Taga a kɔnɔkow lajɛ

Taga a kɔnɔnakow lajɛ

 SAPITIRI 137NAN

Yezu y’a yɛrɛ yira mɔgɔ caamanba la sanni Pantekɔte loon ka se

Yezu y’a yɛrɛ yira mɔgɔ caamanba la sanni Pantekɔte loon ka se

MATIYO 28:16-20 LUKA 24:50-52 KƐWALIW 1:1-12; 2:1-4

  • YEZU Y’A YƐRƐ YIRA MƆGƆ CAAMAN NA

  • YEZU YƐLƐLA SANKOLO LA

  • YEZU YE HAKILI SENU JIGI A KA KALANDEN 120 KAN

Yezu kununin kɔ ka bɔ saya la, a ye labɛn kɛ walisa ale n’a ka ciden 11 ka ɲɔgɔn kunbɛn Galile kulu dɔ kan. Kalanden dɔ wɛrɛw fana nana. U tun ye mɔgɔ 500 ɲɔgɔn ye. A daminɛ na, u dɔw tun be sigasigara Yezu kununi koo la (Matiyo 28:17; 1 Korɛntikaw 15:6). Nka, Yezu bena min fɔ sisan, o bena u dɛmɛ ka la a la ko a be niin na tiɲɛn na.

Yezu y’a ɲɛfɔ ko Ala ye setigiya bɛɛ di ale ma sankolo la ani dugukolo kan. A y’u jija ko: “Aw ye taga siyaw bɛɛ kɛ ne ka kalandenw ye k’u batize Faa, ni Dencɛ ni Nii [hakili] Senuman tɔgɔ la, k’u kalan, waasa u ka ne ka kuma bato.” (Matiyo 28:18-20). Tiɲɛn na, Yezu be niin na. Nka o dɔrɔn tɛ, a b’a fɛ kibaro diiman ka fɔ mɔgɔw ye.

Yezu y’o cikan di a ka kalandenw bɛɛ ma: cɛɛw ni musow ani denmisɛnw. Mɔgɔ dɔw bena a ɲini k’u bali ka waajuli kɛ ani ka mɔgɔw kalan. Nka Yezu y’u hakili sigi ko: “Ala ye sebagaya bɛɛ di ne ma sankolo la ani dugukolo kan.” O kɔrɔ ko di Yezu ka kalandenw fɛ? Yezu y’a fɔ u ye ko: “Ne kɔni bena to n’aw ye loon o loon fɔɔ ka taga diɲɛ wili.” Yezu m’a fɔ ko minw bɛɛ b’u niin don waajuli baara la, u bɛɛ bena se ka kabakow kɛ. Nka, hakili senu bena u bɛɛ dɛmɛ.

Yezu kununin kɔ ka bɔ saya la, a y’a yɛrɛ yira a ka kalandenw la “siɲɛ caaman na tile bi naani kɔnɔ.” A m’a yɛrɛ yira u la farisogo kelen na. Nka, a ye dalilu barikaman caaman di u ma “janko u k’a lɔn ko ale kununna.” A y’u kalan fana “Ala ka masaya” koo la.—Kɛwaliw 1:3; 1 Korɛntikaw 15:7.

Ka Yezu ka cidenw to Galile, a y’a fɔ u ye k’u ka kɔsegi Zeruzalɛmu. A y’u ye o yɔrɔ la tuma min na, a y’a fɔ u ye ko: “Aw kana aw yɔrɔ jaɲa Zeruzalɛmu na, n Faa tun y’a daa di koo min na, aw ye to yen k’o makɔnɔ. Ne tun y’o kuma fɔ aw ye ko Zan ye mɔgɔw batize ni jii ye, nga yanni tile damani, aw bena batize ni Nii Senuman ye.”—Kɛwaliw 1:4, 5.

Kɔfɛ, Yezu n’a ka cidenw ye ɲɔgɔn ye tugun. A tagara n’u ye “fɔɔ Betani,” oliviyeyirikulu tilebɔ fan fɛ (Luka 24:50). Hali k’a sɔrɔ Yezu ye koo caaman fɔ u ye a tagako la, u bele b’a miiri ko a bena a ka Masaya sigi dugukolo kan le.—Luka 22:16, 18, 30; Zan 14:2, 3.

Cidenw ye Yezu ɲininga ko: “Matigi, sisan lo i bena Isirayɛli ka masaya sigi kura ye wa?” Yezu y’u jaabi ko: “O masaya nin koo ɲanabɔli t’aw ka sira la, o koow be n Faa kelenpe le bolo.” A ye baara min kalifa u ma, a sinsinna o kan ko: “Ni Nii Senuman jigira aw kan tuma min na, aw bena fanga sɔrɔ ka se ka n ka koow fɔ Zeruzalɛmu, ni Zude mara bɛɛ la, ani Samari mara la, fɔɔ ka taga se diɲɛ faan bɛɛ la.”—Kɛwaliw 1:6-8.

Cidenw be ni Yezu ye oliviyeyirikulu kan tuma min na a y’a daminɛ ka yɛlɛ sankolo la. Dɔɔni o kɔ, sankaba dɔ donna u cɛ, u m’a ye tugun. Sisan, Yezu tɛ adamaden cogoya la tugun. A kɛra danfɛn yebali ye walisa ka se ka yɛlɛ sankolo la (1 Korɛntikaw 15:44, 50; 1 Piyɛri 3:18). Ka cidenw “ɲaa basanin to sankolo la, u barila ka cɛɛ fila dɔ ye u gɛrɛfɛ fanigwɛ be u kaan na.” Mɛlɛkɛw lo minw ye adamadenw cogoya ta. U ye cidenw ɲininga ko: “Galilekaw! A kɛra di aw lɔnin be ka sankolo filɛ ten? Aw ye Yezu min yɛlɛtɔ ye [sankolo la], a bena segi ka na ten ka bɔ o yɔrɔ la.”—Kɛwaliw 1:10, 11.

Yezu ka kalanden kantigiw dɔrɔn lo y’a yɛlɛtɔ ye sankolo la, jama ma bɔ o koo kala ma. A bena “segi ka na ten” le fana. O kɔrɔ, a ka kalanden kantigiw dɔrɔn lo bena bɔ o kala ma.

Cidenw kɔsegira Zeruzalɛmu. Loon minw tugura o kɔ, u ye ɲɔgɔn lajɛn ni kalanden tɔɔw  ye. “Yezu baa Mariyamu tun be u cɛma, ani Yezu dɔgɔninw.” (Kɛwaliw 1:14). U tun jijanin lo Aladeli la. U ye delili kɛ fana walisa Ala k’u dɛmɛ ka kalanden dɔ sugandi ka bila Zuda Isikariyɔti nɔɔ na. O cogo la, cidenw tun bena kɛ mɔgɔ 12 ye tugun (Matiyo 19:28). U tun b’a fɛ a tigi ka kɛ Yezu ka kalanden dɔ ye min ye Yezu ka baaraw n’a sukununi ye. U ye kala la walisa ka Ala sago lɔn o koo la. Bibulu siɲɛ laban lo ka kuma kala lali koo la (Zaburuw 109:8; Talenw 16:33). Kala y’a yira ko Matiyasi lo sugandira. O cogo la, a “farala ciden tan ni kelen nunu kan.” Yezu tun ye kalanden 70 minw ci ka taga waajuli kɛ, n’a sɔrɔ Matiyasi tun b’u cɛma.—Kɛwaliw 1:26.

Tile tan Yezu yɛlɛnin kɔ sankolo la, saan 33 ka Pantekɔte fɛti loon sera. Yezu ka kalanden 120 ɲɔgɔn lajɛnna sangaso dɔ kɔnɔ Zeruzalɛmu. Mankanba dɔ barila ka boon bɛɛ fa. O mankan tun be i n’a fɔ fɔɲɔba mankan. U ye fɛɛn dɔw ye i n’a fɔ tasuma, a tilantilanna ka jigi u kelen kelen bɛɛ kuun na. Kalandenw bɛɛ y’a daminɛ ka kaan wɛrɛw fɔ. Hakili senu jigira u kan i ko Yezu tun y’a fɔ cogo min na!—Zan 14:26.