Taga a kɔnɔkow lajɛ

Taga a kɔnɔnakow lajɛ

 SAPITIRI 100NAN

Yezu ye ntalen min la sanukuru tan koo la

Yezu ye ntalen min la sanukuru tan koo la

LUKA 19:11-28

  • YEZU YE NTALEN MIN LA SANUKURU TAN KOO LA

Yezu be tagara Zeruzalɛmu. Nka, a be komi ale n’a ka kalandenw bele be Zase ka soo kɔnɔ. A ka kalandenw b’a miiri ko yanni dɔɔni, “Ala ka masaya” bena sigi ani Yezu bena kɛ a Masacɛ ye (Luka 19:11). Yezu ye min fɔ o Masaya ani a yɛrɛ saya koo la, u m’o faamu ka ɲɛ. O kama, Yezu ye ntalen dɔ la walisa k’u dɛmɛ u k’a faamu k’o Masaya tɛna sigi sisan.

A ko: “Faamanden dɔ tagara jamanajan dɔ la walisa ka masaya sɔrɔ ani ka kɔsegi.” (Luka 19:12, NW). O voyazi tun bena mɛɛn. Siga t’a la, Yezu lo ye o “faamanden” ye min “tagara jamanajan” dɔ la, o kɔrɔ sankolo la. O yɔrɔ la, a Facɛ bena a kɛ Masacɛ ye.

O ntalen na, sanni o “faamanden” ka taga, a y’a ka baaraden mɔgɔ tan weele ani ka sanukuru kelen kelen di u bɛɛ ma. A y’a fɔ u ye “k’u ka jago kɛ n’o ye fɔɔ ale ka taga ka na.” (Luka 19:13). Sanukuru ye fɛɛn sɔngɔ gwɛlɛ lo ye. A sɔngɔ be forokɔnɔ baarakɛla ka kalo saba sara bɔ.

N’a sɔrɔ Yezu ka kalandenw y’a faamu k’olu lo y’o baaraden mɔgɔ tan nunu ye sabu Yezu tun kɔnna k’u suma ni sumantigɛlaw ye (Matiyo 9:35-38). Tiɲɛn lo ko Yezu m’a ɲini u fɛ k’u ka taga suman tigɛ yɛrɛ yɛrɛ la. Nka, o sumantigɛ tun ye ka mɔgɔ wɛrɛw dɛmɛ, olu fana ka kɛ Krista ka kalandenw ye walisa u ka mara kɛ Ala ka Masaya kɔnɔ. Kalandenw ye u bololafɛnw, u ka wagati ani u ka fanga bɛɛ kɛ k’o baara dafa.

Yezu ye mun lo fɔ tugun o ntalen na? A ko faamanden nin “koo tun man di a ka jamana mɔgɔw ye. A taanin kɔ, olu ye mɔgɔw bila ka taga fɔ masacɛba ye k’olu t’a fɛ cɛɛ nin be kɛ u ka masa ye.” (Luka 19:14). Yezu ka kalandenw tun b’a lɔn ko Yahutuw ma sɔn Yezu la, dɔw yɛrɛ y’a ɲini k’a faga. Yezu sanin kɔ ani a taganin kɔ sankolo la, Yahutuw fanba y’a ka kalandenw tɔɔrɔ. O cogo la, u y’a yira ko u t’a fɛ Yezu ka kɛ u ka Masacɛ ye.—Zan 19:15, 16; Kɛwaliw 4:13-18; 5:40.

Baaraden mɔgɔ tan nunu ye mun lo kɛ n’u ka sanukuruw ye sanni faamanden ka “masaya sɔrɔ ani ka kɔsegi”? Yezu ko masaya sɔrɔnin kɔ, faamanden “segira ka ta’a ka jamana na. A tun ye sanukuru di a ka baaraden minw ma, a ye mɔgɔ bila ka taga olu wele. U ye tɔnɔ minw sɔrɔ, a tun b’a fɛ k’o lɔn. Baaraden min kɔnna ka na, ale y’a fɔ masacɛ ye ko: ‘I ye sanukuru min di ne ma, ne y’a ɲɔgɔn tan sɔrɔ tɔnɔ ye.’ Masacɛ y’a fɔ a ye ko: ‘O ɲana, i ye baaradenɲuman ye. I kɛra mɔgɔsɔbɛ ye kofitini na minkɛ, n b’i sigi dugu tan kunna.’ Baaraden min tugura, ale y’a fɔ masacɛ ye ko: ‘I ye sanukuru min di ne ma, ne ye a ɲɔgɔn duuru sɔrɔ tɔnɔ ye.’ Masacɛ y’a fɔ o fana ye ko: ‘N b’i sigi dugu duuru kunna.’”—Luka 19:15-19.

I ko baaraden ɲumanw, Yezu ka kalandenw ka ɲi ka baara kɛ bɛrɛbɛrɛ n’u bololafɛnw, u ka wagati ani u ka fanga ye walisa ka mɔgɔ caaman dɛmɛ u ka kɛ Krista ka kalandenw ye. N’u y’o kɛ, u be se ka la a la ko u koo bena diya Krista ye ani a bena u duga u ka kisɛya kosɔn. Tiɲɛn lo ko Yezu ka kalandenw bɛɛ ka koow cogoya ani u ka setigiya tɛ kelen ye. Nka, Yezu siginin kɔ Masaya la, u ye jijali min kɛ waajuli baara la, a tɛna ɲinɛ o kɔ, ani a bena u duga o kosɔn.—Matiyo 28:19, 20.

Walisa k’a ka ntalen kuma kuncɛ, Yezu ye baaraden wɛrɛ kofɔ min ka kokɛcogo be dan na tɔɔw la. A ko: “[Baaraden] wɛrɛ nana k’a fɔ masacɛ ye ko: ‘I ye sanukuru min di ne ma, o filɛ nin ye. Ne tun y’a don [fani kɔnɔ] k’a mara ka ɲa. Ne tun be siran i ɲa bari i ka koo ka gwɛlɛ. I ma fɛɛn min kalifa mɔgɔ ma, i b’o le koo ɲininga a tigi fɛ. I ma danni kɛ foro min na, i b’o yɔrɔ lo suman tigɛ.’ Masacɛ y’a fɔ a ye ko: ‘Baaradenjugu, ne bena i kiti ka kɛɲɛ n’i yɛrɛ ka kuma ye. I tun y’a lɔn ko ne ka koo ka gwɛlɛ, ko ne ma fɛɛn min kalifa, ko n b’o lo koo ɲininga, ko ne ma danni kɛ foro min na, ko n b’a fɛ o  suman be kɛ n ta ye. Mun na i ma ne ka sanu kalifa warimaralaw ma? N’i tun y’o kɛ, ne tun bena segi ka na n ka sanu n’a tɔnɔ sɔrɔ.’ O kɔ, minw tun be yen, masacɛ y’a fɔ olu ye k’u ka sanukuru nin bɔsi a la, k’a di tantigi ma.”—Luka 19:20-24.

Komi o cɛɛ ma sɔn ka baara kɛ ani ka tɔnɔ sɔrɔ, o kama, o kɛra bɔnɛ ye a ma. Cidenw kɔrɔtɔnin lo Yezu ka sigi Ala ka Masaya kun na. O kama, Yezu ye min fɔ baaraden laban koo la, n’a sɔrɔ o ye kalandenw dɛmɛ k’a faamu ko n’u ma jijaliba kɛ, u tɛna mara kɛ ni Yezu ye.

Siga t’a la, Yezu ka kumaw ye kalanden kantigiw jija u ye dɔ fara u ka kisɛya kan. Yezu y’a ka ntalen kuma kuncɛ ko: “Ne b’a fɔ aw ye ko fɛɛn be mɔgɔ min fɛ, dɔ bena d’o tigi ma ka fara a ta kan, nga fɛɛn te min fɛ, hali dɔɔni min b’a fɛ, o bena bɔsi a la.” A y’a fɔ fana ko a jugu minw t’a fɛ ale “ka kɛ u ka masacɛ ye,” olu bena halaki. O kɔ, Yezu ye sira minɛ ka taga Zeruzalɛmu.—Luka 19:26-28.