Taga a kɔnɔkow lajɛ

Taga a kɔnɔnakow lajɛ

 SAPITIRI 107NAN

Masacɛ dɔ be mɔgɔw weele ka na kɔɲɔya dumuni dɔ la

Masacɛ dɔ be mɔgɔw weele ka na kɔɲɔya dumuni dɔ la

MATIYO 22:1-14

  • NTALEN MIN LARA KƆƝƆYA DUMUNI KOO LA

Yezu ka cidenya baara be tagara a laban na. A bele b’a la ka ntalenw la walisa ka sariya karamɔgɔw ni sarakalasebagaw kuntigiw ka filankafoya bɔ kɛnɛ kan. O kosɔn, u b’a fɛ k’a faga (Luka 20:19). Nka o tɛ Yezu bali. A be ntalen wɛrɛ la.

Yezu ko: “Sankolo masaya be i ko masacɛ dɔ ta, min y’a deen ka kɔɲɔya dumuni laben. A tun y’o dumuni ko fɔ minw ye, a y’a ka baaradenw ci k’u ka taga olu wele, nga olu tun t’a fɛ ka na.” (Matiyo 22:2, 3). Walisa k’a ka ntalen dadon, Yezu kumana “sankolo masaya” koo la. O b’a yira ko “masacɛ” min kofɔra, o ka kan ka kɛ Jehova Ala lo ye. Nka jɔn lo ye masacɛ dencɛ ye? Mɔgɔ minw weelela o kɔɲɔya dumuni na, olu ye jɔn lo ye? A ka nɔgɔ k’a faamu ko masacɛ dencɛ tɛ mɔgɔ wɛrɛ ye Jehova Dencɛ Yezu kɔ. Mɔgɔ minw weelela o dumuni na, o ye minw bena Masaya kɛ ni Jehova Dencɛ ye sankolo la.

U kɔnna ka jɔn lo weele o dumuni na? Yezu ni cidenw be Masaya kibaro kofɔra mɔgɔ jumanw lo ye? Yahutuw lo (Matiyo 10:6, 7; 15:24). Saan 1513 ka kɔn Krista tile ɲɛ, Ala tun ye layidu ta ni Yahutuw ye sabu u tun sɔnna k’u bena Musa ka sariya labato. O cogo la, nɛɛma tun dira u ma ka kɛ “sarakalasebaa masamaw” ye (Ɛkizɔdi 19:5-8, ABM). Nka u weelela ka na “kɔɲɔ dumuni” na wagati tigitigi juman le la? O daminɛna saan 29 la, tuma min na Yezu y’a daminɛ ka sankolo Masaya kibaro weleweleda.

Nka Israɛldenw fanba y’o weeleli jati cogo di? I ko Yezu y’a fɔ cogo min na, “olu tun t’a fɛ ka na.” Diinan kuntigiw ani mɔgɔ caaman ma sɔn a ma ko Ala ye mɔgɔ min sugandi k’a kɛ Masiya ani Masacɛ ye, o ye Yezu lo ye.

Yezu y’a yira k’o bɛɛ n’a ta, sababu wɛrɛ bena di Yahutuw ma. A ko: “[Masacɛ] y’a ka baaraden dɔ wɛrɛw ci tugu k’u ka taga fɔ mɔgɔ nunu ye ko: ‘Ne ye dumuni bɛɛ labɛn ka ban. Ne ye n ka turaw ani n ka begɛn tulɔninw faga ka ban. Fɛɛn bɛɛ labɛnna, aw ye na o dumu.’ Nga minw welela, olu ma miiri u welekun na. U  tagara u ɲana taw la: Dɔ tagar’a ka foro la, dɔ fana tagar’a ka jago kɛyɔrɔ la. Tɔɔ nunu ye baaradenw minɛ k’u tɔɔrɔ kosɔbɛ ani k’u faga.” (Matiyo 22:4-6). O le bena na kɛ tuma min na kerecɛn kafo bena sigi sen kan. O wagati la, Yahutuw bele bena sababu sɔrɔ ka kɛ Ala ka Masaya la. Nka u fanba tɛna sɔn o weeleli ma. U yɛrɛ bena masacɛ ka “baaradenw . . . tɔɔrɔ.”—Kɛwaliw 4:13-18; 7:54, 58.

Mun lo bena u ka siya sɔrɔ o kosɔn? Yezu y’o lakali ko: “Masacɛ dimina kosɔbɛ, a y’a ka sɔlidasiw ci ka taga o mɔgɔfagala nunu halaki ani ka u ka dugu jɛni.” (Matiyo 22:7). O lo ye Yahutuw sɔrɔ saan 70 wagati la tuma min na Ɔrɔmukaw ye “u ka dugu” Zeruzalɛmu halaki.

Komi Yahutuw banna ka na masacɛ ka weeleli la, yala a bena ta o ma ka ban ka mɔgɔ wɛrɛw weele tugun wa? Ayi. Yezu y’a fɔ a ka ntalen na ko: “O kɔ, [Masacɛ] y’a fɔ a ka baaraden dɔ wɛrɛw ye ko: ‘Kɔnyɔya dumuni labɛnna ka ban, nga minw tun welela, olu tun man kan n’a ye. Aw ye taga sirabaw daa la, n’aw ye mɔgɔ o mɔgɔ sɔrɔ, aw k’u wele, u ka na dumuni nin dumu.’ Baaraden nunu tagara sira daaw la. U ye mɔgɔ o mɔgɔ sɔrɔ yen, u y’u wele, a ɲumaman fara jugumanw kan, fɔɔ kɔɲɔya dumuni labɛnna soo min kɔnɔ, o fara.”—Matiyo 22:8-10.

O kumaw tun bena na dafa tuma min na ciden Piyɛri bena siya wɛrɛ mɔgɔw dɛmɛ u ka kɛ kerecɛnw ye: mɔgɔ minw tɛ Yahutu ye ani u ma tuubi ka don Yahutu diinan na. Saan 36 wagati la, hakili senu jigira Ɔrɔmukaw ka sɔrɔdasiw kuntigi Kɔrinɛyi n’a ka somɔgɔw kan. O cogo la, u ye sababu sɔrɔ ka kɛ sankolo Masaya mɔgɔ dɔw ye, Yezu ye min kofɔ.—Kɛwaliw 10:1, 34-48.

Yezu y’a yira ko minw bɛɛ nana kɔɲɔya dumuni na, “masacɛ” tɛna sɔn u bɛɛ la. A ko: “Masakɛ donna ka o mɔgɔw filɛ, a ye cɛ dɔ sɔrɔ yen min ma kɔɲɔ fini don. A ko: ‘Ne teri, i donna yan cogo di k’a sɔrɔ kɔɲɔ fini tɛ i kan na?’ O cɛ ma jaabili si kɛ. O la, masakɛ y’a fɔ a ka baaradenw ye ko: ‘A’ ye a senw ni a bolow siri ka a fili kɛnɛma dibi la. Kasi ni ɲin ɲimi na kɛ yen.’ Caman welelen bɛ, nka ɲɛnatɔmɔlenw man ca.”—Matiyo 22:11-14, ABM.

Diinan kuntigi minw be Yezu ka kumaw lamɛnna, n’a sɔrɔ u m’u kɔrɔ bɛɛ faamu. Nka u dusu gwanna. O kama, u banbanin lo walisa ka Yezu faga sabu a b’u ɲɛgwanna.