Taga a kɔnɔkow lajɛ

Taga a kɔnɔnakow lajɛ

 SAPITIRI 3NAN

Sira labɛnbaga wolola

Sira labɛnbaga wolola

LUKA 1:57-79

  • ZAN BATIZELIKƐLA WOLOLA ANI U Y’A TƆGƆ LA

  • ZAKARI KƆNNA K’A FƆ ZAN BENA MIN KƐ

Elizabɛti jigilon sera ka ban. A balimamuso Mariyamu nana kalo saba kɛ n’a ye. Sisan, a kɔsegi wagati sera. A bena sirajan tagama ka sɔrɔ ka se a ka soo Nazarɛti dugu la. Yanni kalo wɔɔrɔ ɲɔgɔn, ale fana bena cɛdennin dɔ wolo.

Mariyamu taganin kɔ, a ma mɛɛn, Elizabɛti jigira. Ninsɔndiya lo k’a ye ko foyi tɛ Elizabɛti n’a deen na! Tuma min na Elizabɛti y’a dencɛ yira a sigiɲɔgɔnw n’a somɔgɔw la, u bɛɛ ninsɔndiyara ɲɔgɔn fɛ.

Ala ka Sariya tun b’a ɲini Israɛldenw fɛ ko ni muso ye dencɛ wolo, u k’a kɛnɛkɛnɛ ani k’a tɔgɔ la, a tile seeginan loon (Levitiki 12:2, 3). Mɔgɔ dɔw b’a miirila ko Zakari tɔgɔ lo ka ɲi ka la a dencɛ la. Elizabɛti ma sɔn o ma. A ko: “Ayi, a tɔgɔ bena la ko Zan.” (Luka 1:60). An k’a to an hakili la ko mɛlɛkɛ Gabiriyɛli tun y’a fɔ a ye ko a deen tɔgɔ ka ɲi ka la ten le.

U sigiɲɔgɔnw n’u somɔgɔw y’a jaabi ko: “I ka mɔgɔ si tɔgɔ te ten.” (Luka 1:61). U ye Zakari ɲininga bobow ka kumacogo la ko a b’a fɛ tɔgɔ juman ka la a deen na. Zakari ko u ka walaka dɔ di ale ma ani a y’a sɛbɛ a kan ko: “A tɔgɔ ko Zan.”—Luka 1:63.

O kɔ, kabako dɔ kɛra! Zakari y’a daminɛ ka kuma kokura. I hakili b’a la fɛɛn min kama a tun kɛra bobo ye wa? A tun kɛra bobo ye sabu tuma min na mɛlɛkɛ y’a fɔ a ye ko Elizabɛti bena dencɛ wolo, a ma la o la. Zakari sera ka kuma tugun minkɛ, a sigiɲɔgɔnw kabakoyara. U y’u yɛrɛ ɲininga ko: “O tuma na, deen nin bena kɛ mun le ye sa?” (Luka 1:66). Zan tɔgɔ lara cogo min na, u y’a faamu ko Ala be n’a ye.

O kɔ, Zakari fara hakili senu na ani a y’a fɔ ko: “Tanuli ka kɛ Matigi ye, Isirayɛli ka Ala, bari a y’a janto a ka mɔgɔw la k’u hɔrɔnya. A  ye kisibaga barikaman lawili an ye, a y’a bɔ a ka baarakɛla Dawuda buruju la.” (Luka 1:68, 69). A kaan be “kisibaga barikaman” min ma, o ye Matigi Yezu lo ye. Ale bena wolo yanni dɔɔni. Zakari y’a fɔ a koo la ko Ala bena “an tila an juguw la, waasa an jaa gwɛlɛyanin ka baara kɛ ale ye, a k’an jati mɔgɔ senumanw ni mɔgɔtilenninw ye an sii bɛɛ la.”—Luka 1:74, 75.

Zakari ye kiraya kɛ fana a yɛrɛ dencɛ koo la. A ko: “E kɔni, ne deen, i bena wele Fɛɛn bɛɛ kuntigi Ala ka kira, bari i bena taama Matigi ɲakɔrɔ k’a ka sira labɛn. I bena kisili sira yira a ka mɔgɔw la u ka hakɛw yafali seen fɛ, an ka Ala ka makari n’a ka ɲumanya barika la. A bena kɛnɛ ci an ye ka bɔ sanfɛ i ko tile bɔtɔ kɛnɛ, ka yeelen bɔ dibilamɔgɔw ye, ni minw be siran saya ɲa, ani k’an bila hɛrɛ sira kan.” (Luka 1:76-79). O ye jijali kumaw ye dɛ!

Sisan kɔni, Mariyamu sera a ka soo Nazarɛti. Komi a ma furu fɔlɔ, mun lo bena a sɔrɔ ni mɔgɔw nana bɔ a kala ma ko a kɔnɔman lo?