Taga a kɔnɔkow lajɛ

Taga a kɔnɔnakow lajɛ

 SAPITIRI 34NAN

Yezu be ciden 12 sugandi

Yezu be ciden 12 sugandi

MARIKI 3:13-19 LUKA 6:12-16

  • CIDEN 12 NUNU

A saan kelen ni kalo wɔɔrɔ ɲɔgɔn ye nin ye Zan Batizelikɛla kumana Yezu koo la ko a ye Ala ka Sagaden ye. Yezu y’a ka cidenya baara daminɛ tuma min na, cɛɛ kɔnɔgwɛ caaman kɛra a ka kalandenw ye, i n’a fɔ: Andere, Simɔn Piyɛri, Zan, n’a sɔrɔ Zaki (o min ye Zan balimacɛ ye), Filipu ani Baritelemi (u be min weele fana ko Natanayɛli). Nka wagati dɔ nana se, mɔgɔ caaman wɛrɛ farala u kan ka tugu Krista kɔ.—Zan 1:45-47.

Sisan kɔni, Yezu labɛnnin lo k’a ka cidenw sugandi. U bena kɛ a teri sɔbɛw ye ani u bena fɔrɔmasɔn ɲuman sɔrɔ. Nka sanni a k’a daminɛ k’u sugandi, Yezu tagara kulu dɔ kan. N’a sɔrɔ o kulu be Galile baji gɛrɛfɛ. O yɔrɔ man jan Kapɛrnaum dugu la. A ye suu bɛɛ kɛ delili la. N’a sɔrɔ a tun be Ala delila ko a ka hakilitigiya di a ma ani a k’ale duga. O dugusagwɛ, a y’a ka kalandenw weele ka na ani a ye mɔgɔ 12 sugandi u cɛma k’u kɛ cidenw ye.

Mɔgɔ wɔɔrɔ minw kofɔra daminɛ na, Yezu kɔnna k’olu lo sugandi. A ye lanpominɛla Matiyo fana sugandi. A ye mɔgɔ duuru sugandi ka fara u kan: Zuda (min be weele fana ko Tade ani ‘Zaki dencɛ’), Simɔn Zelote, Toma, Zaki (ale ye Alife dencɛ ye), ani Zuda Isikariyɔti.—Matiyo 10:2-4; Luka 6:16.

Yezu n’o mɔgɔ 12 nunu ye dugutagaw kɛ ɲɔgɔn fɛ. O kama a tun b’u lɔn ka ɲɛ. U dɔw yɛrɛ y’a somɔgɔw ye. Siga t’a la, Zan n’a balimacɛ Zaki ye Yezu tɛnɛmuso ka deenw ye. Dɔw b’a miiri ko Alife tun ye Yezu lamɔfa Yusufu balima ye. N’o lo, Alife dencɛ Zaki fana tun ye Yezu balima dɔ ye.

Siga t’a la, a tun man gwɛlɛ Yezu ma k’a hakili to a ka cidenw tɔgɔw la. Ele do, i hakili b’u tɔgɔw la wa? Min bena i dɛmɛ, o ye ko Simɔn fila lo be yen, Zaki fila ani Zuda fila. Simɔn (Piyɛri) balimacɛ ye Andere ye ani Zaki (Zebede dencɛ) balimacɛ ye Zan ye. O be se k’i dɛmɛ k’i hakili to ciden seegi tɔgɔw la. Mɔgɔ naani minw tora, u ye: lanpominɛla Matiyo, Toma (kɔfɛ ale sigasigara Yezu koo la), Natanayɛli (ale tun be yiri dɔ jukɔrɔ tuma min na Yezu y’a weele) ani Filipu (Natanayɛli tericɛ).

Yezu ni ciden 11 be bɔ mara kelen na, Galile. Natanayɛli be bɔ Kana. Filipu, Piyɛri ani Andere be bɔ Bɛtisayida. Wagati dɔ nana se, Piyɛri ni Andere tagara sigi Kapɛrnaum. A be komi Matiyo tun siginin b’o yɔrɔ la. Zaki ni Zan fana tun siginin be Kapɛrnaum wala a gɛrɛfɛ yɔrɔw la. U tun be mɔni baara kɛ o yɔrɔ gɛrɛfɛ. A be komi Zuda Isikariyɔti kelenpe lo be bɔ Zude mara la. Ale lo bena Yezu janfa kɔfɛ.