Taga a kɔnɔkow lajɛ

Taga a kɔnɔnakow lajɛ

 SAPITIRI FƆLƆ

Cikan fila ka bɔ Ala yɔrɔ

Cikan fila ka bɔ Ala yɔrɔ

LUKA 1:5-33

  • MƐLƐKƐ GABIRIYƐLI YE ZAN BATIZELIKƐLA WOLOKO FƆ

  • GABIRIYƐLI KO MARIYAMU LO BENA YEZU WOLO

An b’a jati ko Bibulu kuru bɛɛ ye cikan ye min bɔra Ala yɔrɔ. An sankolola Faa y’o cikan di an ma walisa k’an kalan. Nka, a saan 2000 ni kɔ ye nin ye, Ala tɛmɛna mɛlɛkɛ Gabiriyɛli fɛ ka cikan kabakoman fila lase mɔgɔw ma. An k’u lajɛ. A fɔra o mɛlɛkɛ koo la ko a be “lɔ Ala ɲakɔrɔ.” (Luka 1:19). Mɛlɛkɛ y’o cikan kabakomanw lase mɔgɔw ma koo jumanw sen fɛ?

Gabiriyɛli y’a ka cikan fɔlɔ lase saan 3nan fan fɛ, ka kɔn Krista Tile Ɲɛ (K.T.Ɲ). A y’o cikan di min? Zude mara kuluyɔrɔw la, n’a sɔrɔ Zeruzalɛmu gɛrɛfɛ. Jehova ka sarakalasebaga dɔ b’o yɔrɔ la, a tɔgɔ ko Zakari. Ale n’a muso Elizabɛti kɔrɔla ka ban ani deen tɛ u fɛ. Sisan, wagati sera Zakari fɛ k’a ka sarakalasebaara kɛ Alabatoso kɔnɔ Zeruzalɛmu. K’a to Alabatoso kɔnɔ, mɛlɛkɛ Gabiriyɛli barila k’a yɛrɛ yira a la, wusulan jɛniyɔrɔ gɛrɛfɛ.

Zakari hakili ɲagamina siranya kosɔn. Nka mɛlɛkɛ y’a hakili sigi k’a fɔ a ye ko: “Zakari, kana siran, bari i ka daalili minɛna. I ka muso bena dencɛ wolo i ye, i k’a tɔgɔ la ko Zan.” O kɔ, Gabiriyɛli y’a fɔ a ye ko Zan ‘bena kɛ mɔgɔba ye Matigi [Jehova] ɲakɔrɔ’ ani ko “a bena jama labɛn k’a bila Matigi [Jehova] ye.”—Luka 1:13-17.

Nka, Zakari ma la o kumaw na. Mun na do? Sabu ale n’a muso kɔrɔla ka ban. O kosɔn Gabiriyɛli y’a fɔ a ye ko: “I bena kɛ bobo ye, fɔɔ ka taga se nin koow kɛwaati ma, bari i ma la ne ka kuma na.”—Luka 1:20.

O y’a sɔrɔ jama min be kɛnɛma, olu y’a daminɛ k’u yɛrɛ ɲininga ko mun na Zakari mɛɛnna Alabatoso kɔnɔ ten. A laban a bɔra, nka a tɛ sera ka kuma tugun. A be se ka tagamasiɲɛw kɛ n’a bolow dɔrɔn ye. Siga t’a la, a ye yelifɛn dɔ lo ye Alabatoso kɔnɔ.

Zakari tilara a ka baara la Alabatoso kɔnɔ tuma min na, a kɔsegira a ka soo. Dɔɔni o kɔ, Elizabɛti ye kɔnɔ ta! A y’a mabɔ mɔgɔw la ani a tora soo kɔnɔ kalo duuru kɔnɔ fɔɔ ka taga se a jigituma ma.

O kɔ, Gabiriyɛli y’a yɛrɛ yira siɲɛ filanan na. A y’a yɛrɛ yira jɔn lo la do? A y’a yɛrɛ yira npogotigi dɔ la min tɔgɔ ko Mariyamu. Mariyamu tun be Nazarɛti dugu la, Galile mara la, Zeruzalɛmu saheli fan fɛ. Mɛlɛkɛ ye mun lo fɔ a ye do? A ko: “I koo diyara Ala ye. A filɛ, i bena kɔnɔ ta ka dencɛ wolo, i k’a tɔgɔ la ko Yezu.” O kɔ, Gabiriyɛli y’a fɔ Yezu koo la ko: ‘A bena kɛ mɔgɔba ye, a bena wele Fɛɛn bɛɛ kuntigi Ala Dencɛ. . . . A bena sigi masaya la Isirayɛlidenw kunna fɔɔ tuma bɛɛ, a ka masaya tena ban abada.’—Luka 1 :30-33.

Miiri k’a filɛ a diyara Gabiriyɛli ye cogo min na k’o cikan fila lase o mɔgɔw ma. N’an y’a ɲini ka dɔ lɔn tugun Zan ni Yezu koo la, an bena a faamu fɛɛn min kama o cikanw kɔrɔtanin lo ten.