Taga a kɔnɔkow lajɛ

Taga a kɔnɔnakow lajɛ

 SAPITIRI 14NAN

Yezu y’a daminɛ ka mɔgɔw kɛ a ka kalandenw ye

Yezu y’a daminɛ ka mɔgɔw kɛ a ka kalandenw ye

ZAN 1:29-51

  • YEZU KA KALANDEN FƆLƆW TUGURA A KƆ

Yezu ye tile 40 kɛ kongokolon kɔnɔ ani a b’a fɛ ka taga Galile sisan. Nka sanni o cɛ, Zan min y’a batize, a kɔsegira ka taga ale fɛ. Zan Batizelikɛla ye Yezu natɔ ye ani a y’a fɔ bɛɛ ɲɛɛ na ko: “Ala ka Sagaden filɛ min be mɔgɔw ka hakɛw ban. N tun be ale lo koo fɔra ko mɔgɔ dɔ bena na ne kɔ min ka bon ni ne ye, bari sanni ne ka wolo, ale tun be yen.” (Zan 1:29, 30). Hali n’a ka kɔrɔ ni Yezu ye, Zan b’a lɔn ko Yezu tun ye mɛlɛkɛ ye sankolo la sanni ale yɛrɛ ka wolo.

Lɔgɔkun damanin ye nin ye, Yezu tun nana Zan fɛ walisa a k’a batize. N’a sɔrɔ o wagati la, Zan Batizelikɛla tun ma la a la ka ɲɛ ko Yezu ye Masiya ye. A ko: “Ne yɛrɛ tun t’a lɔn, ne nana ka to ka mɔgɔw batize jii la, waasa Isirayɛlidenw k’a lɔn.”—Zan 1:31.

O kɔ, koo minw kɛra Yezu batize tuma na, Zan y’o lakali a lamɛnbagaw ye. A ko: “Ne ye Nii Senuman [wala hakili senu] jigitɔ ye a kan ka bɔ sankolo la, i n’a fɔ tuganin, ka to a kan. Ne tun t’a lɔn, nga min ye ne ci ka na mɔgɔw batize jii la, ale y’a fɔ n ye ko ni ne ye Nii Senuman jigitɔ ye ka sigi min kan, k’o tigi lo bena mɔgɔw batize ni Nii Senuman ye. Ne y’o ye, o la ne ko ale lo ye Ala Deen ye.”—Zan 1:32-34.

O dugusagwɛ, Yezu tagara bɔ Zan Batizelikɛla ye tugun ani Zan tun be n’a ka kalanden fila ye. A y’a fɔ Yezu koo la ko: “Ala ka Sagaden filɛ nin ye.” (Zan 1:36). A ka kalanden fila nunu y’o kuma mɛn minkɛ, u tugura Yezu kɔ. Kelen tɔgɔ ko Andere. N’a sɔrɔ filanan lo ye Yezu ka maana nin sɛbɛ. Ale fana tɔgɔ ko Zan. Zebede ni Salome dencɛ lo. N’a sɔrɔ Salome tun ye Mariyamu balimamuso ye. O la, a be se ka kɛ k’o Zan ye Yezu tɛnɛmuso ka deen lo ye.

Yezu ye filɛli kɛ a kɔfɛ k’a ye ko Andere ni Zan be tugura ale kɔ ani a y’u ɲininga ko: “Aw be mun le ɲinina?”

U y’a jaabi ko: “Arabi, e ka yɔrɔ be min?”

Yezu ko: “Aw ye na, aw ben’a ye.”—Zan 1:37-39.

Wulafɛ 4h wagati tun lo ani Andere ni Zan ye wulada tɔɔ laban ni Yezu ye. O ye Andere ninsɔndiya fɔɔ a tagara a fɔ a balimacɛ Simɔn ye ko: “Anw ye Krista ye.” (Zan 1:41). O Simɔn tun be weele fana ko Piyɛri. Andere tagara ni Piyɛri ye Yezu fɛ. Kɔfɛ, koo dɔw kɛra minw b’a to an be se k’a fɔ ko ciden Zan fana tagara a balimacɛ Zaki weele. Nka Zan m’o koo lakali a ka Evanzili kɔnɔ.

O dugusagwɛ, Yezu ye Filipu ye. Filipu be bɔ Bɛtisayida dugu la. O dugu be Galile baji worodugu fan fɛ. Andere ni Piyɛri be bɔ o  dugu lo la fana. Yezu y’a fɔ Filipu ye ko: “Tugu ne kɔ.”—Zan 1:43.

Natanayɛli min be weele fana ko Baritelemi, Filipu tagara a fɛ k’a fɔ a ye ko: “Mɔgɔ min koo fɔnin be Musa ka sariya sɛbɛ ni kiraw ka sɛbɛw kɔnɔ, anw y’a ye. Nazarɛtika Yezu lo, Yusufu dencɛ.” Natanayɛli sigasigara ani a y’a fɔ Filipu ye ko: “Fɛnɲuman be se ka bɔ Nazarɛti wa?”

Filipu y’a gwan a kun, ko: “E ka na sa, e ben’a ye.” Yezu ye Natanayɛli natɔ ye minkɛ, a y’a fɔ ko: “Nin ye Isirayɛliden yɛrɛ ye tigitigi. Namaramɔgɔ tɛ.”

Natanayɛli y’a fɔ Yezu ye ko: “I ye ne lɔn min?”

Yezu y’a jaabi ko: “Sanni Filipu k’i wele, ne ɲaa tun b’i la torosun kɔrɔ.”

Natanayɛli kabakoyara ani a ko: “Karamɔgɔ, i ye Ala Deen ye, i ye Isirayɛli ka masa ye.”

Yezu y’a fɔ a ye tugun ko: “Ne y’a fɔ ko ne y’i ye torosun kɔrɔ minkɛ, o la, i lara ne la kɛ. I bena fɛɛn wɛrɛw ye minw bena tɛmɛ nin kan.” O kɔ, Yezu y’a daa di ko: “Tiɲɛ tiɲɛ na, aw bena sankolo dayɛlɛnin ye ka Ala ka mɛlɛkɛw yɛlɛtɔ n’u jigitɔ ye Mɔgɔ Dencɛ kan.”—Zan 1:45-51.

Dɔɔni o kɔ, Yezu n’a ka kalanden kuraw bɔra Zurudɛn jiginjigin la ka taga Galile mara la.