Taga a kɔnɔkow lajɛ

Taga a kɔnɔnakow lajɛ

 SAPITIRI 52NAN

Yezu be mɔgɔ waa caaman balo ni buru ni jɛgɛ damanin ye

Yezu be mɔgɔ waa caaman balo ni buru ni jɛgɛ damanin ye

MATIYO 14:13-21 MARIKI 6:30-44 LUKA 9:10-17 ZAN 6:1-13

  • YEZU BE CƐƐ 5000 BALO

Yezu ka ciden 12 ye waajuli kɛ Galile mara bɛɛ la ani u ninsɔndiyanin lo. U “ye mɔgɔw kalan” ani u ye “ko minnu kɛ,” u b’o bɛɛ lakalila Yezu ye. U sɛgɛnnin lo. O bɛɛ n’a ta, wagati t’u fɛ ka dumuni kɛ sabu mɔgɔ caaman be nana ka taga. O kama, Yezu y’a fɔ u ye ko: “Aw ye na an ka taga danna yɔrɔ dɔ la janko aw ka lafiɲɛ dɔɔni.”—Mariki 6:30, 31.

U donna kurun dɔ kɔnɔ, n’a sɔrɔ Kapɛrnaum gɛrɛfɛ, ani u y’u ɲɛsin Zurudɛn baji tilebɔ fan fɛ. U be tagara yɔrɔ min na mankan tɛ yen, Bɛtisayida dugu kɔfɛ. Nka mɔgɔ caaman y’u tagatɔ ye, dɔw fana y’a mɛn k’u tagara yen. U bolila baji daa la, ka kɔn Yezu n’a ka cidenw ɲɛ baji kɔfɛ.

Yezu bɔtɔ kurun kɔnɔ, a ye jama ye ani u makari y’a minɛ sabu u be i n’a fɔ sagaw, dɛndɛbaga tɛ minw na. O kama, a y’a daminɛ “k’u kalan fɛɛn caaman na.” (Mariki 6:34). “Minw tun be kɛnɛyali fɛ,” a y’olu fana kɛnɛya (Luka 9:11). Wulafɛ, Yezu ka kalandenw y’a fɔ a ye ko: “Suu be ɲini ka ko, yan do ye yɔrɔlakolon ye, e te sira di jama ma u ka taga dafɛduguw la ka dumuni san u yɛrɛw ye wa?”—Matiyo 14:15.

Yezu y’u jaabi ko: “A daganin te u ka taga yɔrɔ dɔ la, aw yɛrɛ ka dumuni d’u ma.” (Matiyo 14:16). Yezu y’a lɔn a bena min kɛ. Nka, walisa ka Filipu ka miiriya lɔn, a y’a ɲininga ko: “An bena taga dumuni san min k’a di jama nin ma waasa u bɛɛ ka se ka fa?” Yezu ye Filipu lo ɲininga sabu ale lo be bɔ Bɛtisayida gɛrɛfɛ. Hali ni Yezu ka kalandenw tagara buru san, o buru tɛ se ka bɔri kɛ. Mun na do? Sabu cɛɛ 5000 ɲɔgɔn lo be yen. Ni musow ni denmisɛnw farala u kan, u bɛɛ lajɛnnin be mɔgɔ 10000 ni kɔ bɔ. Filipu ko: “Hali n’an tagara kalo seegi baara wari buru san, u bɛɛ tena dɔɔni dɔɔni sɔrɔ.”—Zan 6:5-7.

N’a sɔrɔ Andere b’a fɛ k’a yira k’u tɛ se k’o jamaba balo. O kama, a y’a fɔ ko: ‘Cɛdennin dɔ be yan ni burukun duuru ni jigɛ deen fila ye. Nga o be mun ɲa nunu ma?’—Zan 6:9.

An be marisi wala awirili kalo tuma na. Saan 32 ka Tɛmɛnkan seli surunyana ani biinw fanin be kuluw kan. Yezu y’a fɔ a ka kalandenw ye ko mɔgɔw ka sigi biin kan mɔgɔ biduuru-duuru ani kɛmɛ-kɛmɛ. A ye burukun duuru ni jɛgɛ fila ta ani a ye barika la Ala ye. O kɔ, a ye burukun nunu kari kari, ani a ye jɛgɛ nunu tigɛ tigɛ k’u di a ka kalandenw ma walisa u k’u tilan tilan mɔgɔw ye. Mɔgɔw bɛɛ ye dumuni kɛ fɔɔ ka fa. O ye kabakoba yɛrɛ lo ye!

Mɔgɔw ye dumuni kɛ ka ban tuma min na, Yezu y’a fɔ a ka kalandenw ye ko: “Aw ye buru tɔɔ bɛɛ tɔmɔ a si kana cɛn.” (Zan 6:12). Buru minw tora, u ye segi 12 bɛɛ fa!