Taga a kɔnɔkow lajɛ

Taga a kɔnɔnakow lajɛ

 SAPITIRI 139NAN

Yezu bena alijɛnɛ sigi kokura dugukolo kan

Yezu bena alijɛnɛ sigi kokura dugukolo kan

1 KORƐNTIKAW 15:24-28

  • KOO MIN BENA KƐ SAGAW ANI BAAW LA

  • MƆGƆ CAAMAN BENA ƝƐNAMAYA KƐ ALIJƐNƐ KƆNƆ, DUGUKOLO KAN

  • YEZU LO YE SIRA NI TIƝƐN ANI ƝƐNAMAYA YE

Dɔɔni Yezu batizenin kɔ, a jugu dɔ y’a ɲini k’a bali k’a ka cidenya baara kɛ sanni a yɛrɛ k’o daminɛ. Tiɲɛn na, Sutana y’a ɲini siɲɛ caaman ka Yezu kɔrɔbɔ. Kɔfɛ Yezu y’a fɔ a koo la ko: “Diɲɛ nin kuntigi be nana. A te se ne kɔrɔ.”—Zan 14:30.

Yelifɛn dɔ la, ciden Zan y’a ye fɛɛn min be ‘Sogojuguba . . . sakɔrɔ, Sutana’ kɔnɔna. O jugu fariman tun bena gwɛn ka bɔ sankolo la, a “dimininba” sabu “a b’a lɔn ko a halakilon tɔɔ man jan tugu.” (Yirali 12:9, 12). Kerecɛnw lanin b’a la ko u b’o wagati lo la ani ko yanni dɔɔni, “Sogojugu. . . sakɔrɔ” bena datugu dingɛdunba kɔnɔ. A tɛna se ka foyi kɛ yen saan 1000 kɔnɔ. O tuma na, Yezu bena kuntigiya kɛ Ala ka Masaya kɔnɔ.—Yirali 20:1, 2.

O wagati la, mun lo bena kɛ dugukolo kan? Jɔn lo bena ɲɛnamaya kɛ yan? Ɲɛnamaya bena kɛ cogo di? Yezu yɛrɛ y’o ɲiningaliw jaabi. Yezu ye ntalen min la sagaw ni baaw koo la, a y’a yira fɛɛn min be mɔgɔ tilenninw kɔnɔna. Olu be i n’a fɔ sagaw ani u be Yezu balimaw dɛmɛ ani ka ɲuman kɛ u ye. Mɔgɔ tilenbaliw be i n’a fɔ baaw. Yezu y’a yira fana fɛɛn min b’u kɔnɔna. A y’a fɔ u koo la ko: “O mɔgɔjugu nunu [minw be i n’a fɔ baaw],” olu bena halaki bugubugu. Nka, “mɔgɔtilenninw bena don Ala ka hɛrɛ banbali yɔrɔ la.”—Matiyo 25:46.

O b’an dɛmɛ ka Yezu ka kumaw faamu, a tun ye min fɔ kojugukɛla dɔ ye min tun be gwengwenyiri kan a gɛrɛfɛ. Yezu tun y’a daa di a ka ciden kantigiw ma k’u bena Masaya kɛ n’ale ye sankolo la. Kojugukɛla min nimisara, Yezu m’a fɔ ko ale fana bena o duga ɲɔgɔn sɔrɔ. Nka, Yezu y’a daa di a ma ko: “I bena kɛ ne fɛ arijana na.” (Luka 23:43). O la, o cɛɛ bena nɛɛma sɔrɔ ka ɲɛnamaya kɛ alijɛnɛ na, o kɔrɔ,  zaradɛn cɛɲumanba kɔnɔ. Bi, minw be i n’a fɔ sagaw ani u bena ɲɛnamaya banbali sɔrɔ, olu fana bena kɛ alijɛnɛ kɔnɔ.

O bɛnnin lo ni ciden Zan ka fɔta ye. A y’a yira ɲɛnamaya bena kɛ cogo min na dugukolo kan. A ko: “Ala sigiyɔrɔ filɛ nin ye adamadenw cɛma. A bena to u cɛma, u bena kɛ a ka mɔgɔw ye, ale bena kɛ u ka Ala ye. A bena u ɲaji bɛɛ cɛ. Saya kɔni, o te yen tugu. Mɔgɔ tena sa, mɔgɔ tena kasi, mɔgɔ tena tɔɔrɔ tugu. Bari, diɲɛkura lo, kɔrɔman n’a kɔnɔnafɛnw bɛɛ tununa bugubugu.”—Yirali 21:3, 4.

Walisa o kojugukɛla ka ɲɛnamaya diyabɔ alijɛnɛ kɔnɔ, fɔɔ a ka lakunu ka bɔ suuw cɛma. Yezu y’a yira ka gwɛ ko ale kelen dɔrɔn lo tɛna lakunu. A y’a fɔ ko: “Waati bɛ na, mɔgɔ salen minnu bɛ kaburuw kɔnɔ, olu n’a kan mɛn. U na bɔ yen. Koɲumankɛlaw na kunun ɲɛnamaya kama, kojugukɛlaw na kunun kiri kama.”—Zan 5:28, 29, ABM.

Yezu ka ciden kantigiw ani mɔgɔ damanin minw bena ɲɛnamaya kɛ ni Yezu ye sankolo la, olu do? Bibulu b’a fɔ u koo la ko: “Olu bena kɛ Ala ni Krista ka sarakalasebagaw ye ka sigi masaya la n’a ye saan waa kelen nin kɔnɔ.” (Yirali 20:6). Minw bena kɛ Yezu ka marakɛɲɔgɔnw ye, olu tun ye cɛɛw ni musow ye dugukolo kan. O kama, u bena mɔgɔ minw mara dugukolo kan, u bena hinɛ u la ani k’u faamu.—Yirali 5:10.

O tuma na, Yezu bena a ka kunmabɔsara nafa lase adamadenw ma dugukolo kan ani k’u kisi jurumu ka nɔfɛkow ma. Yezu n’a ka marakɛɲɔgɔnw bena adamaden kantigiw dɛmɛ ka kɛ mɔgɔ dafaninw ye. Ala tun y’a fɔ Adama ni Awa ye k’u ka deenw wolo ka caya ka dugukolo fa. Adamadenw bena ɲɛnamaya diyabɔ i ko Ala tun b’a fɛ cogo min na a daminɛ na. An ye saya min sɔrɔ cɛɛn ye Adama fɛ, o yɛrɛ tɛna kɛ yen tugun!

O la, Jehova ye baara min kalifa Yezu ma, Yezu bena a bɛɛ kɛ k’a dafa. A ka saan waa kelen mara bannin kɔ, Yezu bena Masaya kɔsegi a Faa ma. O tuma na, Ala lo bena adamaden dafaninw mara. O b’a yira ko Yezu majiginin lo tiɲɛn na. Ciden Pol kumana o koo la ko: “Ni fɛɛn bɛɛ majigira Krista ye ka ban, o tuma na ale min ye Dencɛ ye, a ben’a yɛrɛ majigi Ala ye ale min ye fɛɛn bɛɛ majigi a ye. O la, Ala bena kuntigiya kɛ fɛɛn bɛɛ kunna.”—1 Korɛntikaw 15:28.

Ala sagonata nɔɔrɔman ye min ye, Yezu lɔyɔrɔ ka bon o koo la, siga t’o la. Ala sago bena to ka dafa fɔɔ abada. O la, Yezu bena kɛ i ko ale yɛrɛ tun y’a fɔ cogo min na ko: “Ne le ye sira, ni tiɲɛ, ani [ɲɛnamaya] ye.”—Zan 14:6.