Taga a kɔnɔkow lajɛ

Taga a kɔnɔnakow lajɛ

 SAPITIRI 109NAN

Yezu b’a juguw kɔrɔfɔ

Yezu b’a juguw kɔrɔfɔ

MATIYO 22:41–23:24 MARIKI 12:35-40 LUKA 20:41-47

  • KRISTA YE JƆN DENCƐ LO YE?

  • YEZU B’A JUGUW KA FILANKAFOYA YIRA

Yezu kɛlɛbagaw ma se k’a yira ko a ye ngalontigɛla lo ye. U ma se fana k’a lafili walisa k’a don Ɔrɔmukaw bolo (Luka 20:20). Yezu bele be Alabatosoba kɔnɔ Nisankalo tile 11nan na. A ye mɔgɔ min ye tigitigi, a y’o yira. Sisan, ale lo bena Fariziɲɛw kɔrɔbɔ. A y’u ɲininga ko: “Aw ka miiri la, Ala ka mɔgɔ wolomanin nin [Krista] ye jɔn ye? Jɔn ka deen lo?” (Matiyo 22:42). Bɛɛ b’a lɔn ko Krista, wala Masiya bena bɔ Dawuda buruju lo la. Yezu juguw y’o lo fɔ fana.—Matiyo 9:27; 12:23; Zan 7:42.

Yezu y’u jaabi ko: “Nii Senuman barika la, Dawuda ye Krista wele ko a Matigi, bari a y’a fɔ ko: ‘Matigi Ala y’a fɔ ne Matigi ye ko: Sigi ne kinibolo fɛ fɔɔ ne k’i juguw cɔnkɔn i seen kɔrɔ.’ Ni Dawuda y’a wele Matigi, a do be se ka kɛ a deen dama ye cogo di?”—Matiyo 22:43-45.

Fariziɲɛw ma se ka foyi fɔ. U b’a miiri ko Dawuda bɔnsɔn dɔ lo bena na u kisi ka bɔ Ɔrɔmukaw bolo. Nka, Dawuda ka kuma min be sɔrɔ Zaburu 110:1, 2 kɔnɔ, Yezu basigira o kan k’a yira ko Masiya tɛna kɛ kuntigi gwansan ye adamaden cogo la. A ye Dawuda Matigi ye ani a bena sigi Ala kinibolo fɛ ka sɔrɔ k’a ka kuntigiya daminɛ. Yezu juguw m’a lɔn u bena min fɔ tugun.

Yezu ka kalandenw ni mɔgɔ caaman be lamɛnni kɛra. Yezu y’a fɔ u ye k’u ka u yɛrɛ kɔrɔsi sariya karamɔgɔw ni Fariziɲɛw ma. Tiɲɛn lo k’olu lo ka kan ka “mɔgɔw kalan” Ala ka sariya la. O kama, Yezu ye mɔgɔw ladi ko: “N’u y’aw kalan ni sariya koo min ye, aw k’o kɛ. Nga aw kana u ka kɛwali filɛ, bari u be min fɔ, u t’o kɛ.”—Matiyo 23:2, 3.

O kɔ, Yezu ye ɲɛyirali di Fariziɲɛw ni sariya karamɔgɔw ka filankafoya koo la, ko: “U be sɛbɛ minw bɛɛ siri u teen na, ani u bolo la, u bɛɛ ka bonbon.” Yahutu dɔw be Ala ka sariya yɔrɔ fitinin dɔw sɛbɛ k’u don buwati dennin dɔw kɔnɔ ani k’u siri u teen na wala u bolo la. Fariziɲɛw b’o buwatiw bonya walisa k’a yira k’olu be Ala ka sariya tagama ni kisɛya ye. Ka fara o kan, “u b’u ka faniw kalan ka masirifɛn [wala busan] kɛ u la.” Israɛldenw tun ka ɲi ka busan kɛ u ka fani daa la. Nka, Fariziɲɛw b’u ta kɛ ka janya ka tɛmɛ tɔɔw ta kan (Nɔnburuw 15:38-40). U b’o koow bɛɛ kɛ k’a kɛ “tɔgɔɲini ye.”—Matiyo 23:5.

O tɔgɔɲini nege be se ka kɛ hali Yezu ka kalandenw na. O kama, Yezu y’u lasɔmi ko: “Aw kana sɔn u b’aw wele karamɔgɔ, bari aw bɛɛ ye balimaw ye, aw bɛɛ ka karamɔgɔ ye kelen ye. Aw kana mɔgɔ si wele ko aw facɛ dugukolo kan, bari aw Facɛ ye kelen ye, Ala min be sankolo la.” O la do, Yezu ka kalandenw ka ɲi k’u yɛrɛ jati cogo di ani ka koow kɛ cogo di? Yezu y’a fɔ u ye ko: “Mɔgɔ min ye mɔgɔbaba ye aw cɛma, o ka kan ka kɛ aw ka baaraden ye. Mɔgɔ o mɔgɔ b’a yɛrɛ boɲa, o tigi bena majigi. Mɔgɔ o mɔgɔ b’a yɛrɛ majigi, o tigi bena boɲa sɔrɔ.”—Matiyo 23:8-12.

O kɔ, Yezu ye kuma dɔw fɔ walisa k’a juguw danga, ko: “Bɔnɛ y’aw ta ye, aw sariya karamɔgɔw ni Fariziɲɛ namaramɔgɔw, bari aw be sankolo masaya donda tugu, aw tena don, minw b’a fɛ ka don fana, aw t’a to olu ka don.”—Matiyo 23:13.

Yezu ye Fariziɲɛw jalaki sabu min kɔrɔtanin lo Jehova ɲɛɛ kɔrɔ, u t’u janto o la. U ka sariyaw b’o lo yira. Ɲɛyirali fɛ, u b’a fɔ ko “ni mɔgɔ dɔ kalila Alabatosoba la, k’o te jati, nga ko ni mɔgɔ min kalila Alabatosoba kɔnɔ sanu na, k’o le be jati.” Sanu min be Jehova batosoba kɔnɔ, u y’o sanu fisaya ni batosoba yɛrɛ ye. O cogo la, u b’a yira k’u ye fiyentɔw ye Alako ta fan fɛ. ‘Sariya koo minw ka gwɛlɛ, i n’a fɔ tilenninya, ni makari  ani kantigiya, u tɛ olu labato.’—Matiyo 23:16, 23; Luka 11:42.

Yezu y’a fɔ u ye ko: “Sirayirabaga fiɲɛntɔw, aw b’aw ka minji sɛnsɛn ka [sosow] bɔ, ka sɔrɔ k’o min, k’a sɔrɔ aw be ɲɔgɔmɛ kunu.” (Matiyo 23:24). Fariziɲɛw b’u ka diwɛn sɛnsɛn walisa u kana soso kunu, sabu u b’a jati k’o ninmanfɛn saniyanin tɛ Alako ta fan fɛ. Nka, min kɔrɔtanin lo Ala ka sariya kɔnɔ u t’o labato. A be i n’a fɔ u ye ɲɔgɔmɛ lo kunu k’a sɔrɔ a be jati ko ale fana saniyanin tɛ Alako ta fan fɛ ani a yɛrɛ ka bon ka tɛmɛ soso kan.—Levitiki 11:4, 21-24.