Taga a kɔnɔkow lajɛ

Taga a kɔnɔnakow lajɛ

 SAPITIRI 65NAN

Yezu tagatɔ Zeruzalɛmu, a be mɔgɔw kalan sira kan

Yezu tagatɔ Zeruzalɛmu, a be mɔgɔw kalan sira kan

MATIYO 8:19-22 LUKA 9:51-62 ZAN 7:2-10

  • YEZU BADENW BE MIN MIIRI YEZU KOO LA

  • MASAYA BAARA KƆRƆTANIN LO COGO MIN NA

Kabi wagati damanin, Yezu b’a ka waajuli baara kɛra Galile sabu mɔgɔw b’a lamɛnna ka tɛmɛ Zude mɔgɔw kan. Ka fara o kan, tuma min na a tun ye cɛɛ banabagatɔ dɔ kɛnɛya lafiɲɛlon na Zeruzalɛmu, “zuwifuw tun b’a fɛ k’a faga.”—Zan 5:18; 7:1.

An be saan 32 lo la sisan, sɛtanburu wala ɔkutɔburu la ani Sumanladon ɲɛnagwɛ (wala Gwatakɔrɔsigi seli) surunyana ka ban. O ɲɛnagwɛ be kɛ tile wolonfila. A tile seeginan, jama be lajɛn ka Ala bato. O ɲɛnagwɛ be kɛ sɛnɛ wagati bannin kɔ ani o be sababu di mɔgɔw ma ka ninsɔndiya kosɔbɛ ani ka barika la Ala ye.

Yezu baden Zaki, Simɔn, Yusufu ani Zuda y’a fɔ a ye ko: “Bɔ yan ka taga Zude.” Yahutuw ka diinanko caaman be kɛ Zeruzalɛmu. Ɲɛnagwɛw be kɛ siɲɛ saba saan kɔnɔ ani n’o wagati sera, dugu be fa mɔgɔw la. O kama, Yezu badenw y’a fɔ a ye ko: “N’i b’a fɛ mɔgɔw k’i lɔn, e t’i ka kɛwaliw kɛ dogo la. I be kabakow kɛ cogo min na, taga i yɛrɛ yira diɲɛ na.”—Zan 7:3, 4.

Tiɲɛn na, Yezu baden naani nunu “yɛrɛ tun ma la a la” ko ale lo ye Masiya ye. U b’a fɛ le Yezu ka kabakow kɛ jama ɲɛɛ na minw nana fɛti la Zeruzalɛmu. Komi Yezu b’a lɔn farati min b’o la, a y’a fɔ u ye ko: “Adamadenw kɔni te se k’aw kɔniya. Nga u be ne kɔniya, bari ne be to k’a fɔ k’u ka kɛwaliw ka jugu. Aw yɛrɛ ka taga o ɲanagwɛ nin na, ne kɔni tena taga, bari ne ka waati ma se fɔlɔ.”—Zan 7:5-8.

Yezu badenw farala jama kan ka taga. Tile damanin o kɔ, Yezu n’a ka kalandenw fana tagara, nka u y’o tagama kɛ mɔgɔw ɲinɛ ma. Sira min be tɛmɛ Zurudɛn baji fan fɛ, u m’o ta sabu mɔgɔw ka teli ka tɛmɛ yen. Nka sira min be Samari mara cɛtigɛ ka sin Zeruzalɛmu, u y’o le ta. U mako bena kɛ jatigiya la Samari dugu dɔ la minkɛ, Yezu ye kalanden dɔw ci ka taga jatigiso ɲini u ye sanni u ka se. Mɔgɔw ka teli ka lonanw ladon. Nka komi Yezu n’a ka kalandenw be tagara Zeruzalɛmu Yahutuw ka ɲɛnagwɛko la, dugumɔgɔw banna ka siyɔrɔ di u ma. Zaki ni Zan dimina ani u y’a fɔ ko: “Matigi, i b’a fɛ an b’a kɛ tasuma be jigi ka bɔ sankolo la k’u halaki wa?” (Luka 9:54). Yezu y’u kɔrɔfɔ o kuma kosɔn. O kɔ, u tagara u ka sira fɛ.

K’u to sira kan, sariya karamɔgɔ dɔ y’a fɔ Yezu ye ko: “Karamɔgɔ, i mana taga yɔrɔ o yɔrɔ, ne bena tugu i kɔ.” Yezu y’a jaabi ko: “Dingɛ be kongowuluw fɛ, ɲaga be kɔnɔw fɛ, nga layɔrɔ te  Mɔgɔ Dencɛ tɔgɔ la.” (Matiyo 8:19, 20). Yezu b’a fɛ cɛɛ k’a lɔn le ko gwɛlɛyaw bena a sɔrɔ n’a kɛra ale ka kalanden dɔ ye. A be komi o cɛɛ fanin b’a yɛrɛ la. O kama, a banna o ɲɛnamaya kɛcogo la. An kelen kelen bɛɛ ka ɲi k’an yɛrɛ ɲininga ko: ‘A mana kɛ cogo o cogo, ne labilanin lo ka tugu Yezu kɔ wa?’

Yezu y’a fɔ cɛɛ wɛrɛ ye ko: “Tugu ne kɔ.” Cɛɛ y’a fɔ ko: “Matigi, a to ne be taga n facɛ suu don fɔlɔ.” Komi Yezu be cɛɛ ka koow lɔn, a y’a fɔ a ye ko: “A to suuw k’u ka suuw don. E kɔni, e ka taga Ala ka masaya koo fɔ.” (Luka 9:59, 60). O cɛɛ facɛ ma sa fɔlɔ. N’o tɛ, a tun tɛna lɔ ka kuma ni Yezu ye. Cɛɛ labilanin tɛ dɔrɔn le ka Ala ka Masaya kɛ a ɲɛnako fɔlɔ ye.

K’u to Zeruzalɛmu sira kan halibi, cɛɛ wɛrɛ y’a fɔ Yezu ye ko: “Ne bena tugu i kɔ, Matigi. Nga i b’a to ne be taga sara n ka somɔgɔw la fɔlɔ.” Yezu y’a jaabi ko: “Mɔgɔ o mɔgɔ be misidaba minɛ ko a be sɛnɛ kɛ, n’a be filɛli kɛ a kɔfɛ, o tigi man kan ni Ala ka masaya ye.”—Luka 9:61, 62.

Mɔgɔ o mɔgɔ b’a fɛ ka kɛ Yezu ka kalanden sɔbɛ ye, o tigi ka kan k’a ɲɛɛ lɔnin to Masaya baara lo kan. Mɔgɔ min be sɛnɛ kɛ ni misi ye, n’a tɛ to ka filɛri kɛ a ɲɛfɛ, a ka walan tɛna tilen. N’a ye misidaba to yen ka yɛlɛma k’a kɔɔ filɛ, baara tɛna taga ɲɛ. O cogo kelen na, mɔgɔ o mɔgɔ be yɛlɛma ka duniɲa nin ka koow filɛ, o tigi be se ka ɲɛnamaya banbali sira bila.