Taga a kɔnɔkow lajɛ

Taga a kɔnɔnakow lajɛ

 SAPITIRI 17NAN

Yezu be Nikodɛmu kalan sufɛ

Yezu be Nikodɛmu kalan sufɛ

ZAN 2:23–3:21

  • YEZU BE KUMA NI NIKODƐMU YE

  • KA “SEGI KA WOLO TUGU,” O KƆRƆ KO DI?

Ka Yezu to Zeruzalɛmu, saan 30 ka Tɛmɛnkan seli la, a ye kabako dɔw kɛ. O y’a to mɔgɔ caaman lara a la. Yezu ka kabakow ye Nikodɛmu kabakoya fana. O cɛɛ ye Fariziɲɛ ye ani Yahutuw ka kititigɛlaw jɛnkulu mɔgɔ dɔ lo. A b’a fɛ ka dɔ lɔn Yezu koo la. O kama, a tagara Yezu fɛ sufɛ. N’a sɔrɔ a be siranna ko Yahutuw ka kuntigi tɔɔw kana a ye ani k’a tɔgɔ tiɲɛ.

Nikodɛmu y’a fɔ Yezu ye ko: “Karamɔgɔ, anw y’a lɔn ko Ala le y’i ci. Bari i be kabako minw kɛ, ni Ala te e mɔgɔ min fɛ, e te se k’o kɛ.” Yezu y’a fɔ a ye ko mɔgɔ min b’a fɛ ka don Ala ka Masaya la fɔɔ a ka “segi ka wolo tugu.”—Zan 3:2, 3.

Nka, mɔgɔ be se ka segi ka wolo tugun cogo di? Nikodɛmu ye Yezu ɲininga ko: “A be se ka segi ka don a baa kɔnɔ ka wolo tugu wa?”—Zan 3:4.

Ayi! O tɛ Yezu ka kuma kɔrɔ ye. Yezu y’a ɲɛfɔ a ye ko: “Ni mɔgɔ min ma wolo jii, ani Nii Senuman barika la, o tigi te se ka don Ala ka masaya la.” (Zan 3:5). Yezu wolola jii ni hakili senu barika la tuma min na a batizera ani hakili senu jigira a kan. O wagati la, kumakan dɔ bɔra sankolo la k’a fɔ ko: “Nin ye ne Dencɛ kanunin ye. A koo ka di ne ye haali.” (Matiyo 3:16, 17). O cogo la, Ala y’a yira ko sisan, Yezu kɛra ale Dencɛ ye min bena ɲɛnamaya kɛ sankolo la ani ka don a ka Masaya la. Kɔfɛ, saan 33 Pantekɔte loon na, kalandenw batizenin kɔ, hakili senu jigira u kan. O cogo la, olu fana segira ka wolo ka kɛ Ala deen bangelenw ye, minw bena ɲɛnamaya kɛ sankolo la.—Kɛwaliw 2:1-4.

Yezu be Nikodɛmu kalanna min na Masaya koo la, o faamu ka gwɛlɛ Nikodɛmu fɛ. O kama, Yezu ye kunnafoni wɛrɛw di Nikodɛmu ma a yɛrɛ koo la k’a yira ale ka lɔyɔrɔ kɛrɛnkɛrɛnnin ye min ye. A ko: “Musa ye saa nigɛlaman kɔrɔta sanfɛ lɔgɔ kan cogo min na kongokolon kɔnɔ, fɔɔ Mɔgɔ Dencɛ fana kɔrɔ ka ta ten, waasa ni mɔgɔ min y’a jigi la a kan, o tigi ka nii banbali sɔrɔ.”—Zan 3:14, 15.

Fɔlɔ la, saa tun ye Isirayɛliden minw ci, olu tun ka kan k’o saa nsiranɛgɛlaman filɛ walisa ka to niin na (Nɔnburuw 21:9). O cogo kelen na, adamadenw bɛɛ ka ɲi ka limaniya Ala Dencɛ la walisa ka kisi jurumu ni saya ma ani ka ɲɛnamaya banbali sɔrɔ. Walisa k’a yira ka gwɛ ko Ala y’o labɛn kɛ ni kanuya ye, Yezu y’a fɔ Nikodɛmu ye ko: “Ala ye diɲɛ kanu haali, fɔɔ a y’a Deen kelenpe ci mɔgɔw ma, waasa ni mɔgɔ min y’a jigi la a kan, o tigi kana halaki, nga o ka nii banbali sɔrɔ.” (Zan 3:16). O la, kalo wɔɔrɔ a ka waajuli baara daminɛnin kɔ, Yezu y’a yira ka gwɛ Zeruzalɛmu dugu la ko adamadenw bena ɲɛnamaya banbali sɔrɔ ale sababu fɛ.

Yezu y’a fɔ Nikodɛmu ye ko: “Ala m’a Dencɛ ci diɲɛ na waasa ka mɔgɔw jalaki.” O kɔrɔ ko Ala m’a ci ka na kiti ben mɔgɔw kan ko u ka kan ni halakili ye. Nka, a nana “waasa k’u kisi.”—Zan 3:17.

Siranya kosɔn Nikodɛmu nana Yezu fɛ sufɛ. O kosɔn, a bɛnnin lo Yezu k’a ka kuma kuncɛ nin cogo la ko: “O kiri sababu filɛ nin ye ko, kɛnɛ nana diɲɛ la, nka dibi diyara mɔgɔw ye ka tɛmɛn kɛnɛ kan, katuguni u ka kɛwalew ka jugu. Mɔgɔ o mɔgɔ bɛ ko jugu kɛ, kɛnɛ man di  o tigi ye fewu, o tɛ sɔn ka na kɛnɛ la fana, walisa a ka kɛwale juguw kana jira kɛnɛ kan. Nka mɔgɔ min bɛ tiɲɛ kow kɛ, o bɛ na kɛnɛ la, walisa a ka kɛwalew k’a jira ko u kɛra ka kɛɲɛ ni Ala sago ye.”—Zan 3:19-21, ABM.

Nikodɛmu ye Fariziɲɛ ye ani Israɛldenw ka karamɔgɔ lo. Yezu lɔyɔrɔ ye min ye Ala sagonata koo la, a y’o faamu. Sisan, a ka ɲi ka wagati ta ka miiri o la.