Taga a kɔnɔkow lajɛ

Taga a kɔnɔnakow lajɛ

 SAPITIRI 47NAN

Sungurunin dɔ suu kununa!

Sungurunin dɔ suu kununa!

MATIYO 9:18, 23-26 MARIKI 5:22-24, 35-43 LUKA 8:40-42, 49-56

  • YEZU BE ZAYIRUS DENMUSO SUU KUNU

Jolibɔn bana tun be muso min na, Zayirus y’a ye ko Yezu y’a kɛnɛya. O kama, a lanin b’a la ko Yezu be se k’ale denmuso dɛmɛ fana. Nka, n’a sɔrɔ a b’a miiri ko sisan b’a sɔrɔ a “denmuso banna.” (Matiyo 9:18). Yala Yezu bele be se ka koo dɔ kɛ a ye wa?

Yezu ye muso min kɛnɛya, k’a to kuma na n’o muso ye, cɛɛ dɔw bɔra Zayirus ka soo ka na a fɔ a ye ko: “I denmuso banna. Mun na i be karamɔgɔ sigɛn tugu?”—Mariki 5:35.

Nin ye kibaro goman ye dɛ! Zayirus ye mɔgɔba ye ani mɔgɔw b’a bonya kosɔbɛ. Nka sisan, a jigi bɛɛ tigɛra. Deen kelenpe min tun b’a fɛ, o sara. Yezu y’o kibaro goman mɛn ani a y’a ɲɛsin Zayirus ma k’a jija ko: “Kana siran, la Ala la dɔrɔn.”—Mariki 5:36.

O kɔ, Yezu tugura Zayirus kɔ ka taga a ka soo. U sera tuma min na, u y’a ye ko mɔgɔw fanin b’a ka soo ani mankanba be yen. Mɔgɔw be kasira ka kule ani u b’u disi gosira dusukasi bolo. Yezu donna soo kɔnɔ ani a ye kuma kabakoman nin fɔ u ye ko: “Deen ma sa, a be sinɔgɔra le.” (Mariki 5:39). Mɔgɔw y’o mɛn minkɛ, u yɛlɛla Yezu la sabu u y’a lɔn ko sungurunin sara tiɲɛn na. Ala ye setigiya min di Yezu ma, Yezu bena tɛmɛ o fɛ k’a yira ko suuw be se ka kunu i ko mɔgɔ be se ka kunu sinɔgɔba la cogo min na.

Yezu ye mɔgɔ bɛɛ bɔ kɛnɛma. Nka ale ni Piyɛri, Zan, Zaki ani sungurunin bangebagaw lo tora boon kɔnɔ. Sungurunin suu lanin be bonden min kɔnɔ, Yezu tagara n’o mɔgɔ duuru ye o yɔrɔ la. A ye sungurunin bolo minɛ k’a fɔ ko: “‘Talita kumi,’ o kɔrɔ ko: ‘Sungurunin, n b’a fɔ i ye, wili!’” (Mariki 5:41). Sungurunin wulila yɔrɔnin kelen ani a y’a daminɛ ka tagama. Miiri k’a filɛ Zayirus n’a muso ɲagalila cogo min na k’a ye k’u deen suu kununa! Walisa ka dalilu wɛrɛ di min b’a yira ko sungurunin be niin na tiɲɛn tiɲɛn na, Yezu y’a fɔ k’u ka dumuni di a ma.

Yezu tun ye mɔgɔ minw kɛnɛya ka kɔrɔ, a tun y’a fɔ u ye k’u kana o koo wangola. A y’o lo fɔ sungurunin bangebagaw ye fana. Nka, o kibaro jɛnsɛnna “o yɔrɔ mara bɛɛ la.” (Matiyo 9:26). N’ele ka mɔgɔ dɔ suu lo tun kununa, yala i tun tɛna ɲagali k’o fɔ bɛɛ ye wa? A siɲɛ filanan lo ye nin ye Yezu ye mɔgɔ dɔ suu kunu.