Taga a kɔnɔkow lajɛ

Taga a kɔnɔnakow lajɛ

 SAPITIRI 39NAN

Yezu ka wagati mɔgɔw bena bɔnɛ sɔrɔ

Yezu ka wagati mɔgɔw bena bɔnɛ sɔrɔ

MATIYO 11:16-30 LUKA 7:31-35

  • YEZU BE DUGU DƆW JALAKI

  • A BE MƆGƆW DUSU LAFIYA

Yezu be bonyaba la Zan Batizelikɛla kan. Nka, mɔgɔw fanba be Zan jati cogo di? Yezu y’a fɔ ko: “Bii mɔgɔw . . . bɔnin be denmisɛnw fɛ minw siginin be kɛnɛba la ka to k’u kaan sama u tɔɲɔgɔnw ma ko: ‘Anw ye fɔli kɛ aw ye, aw ma dɔɔn kɛ. Anw ye sanga dɔnkili la, aw ma kasi fana.’”—Matiyo 11:16, 17.

Yezu b’a fɛ ka mun lo fɔ? A y’a ka miiriya ɲɛfɔ ko: “Zan nana, a te dumuni kɛ, a te minni kɛ, mɔgɔw ko jina b’a la. Mɔgɔ Dencɛ nana, a be dumuni kɛ ka minni kɛ, mɔgɔw ko cɛɛ nin ye nugubagatɔ ni dɔrɔtɔ ye. U ko lɛnpominɛlaw ni hakɛkɛlaw teri lo.” (Matiyo 11:18, 19). Zan ye ɲɛnamaya kɛ cogo nɔgɔman na i ko Naziricɛ, a tun tɛ diwɛn min. O n’a ta bɛɛ, mɔgɔw y’a fɔ ko jina b’a la (Nɔnburuw 6:2, 3; Luka 1:15). Nka, Yezu ye ɲɛnamaya kɛ i ko tɔɔw b’a kɛ cogo min na. Ale be dumuni kɛ ani a be minni kɛ k’a dama kɛɲɛ. Nka, mɔgɔw y’a jalaki ko nugubagatɔ ni dɔrɔtɔ lo. A be komi o mɔgɔw ka koo tun ka gwɛlɛ kojugu.

Yezu y’a fɔ ko a ka wagati mɔgɔw be i n’a fɔ denmisɛnw lɔgɔfiyɛ kɛnɛba la. U tɔɲɔgɔnw ye fɔli kɛ u ye, u ma dɔɔn kɛ. U ye sanga dɔnkili la, u ma kasi fana. Yezu ko: “Jo bɛ di Ala ka hakilitigiya ma a ka kɛtaw fɛ.” (Matiyo 11:16, 19, ABM). Yezu ni Zan ka “kɛtaw” b’a yira ka gwɛ ko mɔgɔw b’u jalaki koo minw na, o tɛ tiɲɛn ye.

Yezu y’a yira ko a ka wagati mɔgɔw dusu ka gwɛlɛ. O kɔ, a tun ye kabakow kɛ Korazɛn, Bɛtisayida ani Kapɛrnaum dugu minw na, a y’olu jalaki. Yezu y’a fɔ ko n’ale tun y’o kabakow ɲɔgɔn kɛ Fenisi mara la, Tiri ni Sidɔn duguw la, olu tun bena nimisa u ka jurumuw na. A kumana Kapɛrnaum dugu fana koo la. A tun siginin b’o yɔrɔ la kabi wagati damanin. Hali o dugumɔgɔw fanba ma mɛnni kɛ a fɛ. Yezu y’a fɔ o dugu koo la ko: “Ne b’a fɔ aw ye ko kiti loon na, Sodɔmukaw ka tɔɔrɔ bena nɔgɔya ka tɛmɛ aw ta kan.”—Matiyo 11:24.

O kɔ, Yezu ye barika la a Faa ye sabu a ye tiɲɛn kalan nafamanw dogo “lɔnnikɛlaw ni hakilitigiw la.” Nka, a y’u yira mɔgɔ majigininw na, olu minw be komi denmisɛnw (Matiyo 11:25). Yezu ye welekan lase o ɲɔgɔnna mɔgɔw ma ko: “Aw minw nii tɔɔrɔnin lo, ni sigɛn b’aw kan, aw ka na ne fɛ, ne bena lafiya di aw ma. Aw ka kɛ ne ka kalandenw ye [wala aw ka ne ka zuu la aw kaan na], bari ne sabalinin lo, n te mɔgɔ si dɔgɔya fana. N’aw sɔnna ne ka kuma ma, aw bena lafiya sɔrɔ, bari ne tena jɔnya ni sigɛn gwiliman la aw kan.”—Matiyo 11:28-30.

Yezu be lafiya di mɔgɔw ma cogo di? Diinan kuntigiw be tɛmɛ landakow fɛ ka doniw la mɔgɔw kun. Ɲɛyirali fɛ, u ye sariya caaman sigi lafiɲɛlon koo la. Nka, Yezu ye lafiya di mɔgɔw ma. A ye tiɲɛn fɔ mɔgɔw ye Ala koo la walisa k’u hɔɔrɔnya ka bɔ o landakow bolo. Mɔgɔ minw niin tɔɔrɔnin lo politikimɔgɔw bolo, ani minw dusu kasinin lo u ka jurumuw kosɔn, Yezu y’u dusu saalo fana. Tiɲɛn na, Yezu y’a yira u la u ka jurumuw be se ka yafa cogo min na ani cogo min na u be se ka bɛɛn sigi u ni Ala cɛ.

Minw bɛɛ sɔnna ka Yezu ka zuu la u kaan na, olu be se k’u yɛrɛkun di Ala ma ani k’u sankolola Faa bato. Ale ye kanutigi ani makaritigi Ala ye. N’an b’o kɛ, a ka nɔgɔ ka Ala bato sabu a ka cifɔlenw man gwɛlɛ.—1 Zan 5:3.