Taga a kɔnɔkow lajɛ

Taga a kɔnɔnakow lajɛ

 SAPITIRI 66NAN

Yezu be Zeruzalɛmu, gwatakɔrɔsigi seli la

Yezu be Zeruzalɛmu, gwatakɔrɔsigi seli la

ZAN 7:11-32

  • YEZU BE MƆGƆW KALAN ALABATOSO KƆNƆ

Yezu lɔnnin lo kosɔbɛ kabi a ka batɛmu tuma na. Yahutu caaman y’a ka kabakow ye ani o kibaro jɛnsɛnna jamana yɔrɔ bɛɛ la. Sisan Yezu be Zeruzalɛmu, Gwatakɔrɔsigi seli (Sumanladon ɲɛnagwɛ) la ani mɔgɔ caaman b’a yɔrɔ ɲinina.

Mɔgɔw be ɲɔgɔn sɔsɔra kosɔbɛ Yezu koo la. Dɔw ko: “Mɔgɔɲuman lo.” Nka dɔ wɛrɛw ko: “Jama kunnacɛnbaga lo.” (Zan 7:12). O ŋunuŋunu be kɛra ɲɛnagwɛ loon fɔlɔw le la. Nka mɔgɔ si tɛ fili ka kuma jama na ka Yezu dɛmɛ sabu bɛɛ be siran Yahutuw ka diinan kuntigiw ɲɛ.

Lɔgɔkun tilancɛ la, Yezu tagara don Alabatoso kɔnɔ. A be mɔgɔw kalanna cogo min na, o be mɔgɔ caaman kabakoya. Komi a ma kalan kɛ karamɔgɔbabaw fɛ, Yahutuw y’u yɛrɛ ɲininga ko: “A kɛra cogo di ka kɛ lɔnnikɛla ye ten, a do ma kalan mɔgɔ si fɛ.”—Zan 7:15.

Yezu y’a ɲɛfɔ u ye ko: “Ne be mɔgɔw kalan koo minw na, u ma bɔ ne fɛ, u bɔra ne cibaga le fɛ. Mɔgɔ min b’a fɛ ka Ala sago kɛ, o tigi ben’a lɔn ko ne ka kalan be bɔ Ala fɛ, ko ne yɛrɛ ka kuma tɛ.” (Zan 7:16, 17). Yezu ka kalan basiginin be Ala ka sariya lo kan. O kama, mɔgɔw tun ka kan k’a faamu ko a t’a fɛ mɔgɔw k’ale tando nka u ka Ala lo tando.

O kɔ, Yezu ko: “Musa le ma sariya di aw ma wa? K’a sɔrɔ aw si t’o sariya bato. Mun na aw b’a fɛ ka ne faga?” Mɔgɔ dɔw be jama cɛma, minw t’o kala ma. N’a sɔrɔ dugu wɛrɛ mɔgɔw lo. A ka gwɛlɛ u ma k’a faamu fɛɛn min kama mɔgɔw b’a fɛ ka karamɔgɔba nin ɲɔgɔn faga. O kama, u y’a miiri ko Yezu ka koow gwɛnin tɛ. U y’a jaabi ko: “E ye jinatɔ le ye. Jɔn le b’a fɛ k’i faga?”—Zan 7:19, 20.

A saan kelen ni tilan ye nin ye Yahutuw ka diinan kuntigiw y’a ɲini ka Yezu faga sabu a ye cɛɛ dɔ kɛnɛya lafiɲɛlon na. Sisan, Yezu ye ɲɛfɔli kɛ cogo barikaman dɔ la k’a yira u la k’u b’a fɛ ka min kɛ, o tilennin tɛ. A y’u hakili jigi ko Musa ka sariya sira fɛ, ni deen ye tile seegi sɔrɔ, a ka kan ka kɛnɛkɛnɛ, hali n’o loon be bɛn lafiɲɛlon ma. O kɔ, a y’u ɲininga ko: “Ka mɔgɔ kɛnɛkɛnɛ lafiɲɛlon na, n’o te Musa ka sariya cɛn, mun na aw be dimi ne kɔrɔ ko ne ye mɔgɔ kɛnɛya lafiɲɛlon na? Aw kana koo yeta dama filɛ ka mɔgɔ jalaki. Nga, aw k’o kɛ ni tilenninya ye.”—Zan 7:23, 24.

Zeruzalɛmuka dɔw b’u cɛma ani u b’o koo kala ma. U ye ɲɔgɔn ɲininga ko: “U [diinan kuntigiw] te cɛɛ nin le fagayɔrɔ ɲinina wa? A ye n’a be kumana kɛnɛ kan u do te foyi fɔra a ye. Yala an ka siya ɲamɔgɔw y’a lɔn sisan ko ale lo ye . . . [Krista] ye wa?” Mun na mɔgɔw lanin t’a la ko Yezu lo ye Krista ye? U lanin t’o la sabu u b’a fɔ ko: “Anw kɔni be nin bɔyɔrɔ lɔn. K’a sɔrɔ ni . . . [Krista] nana, mɔgɔ ten’a bɔyɔrɔ lɔn.”—Zan 7:25-27.

Yezu tora Alabatoso kɔnɔ k’u jaabi ko: “Tiɲɛ na, aw be ne lɔn, aw be n bɔyɔrɔ fana lɔn! K’a sɔrɔ ne ma na n yɛrɛ ma. Ne cibaga ye tiɲɛtigi ye, aw te ale lɔn. Nga ne be ale lɔn bari n bɔra ale lo fɛ, ale lo ye ne ci fana.” (Zan 7:28, 29). O kuma fɔnin kɔ, mɔgɔw y’a ɲini ka Yezu minɛ walisa k’a don kaso la wala k’a faga. Nka u ma se sabu Yezu ka saya wagati tun ma se fɔlɔ.

Mɔgɔ caaman limaniyara Yezu la. Joo b’u fɛ sabu Yezu tagamana jii kan, a ye fɔɲɔba mala, a ye jama balo ni buru ani jɛgɛ damanin ye, a ye senkelenninw, fiyentɔw, kunatɔw ani banabagatɔ wɛrɛw kɛnɛya, a yɛrɛ ye suuw kunu. O lo y’a to mɔgɔw ye  ɲɔgɔn ɲininga ko: “Ni . . . [Krista] nana tuma min na, yala a bena kabako dɔ wɛrɛw kɛ ka tɛmɛ cɛɛ nin ta kan wa?”—Zan 7:31.

Fariziɲɛw y’a mɛn jama b’o kumaw fɔra minkɛ, olu ni sarakalasebagaw kuntigiw ye mɔgɔw ci ka taga Yezu minɛ.