Taga a kɔnɔkow lajɛ

Taga a kɔnɔnakow lajɛ

 SAPITIRI 81NAN

Kɔrɔ juman na Yezu n’a Faa ye kelen ye?

Kɔrɔ juman na Yezu n’a Faa ye kelen ye?

ZAN 10:22-42

  • “NE NI N FAA YE KELEN YE”

  • YEZU KO ALE M’A FƆ KO A YE ALA YE

Yezu be Zeruzalɛmu, Alabatoso saniyali ɲɛnagwɛ la min be weele ko Hanukkah. O ɲɛnagwɛ loon na, Yahutuw be Alabatoso di Ala ma kokura. A saan kɛmɛ ni kɔ lo ye nin ye Siri masacɛ Antiyokusi 4nan min be weele ko Epifane, ale ye sarakabɔlan dɔ lɔ Alabatoso ka sarakabɔlanba sanfɛ. Kɔfɛ, Yahutucɛ dɔ min tun ye sarakalasebaga ye, ale dencɛw ye Zeruzalɛmu bɔsi Sirikaw na ani u ye Alabatoso di Jehova ma kokura. Kabi o wagati, o ɲɛnagwɛ be kɛ saan o saan Kisilewu kalo tile 25nan na. O kalo be bɛn novanburu tilancɛ ka taga se desanburu tilancɛ ma.

Nɛnɛ tuma lo ani Yezu be tagamana Alabatosoba yɔrɔ dɔ la, min be weele ko Solomani ka bulonda. Yahutuw tagara a lamini k’a ɲininga ko: “I be waati jumɛn le kɔnɔ ka sɔrɔ ka tiɲɛ fɔ an ye? N’o y’a sɔrɔ i ye . . . [Krista] ye, a fɔ an ye ka gwɛ.” (Zan 10:22-24). Yezu y’u jaabi ko: “Ne y’a fɔ aw ye ka ban, nga aw te lara ne la.” Yezu m’a fɔ u ye ka gwɛ k’ale lo ye Krista ye i ko a tun y’a fɔ ka gwɛ Samarika muso ye cogo min na (Zan 4:25, 26). Nka a y’a fɔ u ye ale ye mɔgɔ min ye. A ko: “Sanni Ibrayima ka wolo, ne tun be yen.”—Zan 8:58.

Krista bena koo minw kɛ, kiraw tun kɔnna ka min fɔ o koo la, Yezu b’a fɛ a lamɛnbagaw k’o suma ni ale ka kɛwalew ye. O cogo la, u bena a lɔn u yɛrɛma ko ale lo ye Krista ye. O le kosɔn, tuma dɔw la, a y’a fɔ a ka kalandenw ye k’u kan’a fɔ mɔgɔ si ye ko ale lo ye Masiya ye. Nka sisan, a y’a fɔ o Yahutu dimininw ye ka gwɛ ko: “Ne be kɛwali minw kɛ n Faa tɔgɔ la, o be ne ka koo yira fana. Aw te la ne la.”—Zan 10:25, 26.

Mun na u lanin t’a la ko Yezu lo ye Krista ye? Yezu ko: “Aw te la ne la bari aw te n ka sagaw dɔw ye. Ne be n ka sagaw lɔn, u be mɛnni kɛ n fɛ, u be tugu n kɔ. Ne fana be nii [ɲɛnamaya] banbali di u ma. U tena halaki abada, mɔgɔ si fana te se k’u bɔsi n na. N Faa min y’u di n ma, ale ka bon ni fɛɛn bɛɛ ye.” O kɔ, Yezu y’a fɔ u ye ko jɛnɲɔgɔnya barikaman b’ale n’a Faa cɛɛ. A y’o fɔ kuma nin fɛ: “Ne ni n Faa ye kelen ye.” (Zan 10:26-30). Yezu be dugukolo kan, nka a Faa be sankolo la. O la do, a ka kuma kɔrɔ tɛ se ka kɛ ko ale n’a Faa ye mɔgɔ kelen ye. Nka o kɔrɔ ko ale n’a Faa be ni sagonata kelen lo ye.

Yezu ka kumaw ye Yahutuw dimi fɔɔ u ye kabakuruw cɛ tugun ko u b’a bon k’a faga. O ma siranya bila Yezu la. A ko: “Ne ye koɲuman caaman kɛ n Faa barika la, aw y’u ye. Aw b’a fɛ ka ne bon olu jumɛn lo kama?” U y’a jaabi ko: “Anw m’a fɔ ko an b’i bon koɲuman kɛnin kama, nga anw b’a fɛ k’i bon bari i ye kuma fɔbali fɔ. . . . i b’a fɔ ko i ye Ala ye!” (Zan 10:31-33). Yezu ma deli k’a fɔ abada ko ale ye Ala ye. Mun na u do b’a jalaki do?

Yahutuw ka miiri la, mɔgɔ tɛ se ka kɛ ni see min ye ni Ala kelenpe tɛ, Yezu y’a fɔ k’o see b’ale ye. Ɲɛyirali fɛ, a y’a fɔ “sagaw” koo la ko: “Ne bɛ ɲɛnamaya banbali di u ma.” (Zan 10:28, ABM). O ye koo ye adamaden tɛ se ka min kɛ. Yezu y’a yira Yahutuw la ka gwɛ ko see min b’a ye, o bɔra a Faa lo fɛ. Nka u bele ma sɔn.

Walisa k’a yira k’u ye ale jalaki gwansan, Yezu y’u ɲininga ko: “Ala ko: ‘Aw ye batofɛn dɔw ye.’ O ma sɛbɛn aw ka sariyasɛbɛ [Zaburuw 82:6] kɔnɔ wa? . . . A tun be kumana mɔgɔ le fɛ, n’a y’a fɔ u ye ko: ‘Aw ye ala dɔw ye.’ Ala ye mɔgɔ min woloma k’a ci diɲɛ na, aw ko ale ma: ‘I ye kuma fɔbali fɔ.’ Bari ne y’a fɔ ko ne ye Ala Deen ye.”—Zan 10:34-36.

Tiɲɛn na, Ala ka Kuma yɛrɛ b’a fɔ adamadenw ka kititigɛla tilenbaliw koo la ko u ye “ala dɔw” ye. Mun na o Yahutuw do be Yezu jalaki sabu a ko “Ne ye Ala Deen ye”? Yezu ye kuma wɛrɛ fɔ  tugun min tun ka ɲi ka Yahutuw lasun ka la a la. A ko: “Ni ne te n Faa ka kɛwaliw kɛ, aw kana la ne la. Nga ne b’o kɛra, o bɛɛ n’a ta, aw te lara ne la. Ayiwa, n be baara minw kɛra, aw ye la olu la, janko aw ka se k’a lɔn ko n Faa be ni ne ye, ko ne be ni n Faa ye.”—Zan 10:37, 38.

O kumaw kama, Yahutuw y’a ɲini ka Yezu minɛ, nka u ma se. A bɔra Zeruzalɛmu ka taga Zurudɛn baji kɔfɛ. O yɔrɔ la le Zan y’a daminɛ ka mɔgɔw batize a saan naani ɲɔgɔn ye nin ye. A be komi o yɔrɔ be Galile baji worodugu fan fɛ.

Jama tagara Yezu fɛ ani u ko: “Zan kɔni ma kabakow kɛ, nga a ye min bɛɛ fɔ cɛɛ nin ka koo la, a bɛɛ kɛra tiɲɛ ye.” (Zan 10:41). O b’a yira ko Yahutu caaman lara Yezu la.