔ ka taga se diɲɛ faan bɛɛ la.” (Kɛwaliw 1:5, 8; Matiyo 3:11). Yɛlɛmaniba min tun bena kɛ, n’a sɔrɔ Yezu ka kalandenw y’o faamu. N’o lo, u y’a faamu ko diinan kuntigiw bena kɛ “kɔmɔgɔw” ye ani n’a sɔrɔ u bena olu kɔniya kosɔbɛ.