Taga a kɔnɔkow lajɛ

Taga a kɔnɔnakow lajɛ

 SAPITIRI 21NAN

Nazarɛti batoso kɔnɔ

Nazarɛti batoso kɔnɔ

LUKA 4:16-31

  • YEZU BE EZAYI KA KITABU MELEKENIN KALAN

  • NAZƐRƐTIKAW B’A ƝINI KA YEZU FAGA

Nazarɛtikaw bɛɛ ɲagalinin lo. A saan kelen ni kɔ ye nin ye Zan ye Yezu batize. Sanni a ka batize, a tun be miniziye baara lo kɛ. Nka sisan, mɔgɔw b’a fɔra ko a be kabakow kɛ. Dugumɔgɔw kɔrɔtɔnin lo a ka kabako dɔw kɛ u ɲɛɛ na.

U y’a yira k’u kɔrɔtɔninba lo Yezu ka kabako dɔw kɛ tuma min na a tagara batoso kɔnɔ i ko a tun be deli k’o kɛ cogo min na. “Lafiɲɛlon bɛɛ la,” delili tun be kɛ ani Musa ka sariyasɛbɛ tun be kalan Alabatoso kɔnɔ (Kɛwaliw 15:21). Kiraw ka kitabu yɔrɔ dɔw tun be kalan fana. Tuma min na Yezu wulila ka lɔ ko a be kalan kɛ, a ɲɛɛ lara mɔgɔ minw kan, n’a sɔrɔ a y’u caaman lɔn sabu a tun be deli k’u ye Alabatoso kɔnɔ. U ye Ezayi ka kitabu melekenin don a bolo. Ala ka Mɔlen kofɔra yɔrɔ min na, a y’o sɔrɔ. O yɔrɔ be bɛn Ezayi 61:1, 2 lo ma bi.

Yezu y’a kalan o Mɔlen koo la ko a tun bena waajuli kɛ ko jɔɔnw bena hɔɔrɔnya, fiyentɔw bena yeli kɛ ani a tun bena Ala ka ɲumanya saan kofɔ. Yezu ye kitabu melekenin don kalanso kɔrɔsibaga bolo ani a sigira. Bɛɛ ɲɛɛw tun b’a kan. O kɔ, a ye kuma ta tugun. N’a sɔrɔ a kumana ka mɛɛn. A ye kuma dɔ fɔ min kɔrɔtanin lo. A ko: “Aw ye kitabu nin kɔnɔnakuma minw mɛn sisan, o koow kɛra ka dafa bii.”—Luka 4:21.

Yezu ka “kumaɲuman” ye u bɛɛ kabakoya fɔɔ u tun b’a fɔ ɲɔgɔn ye ko: “Nin te Yusufu dencɛ ye wa?” Nka, Yezu y’a faamu ko u tun y’ale ka kabako minw koo mɛɛn, u tun b’a fɛ k’o ɲɔgɔn dɔ ye. A y’a fɔ u ye ko: “Siga t’a la, aw bena talen nin la ne ye ko: ‘Furakɛla, i yɛrɛ kɛnɛya sa.’ Aw bena a fɔ ne ye fana ko: ‘I ye koo minw bɛɛ kɛ Kafaranamu, an y’o mɛn, i k’o ɲɔgɔnw kɛ yan fana i yɛrɛ ka dugu la.’” (Luka 4:22, 23). N’a sɔrɔ Nazarɛtikaw y’a miiri ko Yezu tun ka ɲi k’a yɛrɛ ka dugumɔgɔw lo kɛnɛya fɔlɔ. O kama u y’a miiri ko Yezu ye min fɔ, o ye nɛnini ye.

Komi Yezu y’u ka miiriya lɔn, a y’u ka koo tɛmɛnin dɔw lakali u ye. A ko firiyamusow tun ka ca Israɛl jamana na Eli ka wagati la. Nka, Eli ma ci ka taga u si fɛ. A cira ka taga firiyamuso dɔ fɛ Sarefati (Sarɛpita), Sidɔn dugu gɛrɛfɛ. O muso tun tɛ Israɛlden ye. Eli ye kabako dɔ kɛ k’o muso n’a ka denbaya kisi (1 Masacɛw 17:8-16). Elize ka wagati la fana, kunatɔw tun ka ca Israɛl. Nka, Elize ye Naaman kelenpe lo kɛnɛya hali k’a sɔrɔ a tun ye Sirika ye.—2 Masacɛw 5:1, 8-14.

Nazarɛtika minw tun be batoso kɔnɔ, u y’a faamu ko Yezu ye koo minw lakali, u b’a yira k’olu ye hasiriw ye ani u limaniyanin tɛ. U y’o koo ta cogo di do? U dimina ani u wulila ka Yezu gwɛn bɔ dugu kɔnɔ. Nazarɛti dugu tun be kulu min kan, u ye Yezu minɛ ka taga n’a ye o sanfɛ ani u tun b’a fɛ k’a ɲɔndi k’a fili kulu jukɔrɔ. Nka Yezu bɔsira ka bɔ u bolo ka tɛmɛ n’a ka sira ye. Sisan, Yezu ye Kapɛrnaum sira ta: o be sɔrɔ Galile baji mara la, saheli ni tileben fan fɛ.