Taga a kɔnɔkow lajɛ

Taga a kɔnɔnakow lajɛ

 SAPITIRI 94NAN

An ka ɲi ka delili kɛ ani k’an yɛrɛ majigi

An ka ɲi ka delili kɛ ani k’an yɛrɛ majigi

LUKA 18:1-14

  • FIRIYAMUSO MIN TIMINANDIYARA DELILI LA

  • FARIZIƝƐCƐ NI LANPOMINƐLA

Yezu tun ye ntalen dɔ la a ka kalandenw ye k’a yira ko a kɔrɔtanin lo u ka timinandiya delili la (Luka 11:5-13). N’a sɔrɔ a be Samari wala Galile mara la sisan ani a sinsinna o miiriya kelen kan. A tɛmɛna ɲɛyirali wɛrɛ fɛ walisa k’o kɛ. A ko:

“Kititigɛla dɔ tun be dugu dɔ la. Kititigɛla nin tun te siran Ala ɲa, a tun te mɔgɔ si boɲa. O dugu kelen nin kɔnɔ, firiyamuso dɔ tun be yen min tun be to ka taga fɔ a ye ko fɛɛn min be ale n’a kɛlɛɲɔgɔn cɛ, a k’o ɲanabɔ ale ye. Muso mɛnna o la. Kititigɛla nin tun t’a fɛ k’a ɲanabɔ. A nana se waati dɔ la, a y’a fɔ a yɛrɛ kɔnɔ ko: ‘Ne te siran Ala ɲa ani ne te mɔgɔ si boɲa, o ye tiɲɛ ye. Nga ne bena firiyamuso nin ka koo ɲanabɔ a ye, n’o tɛ, a bena to ka na ne nii tɔɔrɔ tuma bɛɛ.’”—Luka 18:2-5.

An be mun lo faamu o la? Yezu y’a fɔ ko: “Aw ka kititigɛla tiɲɛfɔbali nin ka kuma lajɛ. Ayiwa, Ala ye minw woloma k’u kɛ a ta ye, ni olu be dɛmɛ ɲini a fɛ suu ni tile, yala a bena mɛn k’u dɛmɛ wa?” (Luka 18:6, 7). Yezu b’a fɛ ka mun lo fɔ a Faa koo la?

Siga si t’a la, Yezu t’a fɛ k’a fɔ ko Jehova Ala n’o kititigɛla tilenbali ye kelen ye. Nka, a b’a yirala le ko faranfasi be Jehova n’o kititigɛla cɛ: Ni adamaden tilenbali be mɔgɔw dɛmɛ sabu u b’a delila sɔbɛ la, siga t’a la, Ala fana bena an dɛmɛ. Ala tilennin lo ani a ka ɲi. O kama, a bena a sagokɛlaw ka deliliw jaabi n’u tora ka delili kɛ tuma o tuma. Yezu ye min fɔ o kɔ, o b’an dɛmɛ ka o lo faamu. A ko: “Ne b’a fɔ aw ye ko [Ala] bena u ka koo ɲanabɔ joona.”—Luka 18:8.

Mɔgɔw man teli ka kiti tigɛ cogo tilennin na dɛsɛbagatɔw ni fantanw ye. Nka, u ka teli ka faamanw ni nafolotigiw minɛ ka ɲɛ. Ala kɔni tɛ koow kɛ ten. N’a wagati sera, a bena mɔgɔ juguw halaki ani a sagokɛlaw bena ɲɛnamaya banbali sɔrɔ.

Jɔn ka limaniya be i n’a fɔ o firiyamuso ta? Mɔgɔ joli lo lanin b’a la ko Ala bena “u ka koo ɲanabɔ joona”? A ma mɛɛn, Yezu ye ntalen dɔ la walisa k’a yira ko an ka ɲi k’an timinandiya delili la. Sisan, a be ɲiningali dɔ kɛ walisa k’a yira ko delili be dɔ ɲɛ mɔgɔ ye. A ko: “Mɔgɔ Dencɛ bena segi tuma min na, yala a bena na lanaya sɔrɔ dugukolo kan wa?” (Luka 18:8). Yezu b’a fɛ k’a fɔ le ko n’ale nana, mɔgɔ damanin lo bena kɛ n’o limaniya ɲɔgɔn ye.

Mɔgɔ minw be Yezu lamɛnna, u dɔw lanin b’a la k’olu limaniyanin lo ani k’u tilennin lo. O kosɔn, u be tɔɔw mafiɲɛya. Yezu ye ɲɛyirali dɔ ta o mɔgɔw koo la ko:

“Loon dɔ, cɛɛ fila tagara Alabatosoba kɔnɔ ka Ala daali. Kelen tun ye Fariziɲɛ ye, kelen tun ye lɛnpominɛla ye. Fariziɲɛ nin lɔra ka Ala daali a yɛrɛ kɔnɔ ko: ‘Ala, ne be barika la i ye, bari ne te i n’a fɔ mɔgɔ tɔw, olu minw be benkanni kɛ, u be tilenbaliyakow kɛ, ka kakalaya kɛ, ani n te i n’a fɔ nin lɛnpominɛla nin. Ne be suun don siɲɛ fila lɔgɔkun o lɔgɔkun. Ne be fɛɛn o fɛɛn sɔrɔ, ne b’o bɛɛ jaka bɔ.’”—Luka 18:10-12.

 Bɛɛ b’a lɔn ko Fariziɲɛw ka teli k’u yɛrɛ kɛ i n’a fɔ mɔgɔ tilenninw mɔgɔw ɲɛɛ na. Nka, u b’o kɛ walisa k’u yɛrɛ yira. U b’u yɛrɛ waajibiya ka suun don ntɛnɛlonw ni lamisalonw na. U b’o kɛ walisa mɔgɔ caaman k’u ye sabu o loonw ye lɔgɔlonw lo ye. Ka fara o kan, u be jija ka nanfuraburu fitininw yɛrɛ jaka bɔ (Luka 11:42). Kalo damanin ka kɔn o ɲɛ, u y’a yira k’u tɛ mɔgɔ gwansanw jati. U y’a fɔ ko: “Jama nin tɛ . . . Musa ka sariya lɔn do [ka kɛɲɛ ni Fariziɲɛw ka faamuyali ye]! U danganinw lo.”—Zan 7:49.

Yezu tagara ɲɛ n’a ka ɲɛyirali ye ko: “Lɛnpominɛla nin lɔnin tun be kɔfɛ yɔrɔjan. A ma sɔn k’a ɲaa kɔrɔta sanfɛ yɛrɛ, nga a tora k’a disi gosi dusukasi bolo, ka to k’a fɔ ko: ‘Ala, makari ne la, ne ye hakɛkɛla ye.’” Tiɲɛn na, lanpominɛla y’a yɛrɛ majigi ka sɔn a ka filiw ma. O kosɔn, Yezu y’a ka kumaw kuncɛ ko: “Ne b’a fɔ aw ye ko Ala ye lɛnpominɛla nin jati mɔgɔtilennin ye sanni a ka segi soo. Nga a ma Fariziɲɛ nin jati mɔgɔtilennin ye, bari mɔgɔ o mɔgɔ b’a yɛrɛ boɲa, o tigi bena majigi. Mɔgɔ o mɔgɔ b’a yɛrɛ majigi, o bena boɲa sɔrɔ.”—Luka 18:13, 14.

O cogo la, Yezu y’a yira ka gwɛ ko an ka ɲi k’an yɛrɛ majigi. Yezu ka kalandenw mako b’o ladili la. Mun na do? Sabu u bonyana yɔrɔ min na, Fariziɲɛw be mɔgɔw jija u ka lɔyɔrɔba ɲini. An minw ye Yezu ka kalandenw ye bi, an bɛɛ mako b’o ladili nafaman na fana.